ৰাজ্যত সাংবাদিক নিগ্ৰহৰ ঘটনাক ওদালগুৰি জিলা বাৰ্তাজীৱী সংঘৰ গৰিহণা

0 624

অজয় ডেকা, মঙলদৈ

বিটিএডিৰ বাক্সা জিলাৰ এচাম কৰ্ত্তব্যৰত সাংবাদিকক নিৰাপত্তাৰক্ষীয়ে কোনো কাৰণ নোহোৱাকৈ প্ৰহাৰ কৰা কাৰ্যক ওদালগুৰি জিলা বাৰ্তাজীৱী সংঘই তীব্ৰ ভাষাৰে গৰিহণা জনাইছে৷শনিবাৰে এক প্ৰেছ বিবৃতিত  ওদালগুৰি জিলা বাৰ্তাজীৱী সংঘৰ সভাপতি অখিল কলিতা আৰু সম্পাদক মোছাদ্দিক হুছেইনে কয়, যোৱা ২৫ এপ্ৰিলত বৰমাত লকডাউনৰ বাতৰি সংগ্ৰহ কৰি থকাৰ সময়তে সংবাদদাতা দিলীপ কুমাৰ বড়োক বি এছ এফৰ জোৱানে প্ৰহাৰ কৰাৰ উপৰি যোৱা ২৮ এপ্ৰিলত সংবাদদাতা নন্দ বুঢ়াথোকি ছেত্ৰীক বাতৰি সংগ্ৰহ কৰি নিজ ঘৰলৈ উভতি যোৱাৰ সময়তে আৰক্ষীৰ জোৱানে প্ৰহাৰ কৰা কাৰ্য গণতন্ত্ৰৰ চতুৰ্থ স্তম্ভৰ ওপৰত চলোৱা আক্ৰমণৰ ঘটনা গৰিহণাৰ যোগ্য। সেয়ে এনে বৰ্বোৰিচত আক্ৰমণৰ ঘটনাৰ উচিত তদন্ত কৰি সাংবাদিকসকলৰ জীৱনৰ নিৰাপত্তা সুনিশ্চিত কৰিবলৈ অসম চৰকাৰৰ লগতে স্হানীয় জিলা প্ৰশাসনৰ ওচৰত ওদালগুৰি জিলা বাৰ্তাজীৱী সংঘই দাবী জনাইছে। ক’ভিড-১৯ৰ সময়ত নিজৰ জীৱনক তুচ্চ জ্ঞান কৰি থকাৰ  সময়তে সাংবাদিকৰ ওপৰত চলোৱা এনে কাৰ্য গণতন্ত্ৰৰ পৰিপন্হী বুলি বিবৃতিটোত সভাপতি কলিতা আৰু সম্পাদক হুছেইনে উল্লেখ কৰে। ইয়াৰ উপৰি ৰিপাব্লিক টিভিৰ মুখ্য সম্পাদক অৰ্ণৱ গোস্বামী আৰু ধেমাজি জিলাৰ গোগামুখৰ সাংবাদিক হেমচন্দ্ৰ বৰদেউৰীক দুষ্কৃতিকাৰীয়ে আক্ৰমণ কৰা কাৰ্যৰ ঘটনাকো ওদালগুৰি জিলা বাৰ্তাজীৱী সংঘই গৰিহণা জনাই তদন্তৰ দাবী কৰে৷