তিৱা মাথনলাই তখ্ৰা (সাহিত্যে সভা) ৰ উদ্যোগত মৰিগাঁওৰ চাবুকধৰাত প্ৰথমবাৰৰ বাবে উদযাপন কৰা হল তিৱা ভাষা দিৱস। ১৯৯৭ চনৰ ৫ এপ্ৰিল তাৰিখে তিৱা ভাষাৰ কাৰণে লিপি নিৰ্ধাৰণ কৰি প্ৰাথমিক বিদ্যালয়ত তিৱা ভাষা প্ৰৱৰ্তন কৰিবলৈ অসম চৰকাৰ আৰু জাতীয় সংগঠনসমূহৰ মাজত চুক্তি স্বাক্ষৰিত হৈছিল। সেয়েহে উক্ত দিনটোতেই তিৱা মাথনলাই তখ্ৰাই পোন প্ৰথমবাৰৰ বাবে ভাষা দিৱস উদযাপন কৰি পৰৱৰ্তী সময়ত ৫ এপ্ৰিল তাৰিখটো ভাষা দিৱস হিচাপে উদযাপন কৰি থকাৰ সিদ্ধান্ত গ্ৰহণ কৰিছে বুলি তখ্ৰাৰ সাধাৰণ সম্পাদক ড০ বিদ্যুৎ বিকাশ সেনাপতিয়ে সংবাদ মাধ্যমক জনাই।

আজিৰ ভাষা দিৱসটিত পুৱা পতাকা উত্তোলন কৰা তখ্ৰাৰ কেন্দ্রীয় সভাপতি দীপেন্দ্র নাথ বৰদলৈয়ে, স্মৃতি তৰ্পন কৰে তখ্ৰাৰ উপ সভাপতি শৰৎ চন্দ্র পাটৰ আমচীয়ে । অনুষ্ঠানৰ লগত সংগতি ৰাখি সাধাৰণ সম্পাদক ড০ বিদ্যুৎ বিকাশ সেনাপতিৰ সম্পাদনাত প্ৰকাশিত ‘তিৱা মাত তিন’ শীৰ্ষক গ্ৰন্থখনিৰ উন্মোচন কৰে বিশিষ্ট তিৱা সাহিত্যিক তথা ভীমবৰ দেউৰী বঁটা প্ৰাপক মিলেশ্বৰ পাতৰে। অনুষ্ঠানৰ লগত সংগতি ৰাখি তিৱা ভাষাত কবিতা আৰু গল্প পাঠ, তিৱা গীত আৰু নৃত্য পৰিৱেশিত হয়। উক্ত অনুষ্ঠানত তখ্ৰাৰ উপ সভাপতি যোগেশ্বৰ বৰদলৈ, সাহিত্য অকাডেমি ভাষা সন্মান প্ৰাপক হৰচিং খলাৰ, তিৱা ৰাজ দৰবাৰৰ সভাপতি জুৰছিং বৰদলৈৰ লগতে তিৱা বিশিষ্ট কবি, সাহিত্যিক তথা তিৱা মাথনলাই তখ্ৰাৰ বিভিন্ন জিলা সমিতি সমূহৰ বিষয়ববীয়াসকল উপস্থিত থাকে।