কৃতি ছাত্ৰ-ছাত্ৰীক সম্বৰ্ধনা মেহেবুব মুক্তাৰৰ, গ্ৰাম্য বিদ্যালয়ৰ সফলতাত আনন্দৰ জোৱাৰ
সদ্য ঘোষিত হাইস্কুল শিক্ষান্ত পৰীক্ষাৰ ফলাফলত এশ শতাংশ উত্তীৰ্ণ হোৱাৰ গৌৰৱ অৰ্জন কৰি পুনৰবাৰ উজলিল ধিং সমষ্টিৰ অন্তৰ্গত ৰৌমাৰী-মৈৰাধ্বজ আল-আমিন জাতীয় বিদ্যালয়। পুৰ্বৰ ধাৰাবাহিকতা অক্ষুণ্ণ ৰাখি এইবেলিও বিদ্যালয়খনৰ শিক্ষাৰ্থীসকলে উল্লেখযোগ্য সফলতা অৰ্জন কৰিবলৈ সক্ষম হৈছে।জানিব পৰা অনুসৰি, ২০২৫-২৬ শিক্ষাবৰ্ষত বিদ্যালয়খনৰ পৰা সৰ্বমুঠ ১২ গৰাকী পৰীক্ষাৰ্থীয়ে হাইস্কুল শিক্ষান্ত পৰীক্ষাত অৱতীৰ্ণ হৈছিল। ইয়াৰে ৮ গৰাকী শিক্ষাৰ্থীয়ে লেটাৰ মাৰ্কসহ প্ৰথম বিভাগত উত্তীৰ্ণ হোৱাৰ বিপৰীতে অৱশিষ্ট ৪ গৰাকী শিক্ষাৰ্থীয়ে দ্বিতীয় বিভাগত সুখ্যাতিৰে উত্তীৰ্ণ হৈছে। লক্ষণীয় যে, এইবেলি বিদ্যালয়খনত তৃতীয় বিভাগত উত্তীৰ্ণ হোৱা শিক্ষাৰ্থীৰ সংখ্যা শূন্য। এই তথ্য বিদ্যালয়খনৰ অধ্যক্ষ আবুল কাচেমে সংবাদ মাধ্যমক অৱগত কৰে।
উল্লেখযোগ্য যে, পৰ্যাপ্ত আন্তঃগাঁথনি আৰু উন্নত যাতায়তৰ সুবিধা নথকাৰ পিছতো গ্ৰাম্যাঞ্চলৰ এই ব্যক্তিগত খণ্ডৰ বিদ্যালয়খনৰ এনে সাফল্যে সমগ্ৰ অঞ্চলটোত আনন্দৰ পৰিবেশ সৃষ্টি কৰিছে।
ইফালে, ৫৫ নং ধিং বিধানসভা সমষ্টিৰ বিৰোধী ঐক্য মঞ্চৰ উমৈহতীয়া প্ৰাৰ্থী মেহেবুব মুক্তাৰে ভোটগ্ৰহণ সম্পন্ন হোৱাৰ পাছতেই ঘোষিত ফলাফলৰ খবৰ ল’বলৈ আৰু শিক্ষাৰ্থীসকলক উৎসাহিত কৰিবলৈ সমষ্টিটোৰ
বিভিন্ন স্থানত উপস্থিত হোৱা দেখা গৈছে। ইয়াৰ অংশ হিচাপে তেওঁ আজি ৰৌমাৰী-মৈৰাধ্বজ আল-আমিন জাতীয় বিদ্যালয়তো উপস্থিত হয়।
বিদ্যালয় কৰ্তৃপক্ষই আয়োজন কৰা কৃতি ছাত্ৰ-ছাত্ৰীৰ সম্বৰ্ধনা অনুষ্ঠানত অংশগ্ৰহণ কৰি মেহেবুব মুক্তাৰে প্ৰতিগৰাকী উত্তীৰ্ণ শিক্ষাৰ্থীক ফুলাম গামোচাৰে সম্বৰ্ধনা জনোৱাৰ লগতে উপহাৰ হিচাপে কলম, মিঠাইৰ টোপোলা আৰু চকলেট প্ৰদান কৰে। লগতে তেওঁ বিদ্যালয়খনৰ আন্তঃগাঁথনিৰ বুজ লয় আৰু উন্নয়নৰ ক্ষেত্ৰত সহায়ৰ আশ্বাস প্ৰদান কৰে।
মেহেবুব মুক্তাৰৰ এই ইতিবাচক পদক্ষেপক বিদ্যালয় কৰ্তৃপক্ষ, স্থানীয় সচেতন মহল আৰু সাধাৰণ ৰাইজে ভুয়সী প্ৰশংসা কৰিছে। বিদ্যালয়খনৰ এই সাফল্য আৰু সমাজৰ সহযোগিতাই আগন্তুক দিনত অধিক উন্নত ফলাফলৰ পথ সুগম কৰিব বুলি আশা প্ৰকাশ কৰিছে সকলো সচেতন মহলে।
