সোমবাৰে গুৱাহাটী প্ৰেছ ক্লাবত অনুষ্ঠিত হয় সদৌ অসম অনুসূচীত জাতি ছাত্ৰ সন্থাৰ সংবাদমেল। সংবাদমেলত সংগঠনটোৱে মুখ্যমন্ত্ৰী হিমন্ত বিশ্ব শৰ্মা আৰু মন্ত্ৰী পীয়ুষ হাজৰিকাক ধন্যবাদ জ্ঞাপন কৰাৰ লগতে কংগ্ৰেছক কঠোৰ ভাষাৰে গৰিহণা দিয়ে। সংবাদমেলত সংগঠনটোৰ নেতৃবৃন্দই কংগ্ৰেছ চৰকাৰে অনুসূচিত জাতিৰ লোকক লাঞ্ছনা-বঞ্চনা কৰাৰ কথা কৈ তাৰ জলন্ত উদাহৰণ দি কয় যে, স্বাধীন ভাৰতৰ ৭৭ বছৰীয়া শাসনকালত কংগ্ৰেছ চৰকাৰে অনুসূচিত জাতিৰ লোকসকলক সংবিধানৰ প্ৰদত্ত অধিকাৰৰ পৰা বঞ্চিত কৰি ৰাখিছিল। ৰাজ্যৰ ১২৬টা বিধানসভা সমষ্টিৰ মাজত কেৱল ৮টা সমষ্টি অনুসূচিত জাতিৰ বাবে সংৰক্ষিত ৰখা হৈছিল বুলি তেওঁলোকে অভিযোগ উত্থাপিত কৰি সংবিধান সন্মত সংৰক্ষণ ব্যৱস্থা বাস্তৱায়ন কৰা নহ’ল বুলিও ক্ষোভ প্ৰকাশ কৰে।
আনহাতে, বৰ্তমানৰ চৰকাৰৰ দিনত ১২৬টা সমষ্টিৰ ৯টা সমষ্টি অনুসূচিত জাতিৰ বাবে সংৰক্ষণ কৰি উন্নীত কৰা হৈছে। এই পদক্ষেপক ঐতিহাসিক সিদ্ধান্ত বুলি আখ্যা দি সংগঠনটোৱে মুখ্যমন্ত্ৰী হিমন্ত বিশ্ব শৰ্মাৰ নেতৃত্ব আৰু মন্ত্ৰী পীয়ুষ হাজৰিকাৰ প্ৰশাসনিক দক্ষতাৰ ভূয়সী প্ৰশংসা কৰে। ইয়াৰ লগতে সংগঠনটোৱে উজান বজাৰৰ উদ্যানখন সতী ৰাধিকাৰ নামত বিশ্বমানৰ ৰূপে উন্নীত কৰি নিৰ্মাণ কৰা কাৰ্যক আদৰণি জনায়। চৰকাৰে অনুসূচিত জাতিৰ কল্যাণত গ্ৰহণ কৰা আঁচনি আৰু উন্নয়নমূলক পদক্ষেপসমূহক সংগঠনটোৱে ইতিবাচক পদক্ষেপ বুলি স্বীকাৰ কৰে। কিন্তু ইয়াৰ লগতে সংগঠনটোৱে কেইটামান সমস্যা শীঘ্ৰে সমাধানৰ দাবীও উত্থাপন কৰে। ইফালে সংবাদমেল যোগে সংগঠনটোৱে অহা ৰাজ্যসভা নিৰ্বাচনত এখন আসনত অনুসূচীত জাতিৰ এজন লোকক মনোনীত কৰিবলৈ প্ৰতিটো ৰাজনৈতিক দলক আহ্বান জনায়। সংবাদমেল খনত চৰকাৰে অনুসূচিত জাতিৰ বাবে কৰা উন্নয়ন মূলক কাম সমূহৰো শলাগ লয়।
