আকাশবাণী আৰু দূৰদৰ্শনৰ ‘এ গ্ৰেড’ৰ কণ্ঠশিল্পী জবা চক্ৰৱৰ্তীৰ নতুন গোৱালপৰীয়া ভিডিঅ’ এলবাম “মই সুন্দৰী ৰান্ধন জানং না” গুৱাহাটীৰ আমবাৰীস্থিত নিউ আৰ্ট প্লেয়াৰ্ছৰ প্ৰেক্ষাগৃহত অনুষ্ঠিত এক গাম্ভীৰ্যপূৰ্ণ অনুষ্ঠানৰ মাজেৰে উন্মোচন কৰা হয়। এছ.ডি. প্ৰডাকশ্যনৰ বেনাৰত নিৰ্মিত এই ভিডিঅ’ এলবামটিৰউন্মোচনী অনুষ্ঠানত বিশিষ্ট অতিথি হিচাপে উপস্থিত থাকেবিশিষ্ট সংগীত পৰিচালক তথা একৰ্ডিয়ান বাদক অনুপম চৌধুৰী,অসম চৰকাৰৰ ২০২৬ বৰ্ষৰ সন্মানীয় শিল্পী বঁটা প্ৰাপক তথা বিশিষ্ট লোকসংগীত শিল্পী ধনদা পাঠক, পদ্মশ্ৰী বঁটা প্ৰাপক তথা বিশিষ্ট সমাজকৰ্মী অজয় দত্ত আৰু প্ৰতিদিন টাইম’ৰ মুখ্য সম্পাদক তথা বিশিষ্ট সাংবাদিক নিতুমণি শইকীয়া আদি বিশিষ্ট ব্যক্তিসকল।
মঞ্চত এলবামটোৰ আনুষ্ঠানিক উন্মোচনী হৈ যোৱাৰ পিছতেই উপস্থিত বিশিষ্ট ব্যক্তিসকলে এলবামটোৰ ওপৰত আলোকপাত কৰি নিজ নিজ বক্তব্য আগবঢ়ায়।
বক্তব্য প্ৰসংগত অতিথিসকলে জবা চক্ৰৱৰ্তীৰ কণ্ঠৰ শলাগ লোৱাৰ লগতে গোৱালপৰীয়া লোকসংগীত সংৰক্ষণৰ ক্ষেত্ৰত তেওঁৰ এই প্ৰয়াসক ভূয়সী প্ৰসংশা আৰু আদৰণি জনায়। বিশেষকৈ লোকসংগীতৰ লগত আধুনিক দৃশ্য-শ্ৰব্য সংমিশ্ৰণ কৰি উপস্থাপন কৰা এই এলবামটো যুৱ প্ৰজন্মৰ বাবে বিশেষভাৱে আকৰ্ষণীয় হ’ব বুলি অতিথিসকলে মত পোষণ কৰে।
অনুষ্ঠানটোৰ শেষত গায়িকা জবা চক্ৰৱৰ্তীৰ জীয়াৰী অনন্যা দাসে অনুষ্ঠানটোৰ লগত ৰজিতাখুৱাই এটি সুন্দৰ গোৱালপৰীয়া লোক গীতেৰে উপস্থিত শ্ৰোতা দৰ্শকক মুগ্ধ কৰে।
উল্লেখ্য যে, শাস্ত্ৰীয় সংগীতত এম.মিউজ ডিগ্ৰীধাৰী আৰু ‘হৰাইজ’ন সংগীত শিৰোমণি বঁটা ২০২৩’ বিজয়ী জবা চক্ৰৱৰ্তীয়ে পূৰ্বেও আন্তঃৰাষ্ট্ৰীয় মঞ্চত সংগীত পৰিৱেশন কৰি অসমৰ লোক-সংস্কৃতিক প্ৰতিনিধিত্ব কৰিছে।
অভিনেত্ৰী মেলডি পাটগিৰিয়ে আঁত ধৰা আজিৰ এই অনুষ্ঠানত মহানগৰীৰ বহুকেইগৰাকী বিশিষ্ট ব্যক্তি, সাংস্কৃতিক কৰ্মী আৰু সংবাদ মাধ্যমৰ প্ৰতিনিধি উপস্থিত থাকে। শিল্পীগৰাকীয়ে তেওঁৰ এই নৱতম সৃষ্টিৰ বাবে সমূহ ৰাইজৰ আশীৰ্বাদ আৰু সহযোগিতা কামনা কৰিছে।
