গৌৰৱ গগৈ পাকিস্তান লৈ যোৱা বিষয়টোত চৰম অসন্তুষ্টি প্ৰকাশ জিন্টু গগৈৰ পৰিয়ালৰ
“এজন আহোম সম্প্ৰদায়ৰ ব্যক্তি হৈ চিৰবৈৰী ৰাষ্ট্ৰ পাকিস্তানলৈ যোৱাটো গ্ৰহণযোগ্য নহয়”
গৌৰৱ গগৈ পাকিস্তান লৈ গ’ল যেতিয়া তেওঁ আমাৰ শত্ৰু: জিন্টু গগৈৰ মাতৃ
যদি গৌৰৱ গগৈ সত্যৰ পক্ষত আছে, তেন্তে প্ৰকৃত সত্য প্ৰকাশ কৰিবলৈ ভয় কিয়?: মিলন বুঢ়াগোহাঁই
গৌৰৱ গগৈৰ পাকিস্তান ভ্ৰমণৰ অভিযোগক কেন্দ্ৰ কৰি ৰাজ্যত সৃষ্টি হৈছে তীব্ৰ প্ৰতিক্ৰিয়া। এই প্ৰসংগত খুমটাইৰ শ্বহীদ কেপ্তেইন জিন্টু গগৈৰ মাতৃয়ে গভীৰ অসন্তুষ্টি প্ৰকাশ কৰে।
তেওঁ কয় যে, “কোনো কাৰণতে শত্ৰু দেশ পাকিস্তানলৈ যোৱা উচিত নাছিল। গৌৰৱ গগৈৰ পাকিস্তান ভ্ৰমণৰ বিষয়টো ভাল পোৱা নাই। এজন আহোম সম্প্ৰদায়ৰ ব্যক্তি হৈ চিৰবৈৰী ৰাষ্ট্ৰ পাকিস্তানলৈ যোৱাটো গ্ৰহণযোগ্য নহয়। গৌৰৱ গগৈ পাকিস্তানলৈ গ’ল যেতিয়া তেওঁ আমাৰ শত্ৰু,” বুলি মন্তব্য কৰে জিন্টু গগৈৰ মাতৃয়ে। লগতে, গৌৰৱ গগৈৰ পাকিস্তান ভ্ৰমণক কঠোৰ ভাষাৰে সমালোচনা কৰে কাৰ্গিলৰ শ্বহীদ জিণ্টু গগৈৰ পিতৃ আৰু ভাতৃয়েও। ইফালে, সদৌ টাই আহোম ছাত্ৰ সন্থাই ও বিষয়টোক ল তীব্ৰ প্ৰতিক্ৰিয়া প্ৰকাশ কৰিছে। আটাছুৰ সভাপতি মিলন বুঢ়াগোহাঁইয়ে গৌৰৱ গগৈক সমগ্ৰ বিষয় সন্দৰ্ভত শীঘ্ৰেই স্পষ্ট স্থিতি প্ৰকাশ কৰাৰ আহ্বান জনায়। তেওঁ কয় যে, আহোম জনগোষ্ঠীয়ে গৌৰৱ গগৈক লৈ সদায় গৌৰৱ কৰে। কিন্তু চিৰবৈৰী পাকিস্তানৰ সৈতে সম্ভাৱ্য সম্পৰ্কৰ অভিযোগ উত্থাপন হোৱাত সমগ্ৰ সমাজ ক্ষুন্ন হৈছে। লগতে, গৌৰৱ গগৈয়ে সংবাদমেলত দিয়া প্ৰত্যুত্তৰ সন্দৰ্ভত মন্তব্য কৰি মিলন বুঢ়াগোহাঁইয়ে কয় যে, উক্ত বক্তব্যত স্পষ্টতা পৰিলক্ষিত হোৱা নাই। “যদি তেওঁ সত্যৰ পক্ষত আছে, তেন্তে প্ৰকৃত সত্য প্ৰকাশ কৰিবলৈ ভয় কিয়?” বুলি প্ৰশ্ন উত্থাপন কৰে তেওঁ। আৰু অতি শীঘ্ৰে স্পষ্ট ব্যাখ্যা আগবঢ়োৱা নহ’লে উত্থাপিত অভিযোগসমূহ সত্য বুলি গণ্য হ’ব পাৰে বুলিও তেওঁ সতৰ্ক কৰে। অনাগত দিনত পাকিস্তানৰ নাগৰিকত্ব গ্ৰহণৰ দৰে সন্দেহো উত্থাপন হ’ব পাৰে বুলি তেওঁ মন্তব্য কৰে। আনহাতে, শ্বহীদ জিন্টু গগৈৰ পিতৃ-মাতৃয়ে সমগ্ৰ ঘটনাক লৈ দুখ প্ৰকাশ কৰি কয় যে, এনে স্পৰ্শকাতৰ বিষয়ত ৰাজনীতি কৰা অনুচিত। বিষয়টো যাতে কোনো পক্ষই ৰাজনৈতিক স্বাৰ্থত ব্যৱহাৰ নকৰে, তাৰ বাবে সকলোকে সংযম আৰু দায়িত্বশীলতা অবলম্বন কৰিবলৈ তেওঁলোকে আহ্বান জনায়।
