পশ্চিম এছিয়াত ক্ৰমাৎ বৃদ্ধি পোৱা সংঘাতৰ বাবে ভাৰতীয় মুদ্ৰাই পুনৰ ডাঙৰ আঘাতৰ সন্মুখীন হৈছে৷ শুকুৰবাৰে প্ৰথমবাৰৰ বাবে ডলাৰৰ বিপৰীতে ৯৩ টকাৰ সীমা অতিক্ৰম কৰি অভিলেখ সৃষ্টি কৰিছে৷ বজাৰ খোলাৰ কেইমিনিটমানৰ ভিতৰতে টকাৰ মূল্য পতন হৈ প্ৰায় ৯৩.১৫ত উপনীত হয়৷ বিশেষজ্ঞসকলৰ মতে এই পতনৰ আঁৰৰ মূল কাৰণ হৈছে আন্তঃৰাষ্ট্ৰীয় বজাৰত খাৰুৱা তেলৰ মূল্য বৃদ্ধি আৰু পশ্চিম এছিয়াত অস্থিৰতা৷ ব্ৰেণ্ট খাৰুৱা তেলৰ মূল্য প্ৰতি বেৰেলত ১০০ ডলাৰৰ ওপৰত, যিটো ভাৰতৰ দৰে তেল আমদানি নিৰ্ভৰশীল দেশৰ বাবে এক ডাঙৰ চিন্তাৰ বিষয়৷ অৰ্থনীতিবিদসকলে অনুমান কৰিছে যে যদি খাৰুৱা তেলৰ মূল্য ১ ডলাৰ বৃদ্ধি পায় তেন্তে ভাৰতৰ আমদানি ব্যয় প্ৰায় ১৬ হাজাৰ কোটি টকা বৃদ্ধি পায়৷ তেলৰ দাম বাঢ়িলে দেশৰ আমদানি ব্যয় বাঢ়ি যায়৷ ফলত ডলাৰৰ চাহিদা বাঢ়ি যায়, যাৰ ফলত টকাত পোনপটীয়াকৈ চাপ পৰে৷ একে সময়তে ইন্ধনৰ ব্যয় বৃদ্ধিৰ বাবে সামগ্ৰিকভাৱে মূল্যবৃদ্ধিৰ আশংকাও বৃদ্ধি পাইছে৷ কেৱল তেলৰ মূল্যই নহয়, আন্তঃৰাষ্ট্ৰীয় বিনিয়োগকাৰীৰ মনোভাৱেও এই পতনত গুৰুত্বপূৰ্ণ ভূমিকা পালন কৰিছে৷ বিশ্বজুৰি অনি(য়তা বৃদ্ধি পোৱাৰ লগে লগে বিনিয়োগকাৰীসকলে নিৰাপদ সম্পদৰ পিনে মুখ কৰিছে৷
ফলত মাৰ্কিন ডলাৰৰ চাহিদা বাঢ়িছে, যাৰ ফলত টকাৰ দৰে উদীয়মান অৰ্থনীতিৰ মুদ্ৰা দুৰ্বল হৈ পৰিছে৷ ইয়াৰ উপৰি বিদেশী প্ৰতিষ্ঠানিক বিনিয়োগকাৰীসকলেও ভাৰতীয় শ্বেয়াৰ বজাৰৰ পৰা ধন উলিয়াই নিবলৈ ধৰিছে৷ ইয়াৰ ফলত টকাক ডলাৰলৈ ৰূপান্তৰিত কৰাৰ প্ৰৱণতা বাঢ়িছে, যাৰ ফলত মুদ্ৰাৰ ওপৰত অধিক চাপ পৰিছে৷ আমেৰিকাৰ ফেডাৰেল ৰিজাৰ্ভৰ নীতিয়েও এই পৰিস্থিতিত প্ৰভাৱ পেলাইছে৷ সুতৰ হাৰ হ্ৰাস কৰাৰ ক্ষেত্ৰত সতৰ্ক স্থিতিৰ বাবে ডলাৰ শক্তিশালী হৈছে৷ ফলত বিশ্বৰ বজাৰত ইয়াৰ প্ৰভাৱ পৰিছে৷ এই পৰিস্থিতিৰ প্ৰভাৱ কেৱল বৈদেশিক মুদ্ৰাৰ বজাৰতে সীমাবদ্ধ নহয়৷ টকাৰ হ্ৰাস আৰু তেলৰ মূল্যবৃদ্ধিৰ ফলত দেশত আমদানি নিৰ্ভৰশীল সামগ্ৰীৰ ব্যয় বৃদ্ধি পাব পাৰে৷ ইয়াৰ ফলত ব্যৱসায়ী আৰু সাধাৰণ মানুহৰ ব্যয় বৃদ্ধিৰ আশংকাও সৃষ্টি হৈছে৷
প্ৰসংগক্ৰমে চলিত মাহৰ আৰম্ভণিতে ভাৰতীয় মুদ্ৰাই ডলাৰৰ বিপৰীতে ৯২ টকা অতিক্ৰম কৰি অভিলেখ সৃষ্টি কৰিছিল৷ এতিয়া বজাৰে আৰব বিশ্বৰ পৰিস্থিতি, তেলৰ মূল্যৰ উঠা-নমা আৰু ভাৰতীয় ৰিজাৰ্ভ বেংকৰ সম্ভাব্য পদক্ষেপৰ ওপৰত চকু ৰাখিব৷ পৰিস্থিতি নিয়ন্ত্ৰণৰ বাবে ৰিজাৰ্ভ বেংকে হস্তক্ষেপ কৰে নে নকৰে সেয়াও অনাগত দিনত গুৰুত্বপূৰ্ণ হ’ব৷
