কাৰ্বি আংলং জিলাত অমানৱীয় আৰু হৃদয়বিদাৰক এক হত্যাকাণ্ড সংঘটিত হৈছে। ডাইনী সন্দেহত গাঁওবাসীয়ে এটা দম্পতিক জীয়ন্তে জ্বলাই হত্যা কৰাৰ অভিযোগ উত্থাপন হৈছে। এই ভয়ংকৰ ঘটনাটো ৩০ ডিচেম্বৰৰ নিশা জিলাখনৰ হাওৰাঘাট আৰক্ষী চকীৰ অন্তৰ্গত ১ নং বেলোগুৰি মুণ্ডা গাঁৱত সংঘটিত হয়।
আৰক্ষী সূত্ৰে জনোৱা মতে, গাঁওখনৰ একাংশ লোকে ডাইনী চৰ্চাৰ সন্দেহত দম্পতিটোক লক্ষ্য কৰি প্ৰথমে আক্ৰমণ কৰে। অভিযোগ অনুসৰি, দুয়োকে ঘৰৰ ভিতৰত চোকা অস্ত্ৰৰে আঘাত কৰাৰ পিছত ঘৰত অগ্নিসংযোগ কৰা হয়। ফলত দম্পতিটো জীয়ন্তে জ্বলি মৃত্যু হয়।
নিহত দুগৰাকীৰ নাম গাৰ্ডি বিৰোৱা (৪৩) আৰু মীৰা বিৰোৱা (৩৩)। স্থানীয় লোকে অভিযোগ কৰে যে, অঞ্চলটোত কোনো অঘটন ঘটিলেই একাংশ লোক ডাইনী সন্দেহত নিৰীহ মানুহক লক্ষ্য কৰি লয়, যাৰ ফলত এনে ভয়ংকৰ ঘটনা সংঘটিত হয়।
ঘটনাৰ খবৰ পোৱাৰ লগে লগে আৰক্ষী আৰু প্ৰশাসনৰ উচ্চপদস্থ বিষয়াসকল ঘটনাস্থলীত উপস্থিত হৈ পৰিস্থিতি নিয়ন্ত্ৰণ কৰে। এলেকাটোত অতিৰিক্ত আৰক্ষী বাহিনী মোতায়েন কৰা হৈছে আৰু জড়িতসকলক চিনাক্ত কৰি গ্ৰেপ্তাৰৰ অভিযান আৰম্ভ কৰা হৈছে।
এজন আৰক্ষী বিষয়াই কয়, “অন্ধবিশ্বাস আৰু কুসংস্কাৰৰ বাবে আজিও এনেধৰণৰ নৃশংস ঘটনা সংঘটিত হৈ আছে। সমাজত সজাগতা বৃদ্ধি নোহোৱা পৰ্যন্ত এই সমস্যা শেষ নহ’ব।” তেওঁ লগতে কয় যে, ঘটনাটোৰ সৈতে জড়িত সকলো অভিযুক্তৰ বিৰুদ্ধে ভাৰতীয় ন্যায় সংহিতাৰ প্ৰাসংগিক ধাৰাৰ লগতে অসম ডাইনী হত্যা (নিষেধ, প্ৰতিৰোধ আৰু সুৰক্ষা) আইনৰ অধীনত কঠোৰ ব্যৱস্থা গ্ৰহণ কৰা হ’ব।
এই নৃশংস ঘটনাই পুনৰ এবাৰ সমাজত অন্ধবিশ্বাসৰ ভয়াবহ পৰিণতি উন্মোচন কৰিছে। প্ৰশাসনৰ লগতে সচেতন মহলে এনে কাণ্ডৰ বিৰুদ্ধে কঠোৰ ব্যৱস্থা আৰু জনসচেতনতা বৃদ্ধিৰ দাবী জনাইছে।
