‘লেখিকা সংস্থা অসম’ৰ নগাঁও জিলাৰ অন্যতম কলংপাৰ শাখাৰ অষ্টম দ্বি-বাৰ্ষিক অধিবেশনখনি দুদিনীয়া কাৰ্যসূচীৰে যোৱা শনি আৰু দেওবাৰে নগাঁৱৰ চকৰিগাঁও মজলীয়া বিদ্যালয়ত অনুষ্ঠিত হৈ যায়।অধিবেশনৰ প্ৰথম দিনা বিয়লি শাখাৰ এখনি বিষয় বাচনি সভা অনুষ্ঠিত হয়। দ্বিতীয় দিনা পুৱা সংস্থাৰ পতাকা উত্তোলনেৰে দিনটোৰ কাৰ্যসূচী মুকলি কৰে শাখাৰ সভানেত্ৰী অৰুণিমা বৰাই আৰু স্মৃতি তৰ্পণ কাৰ্যসূচী মুকলি কৰে কাৰ্যকৰী সভানেত্ৰী তৰামাই বৰাই। ইয়াৰ পিছতে ল’ৰা-ছোৱালীৰ মাজত চিত্ৰাংকণ, বানান লিখা, আকস্মিক বক্তৃতা আদি প্ৰতিযোগিতা অনুষ্ঠিত হয়। বিয়লি সংস্থাৰ সভানেত্ৰী অৰুণিমা বৰাৰ পৌৰোহিত্যত এখনি মুকলি সভা অনুষ্ঠিত হয়। সভাত নিৰ্দিষ্ট বক্তা হিচাপে অংশগ্ৰহণ কৰা ডিমৰীয়া মহাবিদ্যালয়ৰ অৱসৰপ্ৰাপ্ত অধ্যাপক, বিশিষ্ট লেখক মোহিনী মোহন ডেকাই ভাষণ প্ৰসংগত এগৰাকী বিখ্যাত লোকৰ উদ্ধৃতি দি কয় যে মোক এখন ভাল কিতাপ দিয়া, মই সেই জাতিটোৰ বিষয়ে কৈ দিম। অৰ্থাৎ লেখনিৰ মাজেৰে আমি সমসাময়িক সমাজখনৰ বিষয়ে জানিব পাৰো।
তেওঁ প্ৰসংগক্ৰমে ‘সম্বৰ্ধনা’, ‘অভিনন্দন’ আৰু ‘আদৰণি’ শব্দৰ অৰ্থ আৰু এইসমূহৰ প্ৰয়োগ সম্পৰ্কত ব্যাখ্যা আগবঢ়াই বহু লোকে এই শব্দসমূহৰ সঠিক ৰূপত প্ৰয়োগ নকৰা বুলি আক্ষেপ প্ৰকাশ কৰে। বিশিষ্ট শিক্ষাবিদগৰাকীয়ে ভাষণ প্ৰসংগত কলংপাৰ লেখিকা সংস্থাৰ কৰ্মৰাজিৰ প্ৰশংসা কৰি লেখিকাসকলক গল্প, প্ৰবন্ধ, কবিতা আদি লিখাৰ লগতে সমসাময়িক বিষয়বস্তু সম্পৰ্কতো লিখিবলৈ আহ্বান জনায়। নৱমল্লিকা কাশ্যপে এটি বৰগীত পৰিৱেশনেৰে আৰম্ভ কৰা এই সভাত শাখাৰ মুখপত্ৰ ‘প্ৰাঞ্জলি’ উন্মোচন কৰি লেখিকা সংস্থা অসমৰ সাংগঠনিক সম্পাদিকা তথা নগাঁও শাখা লেখিকা সংস্থাৰ উপ-সভানেত্ৰী, গল্পকাৰ পূৰৱী চক্ৰৱৰ্তী সূতে কয় যে লেখিকা হোৱাৰ আগতে আমি পাঠিকা হোৱা উচিত। অগ্ৰজসকলৰ লেখাসমূহ অধ্যয়ন কৰিলে আমাৰ জ্ঞানৰ পৰিসৰ বৃদ্ধি হোৱাৰ লগতে শব্দ ভাণ্ডাৰ চহকী হ’ব। তেওঁ লগতে ছাত্ৰ-ছাত্ৰী আৰু অভিভাৱকসকলক বানানৰ ওপৰত গুৰুত্ব দিবলৈ আহ্বান জনায়।
সভাত বিশিষ্ট শিশু-সাহিত্যিক কাৰুণ্য ভট্টাচাৰ্য্যই বৰ্ষীয়ান লেখিকা কিৰণ শৰ্মা খাউণ্ডৰ সাধু কিতাপ ‘সাধুৰ ৰহঘৰা’ আৰু লেখিকা প্ৰহেলিকা কৌশিকৰ কবিতাপুথি ‘কেনভাচত তোমাৰ ছবি’ উন্মোচন কৰি দুয়োখন কিতাপৰ সম্পৰ্কত ব্যাখ্যা আগবঢ়ায়। সমবেত কণ্ঠত কলংপাৰ লেখিকা সংস্থাৰ এটি প্ৰতীকী গীত পৰিৱেশনেৰে সজীৱ কৰি তোলা এই সভাতে চকৰিগাঁও মজলীয়া বিদ্যালয়ৰ প্ৰধান শিক্ষয়িত্ৰী বিউতি বৰা, সমজুৱাৰ ফালৰ পৰা প্ৰাক্তন অধ্যক্ষা ৰিন্টু দাস, বিশিষ্ট লেখক-শিল্পী গোলাপ বৰা, বিশিষ্ট লেখক-কবি অনিল কুমাৰ শৰ্মা, কুমুদ চন্দ্ৰ বৰা আদিয়েও বক্তব্য প্ৰদান কৰে। কলংপাৰ লেখিকা সংস্থাৰ সম্পাদিকা তুলু হাজৰিকাই উদ্দেশ্য ব্যাখ্যাৰ লগতে সামগ্ৰিক ভাৱে আঁত ধৰা এই সভাতে অঞ্চলৰ কৃতী শিক্ষাৰ্থীসকলক অভিনন্দন জ্ঞাপনৰ লগতে প্ৰতিযোগিতাসমূহৰ পুৰস্কাৰ প্ৰদান কৰা হয়।
শতাধিক সাহিত্যানুৰাগীৰ উপস্থিতিত অনুষ্ঠিত এই সভাতে তৰামাই বৰাক ‘নীৰৱ কৰ্মী’ সন্মানেৰে বিশেষভাবে সম্বৰ্ধনা জনোৱা হয়। অৱসৰপ্ৰাপ্ত প্ৰধান শিক্ষকদ্বয় কাতিৰাম বৰা, থুলেশ্বৰ বৰা, সংস্থাৰ জ্যেষ্ঠ সদস্য ক্ৰমে তগৰ গোস্বামী, বৈজয়ন্তী খাউণ্ড, ফুনু বৰা, স্বৰ্ণলতা দেৱী, ৰিনা ভূঞা, মিনু শইকীয়া আদিক সম্বৰ্ধনা জনোৱা হয়। সভাৰ শলাগৰ শৰাই আগবঢ়ায় প্ৰহেলিকা কৌশিকে। উল্লেখ্য যে অধিবেশনৰ প্ৰথম দিনা অনুষ্ঠিত বিষয় বাচনি সভাত আগন্তুক কাৰ্যকালৰ বাবে অৰুণিমা বৰাক সভানেত্ৰী, অমিয়া গোস্বামীক কাৰ্যকৰী সভানেত্ৰী, তুলু হাজৰিকাক সম্পাদিকা হিচাপে লৈ এখন নতুন সমিতি গঠন কৰা হয়।
