বাংলাদেশত সংঘটিত হিন্দু নিৰ্যাতনৰ জঘন্য ঘটনাক সামাজিক মাধ্যমত সমৰ্থন কৰা অভিযোগত অসম আৰক্ষীয়ে ৰঙিয়াৰ পৰা এজন যুৱকক আটক কৰিছে। জানিব পৰা মতে, অভিযুক্ত যুৱকজনে সামাজিক মাধ্যমত বিতৰ্কিত আৰু সংবেদনশীল পোষ্ট প্ৰচাৰ কৰিছিল, যাৰ পাছতে আৰক্ষীয়ে তৎক্ষণাৎ ব্যৱস্থা গ্ৰহণ কৰে।
বাংলাদেশত হিন্দু সম্প্ৰদায়ৰ ওপৰত সংঘটিত নৃশংস ঘটনাসমূহে সমগ্ৰ বিশ্বক জোকাৰি গৈছে। মানৱতাক লজ্জিত কৰা এনে ঘটনাৰ পাছতো একাংশ লোকে ইয়াক সমৰ্থন কৰা দেখা গৈছে। শেহতীয়াকৈ এই ঘটনাক সমৰ্থন জনোৱা অভিযোগত ৰঙিয়াৰ পৰা এজন যুৱক আটক হোৱাই নতুন বিতৰ্কৰ সৃষ্টি কৰিছে।
অভিযুক্ত যুৱকজন ৰঙিয়াৰ ৩নং ৱাৰ্ডৰ বাসিন্দা মহম্মদ শ্বেইখ আখতাৰ আলী বুলি আৰক্ষীয়ে চিনাক্ত কৰিছে। তথ্য অনুসৰি, “BOLLO CHAIWALA” নামৰ এটা ইনষ্টাগ্ৰাম একাউণ্টৰ জৰিয়তে বাংলাদেশৰ হিন্দু হত্যাকাণ্ড সন্দৰ্ভত এটা বিতৰ্কিত ভিডিঅ’ প্ৰচাৰ কৰা হৈছিল। ভিডিঅ’টো মুহূৰ্তৰ ভিতৰতে ভাইৰেল হৈ পৰে।
ভাইৰেল হোৱা ভিডিঅ’টোত অভিযুক্ত যুৱকজনক বাংলাদেশত সংঘটিত হিন্দু হত্যাকাণ্ডৰ ভিডিঅ’ চাই প্ৰশংসাসূচক মন্তব্য কৰা দেখা গৈছিল। ভিডিঅ’টো যথেষ্ট সংবেদনশীল আছিল আৰু ইয়াৰ ফলত সমাজত অশান্তি সৃষ্টি হোৱাৰ আশংকা আছিল বুলি আৰক্ষীয়ে জানিবলৈ দিয়ে।
আইন-শৃংখলা পৰিস্থিতি অবনতি হোৱাৰ সম্ভাৱনা লক্ষ্য কৰি আৰক্ষীয়ে লগে লগে অভিযুক্ত যুৱকজনক আটক কৰি তদন্ত আৰম্ভ কৰে। বৰ্তমান আৰক্ষীয়ে সংশ্লিষ্ট ভিডিঅ’টো, সামাজিক মাধ্যমৰ একাউণ্টসমূহ আৰু আন দিশসমূহ পৰীক্ষা কৰি আছে। তদন্ত সম্পূৰ্ণ হোৱাৰ পাছত আইনী ব্যৱস্থা গ্ৰহণ কৰা হ’ব বুলি আৰক্ষীয়ে স্পষ্ট কৰিছে।
ইফালে, আৰক্ষীয়ে সাধাৰণ জনতাক সংযম অৱলম্বন কৰিবলৈ আহ্বান জনাইছে আৰু সাম্প্ৰদায়িক সম্প্ৰীতি বিঘ্নিত কৰিব পৰা কোনো ধৰণৰ বিষয়বস্তু সামাজিক মাধ্যমত শ্বেয়াৰ বা প্ৰচাৰ নকৰিবলৈ অনুৰোধ জনাইছে।
উল্লেখ্য যে, কিছুদিন পূৰ্বে বাংলাদেশত সংঘটিত এটা নৃশংস ঘটনাই ব্যাপক প্ৰতিক্ৰিয়াৰ সৃষ্টি কৰিছিল। সেই ঘটনাত এজন হিন্দু যুৱকক গছত বান্ধি জ্বলাই দিয়াৰ অভিযোগ উঠিছিল। এই ঘটনাই কেৱল বাংলাদেশতেই নহয়, ভাৰততো তীব্ৰ প্ৰতিক্ৰিয়া সৃষ্টি কৰিছিল। ভাৰত চৰকাৰেও ঘটনাটোৰ ওপৰত উদ্বেগ প্ৰকাশ কৰিছিল।
বিশ্লেষকসকলৰ মতে, বাংলাদেশত সংখ্যালঘু হিন্দুসকলৰ ওপৰত অত্যাচাৰৰ ঘটনা নতুন নহয় আৰু শেহতীয়া ৰাজনৈতিক অস্থিৰতাৰ পাছত এনে ঘটনা অধিক বৃদ্ধি পাইছে। এনে পৰিস্থিতিতো ভাৰতৰ ভিতৰত কিছুমান লোকে এইধৰণৰ নৃশংসতাক সমৰ্থন কৰা মানসিকতাই সমাজৰ বাবে গভীৰ উদ্বেগৰ কাৰণ হৈ পৰিছে।
