ৰাজ্যত এতিয়া বলিছে নিৰ্বাচনৰ গৰম বতাহ৷ নেতা-পালিনেতা ব্যস্ত নিৰ্বাচনী প্ৰচাৰত৷ ইয়াৰ মাজতে মধ্য প্ৰাচ্যৰ যুদ্ধৰ অচিলালৈ অসমত ৰন্ধন গেছৰ তীব্ৰ নাটনি হোৱাৰ আশংকা প্ৰকাশ কৰিছে বহু গ্ৰাহকে৷ চৰকাৰে যদিও ৰাজ্যত ৰন্ধন গেছৰ কোনো নাটনি হোৱা নাই বুলি কৈ আছে তথাপি বহু গ্ৰাহকে এইবুলি অভিযোগ কৰিছে যে তেওঁলোকে বুকিং কৰাৰ পিছতো গেছ চিলিণ্ডাৰৰ বাবে বহুদিন অপেক্ষা কৰিবলগীয়া হৈছে৷ ৰাজ্যত গেছৰ নাটনি হ’ব পাৰে বুলি বিভিন্ন মহলত চৰ্চা হৈ থকাৰ বাবেই বহু গ্ৰাহকে এতিয়া পুৱাৰে পৰা গেছ এজেন্সীৰ বাহিৰত শাৰী পতা পৰিলক্ষিত হৈছে৷ চৰকাৰে গেছৰ নাটনিৰ বিষয়ত প্ৰচাৰিত উৰা বাতৰিত বিশ্বাস নকৰিবলৈ বাৰে বাৰে কৈ আহিছে যদিও সাধাৰণ গ্ৰাহক যেন এই কথাত সম্পূৰ্ণৰূপে পতিয়ন যােবে পৰা নাই৷ ইপিনে এনে পৰিবেশৰ সুবিধা গ্ৰহণ কৰিছে একাংশ অসাধু লোকে৷ এইচাম লোকে গেছ চিলিণ্ডাৰ অবৈধভাবে মজুত কৰাৰ অভিযোগ উঠিছে৷
ইয়াৰ মাজতে চৰকাৰে এনে বহু চিলিণ্ডাৰ জব্দও কৰিছে৷ ইপিনে ৰাজ্যত গেছ চিলিণ্ডাৰৰ কোনো নাটনি হোৱা নাই বুলি পুনৰ দৃঢ়তাৰে কৈছে কেন্দ্ৰীয় চৰকাৰে৷ অসমত ঘৰুৱা এল পি জিৰ যোগান সুস্থিৰ আৰু পৰ্যাপ্ত হৈ আছে৷ সম্প্ৰতি চলি থকা ভূ-ৰাজনৈতিক সংকটে বিশ্বৰ শক্তিৰ বজাৰত প্ৰভাৱ পেলোৱাৰ পিছতো অসমত নিৰৱচ্ছিন্ন সৰবৰাহ নিশ্চিত কৰা হৈছে৷ ইণ্ডিয়ান অইল, ভাৰত পেট্ৰলিয়াম আৰু হিন্দুস্তান পেট্ৰলিয়ামৰ দৰে তেল বিপণন কোম্পানীসমূহে ঘৰুৱা এল পি জিৰ যোগানক সৰ্বোচ্ছ অগ্ৰাধিকাৰ দি আহিছে আৰু সমগ্ৰ ৰাজ্যজুৰি গ্ৰাহকৰ বাবে নিৰৱচ্ছিন্ন উপলব্ধতা নিশ্চিত কৰিবলৈ বিতৰণ ব্যৱস্থাটোক তীক্ষ্ণভাৱে নিৰীক্ষণ কৰি থকা হৈছে৷ বৰ্তমান ইণ্ডিয়ান অইলে অসমত দৈনিক প্ৰায় ৰ লাখ এল পি জি চিলিণ্ডাৰ যোগান ধৰিছে, যাৰ ফলত ঘৰুৱা পৰিয়াললৈ নিয়মীয়া আৰু সময়মতে যোগান নিশ্চিত কৰিব পৰা গৈছে৷ ৰাজ্যখনে ডিজিটেল সুবিধাৰ দিশত এক শক্তিশালী পৰিৱৰ্তনৰ সাক্ষী হৈছে৷ এতিয়া প্ৰায় ৮০ণ এলপিজি ৰিফিল বুকিং ডিজিটেল প্লেটফৰ্মৰ জৰিয়তে লাভ কৰা হৈছে, যিয়ে এল পি জিৰ যোগান সুশৃংখলিত কৰাত আৰু গ্ৰাহকৰ সন্তুষ্টি বৃদ্ধি কৰাত সহায় কৰিছে৷
চিলিণ্ডাৰসমূহে নিশ্টিতভাবে হিতাধিকাৰীসকলৰ ওচৰলৈ যোৱাটো নিশ্চিত কৰিবলৈ ডেলিভাৰী প্ৰমাণীকৰণ ক’ড [ডিএচি অ’টিপি] ব্যৱহাৰ কৰি যোগান অব্যাহত ৰখা হৈছে৷ ক’লা ব্যৱসায় , অবৈধ মজুতকৰণ আৰু অন্যান্য অসৎ কাৰ্য ৰোধ কৰিবলৈ ইণ্ডিয়ান অইল আৰু অন্যান্য অ’এমচিয়ে অসম চৰকাৰৰ সৈতে ঘনিষ্ঠভাৱে কাম কৰি থকাৰ লগতে কঠোৰ নিৰীক্ষণ তথা অভিযান অব্যাহত ৰাখিছে৷ ৰাজ্য চৰকাৰৰ সহযোগত ইণ্ডিয়ান অইলে অসমত এল পি জি বিতৰকত ৭০০ৰো অধিক পৰিদৰ্শন কৰাৰ বিপৰীতে অ’এমচিৰ জৰিয়তে সমগ্ৰীকভাবে ১৫০০ৰো অধিক পৰিদৰ্শন কৰা হৈছে৷ এই পৰিদৰ্শনৰ ভিত্তিত স্বচ্ছতা তথা গ্ৰাহক সুৰক্ষাৰ প্ৰতি দায়বদ্ধতাৰ দিশটোক পুনৰ দৃঢ় কৰি অ’এমচি ভিত্তিত প্ৰায় ১৮ টা এলপিজি বিতৰকৰ বিৰুদ্ধে ব্যৱস্থা গ্ৰহণ কৰা হৈছে৷ ৰাজ্যিক পৰ্যায়ত গ্ৰহণ কৰা এনে প্ৰচেষ্টাসমূহ হৈছে যোগানৰ স্থিতিশীলতা বজাই ৰখা আৰু বলৱৎকৰণৰ ব্যৱস্থাক শক্তিশালী কৰাৰ বাবে দেশজুৰি চলাই থকা অভিযানৰ এক অংশ৷
সমগ্ৰ দেশতে ইণ্ডিয়ান অইলে দৈনিক প্ৰায় ২৮ লাখ এলপিজি চিলিণ্ডাৰ যোগান ধৰিছে, আনহাতে অ’এমচি আৰু ৰাজ্য চৰকাৰে ৬৮ হাজাৰৰো অধিক অভিযান চলাইছে, ৮৫৫খন এজাহাৰ পঞ্জীয়ন কৰা হৈছে আৰু অবাধ মজুতকৰণ ৰোধ কৰি ন্যায্য বিতৰণ নিশ্চিত কৰিবলৈ ৪৮ হাজাৰতকৈ অধিক চিলিণ্ডাৰ জব্দ কৰা হৈছে৷ অসমৰ গ্ৰাহকসকলক নিশ্চিত কৰা হৈছে যে ৰাজ্যখনত এল পি জিৰ যোগান পৰ্যাপ্ত হৈয়েই আছে আৰু এল পি জিৰ অভাৱ হোৱা নাই৷ গ্ৰাহকসকলক ডিজিটেল বুকিং মোড ব্যৱহাৰ কৰিলৈ, আতংকিত হৈ বুকিং কৰা বা ষ্টকিংমজুত কৰা এৰাই চলিবলৈ তথা কেৱল চৰকাৰী তথ্যৰ উৎসৰ তথ্যৰ ওপৰত নিৰ্ভৰ কৰিবলৈ উৎসাহিত কৰা হৈছে৷
