শৰাইঘাট দলঙৰ দক্ষিণ দিশৰ ৬নং কলনীৰ পৰা জালুকবাৰীলৈ পূৰ্বতে সংৰক্ষিত কৰি ৰখা আৰু পৰৱৰ্তী সময়ত বেদখলৰ কৱলত পৰা ৰে’ল বিভাগৰ প্ৰায় ৫০০ বিঘা মাটি দ্বিতীয়খন ৰে’ল-পথ দলং নিৰ্মাণৰ বাবে মুকলি কৰাৰ কাম আৰম্ভ কৰিছে উত্তৰ-পূব ৰে’লৱে কতৃৰ্পক্ষই৷ ইয়াৰ অংশ হিচাপে কামৰূপ মহানগৰ জিলা প্ৰশাসন আৰু মহানগৰ আৰক্ষীৰ সহযোগত ৰে’লৱে কতৃৰ্পক্ষই আজি দিনৰ ভাগত জালুকবাৰী অঞ্চলত এক বৃহৎ উচ্ছেদ অভিযান চলায়৷ আজি প্ৰথম দিনাৰ উচ্ছেদ অভিযানত ৫০ বিঘাৰো অধিক ৰে’লৱেৰ মাটি বেদখলমুক্ত কৰা হয়৷
অভিযোগ মতে একাংশ অসাধু প্ৰকৃতিৰ লোকে ৰে’লৱেৰ মাটি বেদখল কৰি সন্দেহজনক বাংলাদেশী মূলৰ লোকক ঘৰ সাজি ভাৰালৈ দিছিল৷ পূৰ্বতেও কেইবাবাৰো জালুকবাৰীত ৰে’লৱে বিভাগে উচ্ছেদ অভিযান চলাইছিল যদিও একাংশ বিশেষ সম্প্ৰদায়ৰ লোকে ৰাতিৰ ভিতৰত পুনৰ নিৰ্মাণ কৰি তোলে জুপুৰি ঘৰসমূহ৷ যাৰ ফলত শুকুৰবাৰে প্ৰায় ৫৩ বিঘা মাটিত প্ৰশাসনৰ সহযোগত জেচিবি আৰু বুলড’জাৰ চলাই বেদখলমুক্ত কৰে৷ এই সন্দৰ্ভত উপস্থিত ৰে’ল বিভাগৰ বিষয়াই সদৰী কৰা অনুসৰি পূৰ্বতে জাননী জাৰি কৰাৰ পিছতো বেদখলকাৰীসকলে ঘৰ খালী কৰা নাছিল৷ অহা এটা সপ্তাহৰ ভিতৰত বেদখলৰ কৱলত পৰা প্ৰায় ৫০০ বিঘা ৰে’লৱেৰ মাটি উচ্ছেদ অভিযান সলাই বেদখলমুক্ত কৰা হ’ব৷
