ৰাজ্যত এতিয়া চলিছে নিৰ্বাচনী মহাৰণৰ প্ৰস্তুতি৷ ৯ এপ্ৰিলত ৰাজ্যত এটা পৰ্যায়ত অনুষ্ঠিত হ’ব ২০২৬ৰ বিধানসভা নিৰ্বাচনৰ ভোটগ্ৰহণ৷ শাসক-বিৰোধী সকলো দলৰেই নিৰ্বাচনী প্ৰচাৰ জোৰদাৰ হৈ উঠাৰ সময়তে দেওবাৰে লখিমপুৰ জিলাৰ নাওবৈচাত অসম প্ৰদেশ কংগ্ৰেছে আনুষ্ঠানিকভাৱে মুকলি কৰে দলৰ নিৰ্বাচনী ইস্তাহাৰ৷ এখন বিশাল জনসভাত অংশগ্ৰহণ কৰি সৰ্বভাৰতীয় কংগ্ৰেছ কমিটীৰ সভাপতি মল্লিকাজুৰ্ন খাৰ্গেই ৰাজ্যবাসীৰ কল্যাণ, সামাজিক নিৰাপত্তা আৰু খিলঞ্জীয়াৰ অধিকাৰ সুৰক্ষিত কৰাৰ লক্ষ্যৰে পাঁচটা মূল প্ৰতিশ্ৰুতিসম্বলিত এই ইস্তাহাৰখন প্ৰকাশ কৰে৷ শাসকীয় দলক তীব্ৰ সমালোচনা কৰি কংগ্ৰেছৰ জ্যেষ্ঠ নেতাগৰাকীয়ে স্পষ্ট কৰি দিয়ে যে সাধাৰণ ৰাইজৰ মতামত আৰু পৰামৰ্শৰ ভিত্তিতহে এই ইস্তাহাৰ প্ৰস্তুত কৰা হৈছে৷ কংগ্ৰেছৰ এই ইস্তাহাৰৰ কেন্দ্ৰবিন্দুত থকা পাঁচটা প্ৰধান প্ৰতিশ্ৰুতিৰ ভিতৰত মহিলা সবলীকৰণ আৰু স্বাস্থ্য খণ্ডই বিশেষ গুৰুত্ব লাভ কৰিছে৷ দলটোৱে ক্ষমতালৈ আহিলে মহিলাসকলক উদ্যোগী কৰি তুলিবৰ বাবে প্ৰতি মাহে ৫০ হাজাৰ টকাকৈ বিনাচৰ্তে আৰ্থিক সাহায্য প্ৰদান কৰাৰ লগতে প্ৰতিটো পৰিয়ালৰ বাবে ২৫ লাখ টকাৰ কে’চলেছ স্বাস্থ্য বীমাৰ সুবিধা আগবঢ়োৱা হ’ব বুলি ঘোষণা কৰিছে৷
ইয়াৰ লগতে জ্যেষ্ঠ নাগৰিকসকলৰ সামাজিক নিৰাপত্তা সুদৃঢ় কৰাৰ উদ্দেশ্যে প্ৰতি মাহে ১২৫০ টকাকৈ ভাত্তা প্ৰদান কৰাৰ কথা ইস্তাহাৰত সন্নিৱিষ্ট কৰা হৈছে৷ আনহাতে, খিলঞ্জীয়া লোকৰ ভূমিৰ অধিকাৰ নিশ্চিত কৰাৰ বাবে বাৰ্ষিক আবণ্টন ব্যৱস্থাৰ পৰিৱৰ্তে দহ লাখ খিলঞ্জীয়া লোকক স্থায়ী ভূমি পট্টা প্ৰদান কৰাৰ প্ৰতিশ্ৰুতিও দিছে বিৰোধী দলটোৱে৷ এক গুৰুত্বপূৰ্ণ ৰাজনৈতিক ঘোষণাত দলটোৱে শিল্পী জুবিন গাৰ্গৰ হত্যাকাণ্ডৰ উচিত তদন্ত কৰি চৰকাৰ গঠনৰ এশ দিনৰ ভিতৰত দোষীক শাস্তি প্ৰদান কৰাৰ জৰিয়তে ন্যায় নিশ্চিত কৰিব বুলি প্ৰকাশ কৰিছে৷ শাসকীয় দলৰ আঁচনিসমূহক সমালোচনা কৰি সভাপতি মল্লিকাজুৰ্ন খাৰ্গেয়ে কয় যে বিজেপিয়ে চৰ্তসাপেক্ষে সাহায্য প্ৰদান কৰে আৰু হিতাধিকাৰীসকল বিজেপিৰ হয় নে নহয় সেয়া প্ৰশ্ন কৰে৷
কিন্তু কংগ্ৰেছে এনে প্ৰশ্ন নকৰে বুলি উল্লেখ কৰি তেওঁ বিনাচৰ্তে আৰ্থিক সাহায্য প্ৰদান কৰাৰ লগতে সম্ভৱ হ’লে তাতোকৈ অধিক সহায় কৰাৰ প্ৰতিশ্ৰুতি দিয়ে৷ জুবিন গাৰ্গৰ প্ৰসংগত তেওঁ দৃঢ়তাৰে কয় যে অপৰাধীক কোনো কাৰণতে সাৰি যাবলৈ দিয়া নহ’ব আৰু এশ দিনৰ ভিতৰত তেওঁক ন্যায় প্ৰদান কৰা হ’ব৷ ভূমি পট্টা প্ৰদানৰ বিষয়টোত গুৰুত্ব আৰোপ কৰি তেওঁ কয় যে এই পদক্ষেপৰ পিছত ৰাইজে প্ৰশাসনৰ ওচৰত তাঁত-বাটি কাঢ়িবলগীয়া নহ’ব আৰু ভূমিৰ অধিকাৰ স্থায়ীভাৱে সুৰক্ষিত হ’ব৷ ইস্তাহাৰ প্ৰকাশৰ সমান্তৰালভাৱে খাৰ্গেয়ে ৰাজ্যৰ মুখ্যমন্ত্ৰী হিমন্ত বিশ্ব শৰ্মা আৰু বিজেপি চৰকাৰৰ বিৰুদ্ধে তীব্ৰ আক্ৰমণাত্মক হৈ পৰে৷ মুখ্যমন্ত্ৰীয়ে ৰাইজৰ মাজত ভয়ৰ সৃষ্টি কৰা বুলি অভিযোগ উত্থাপন কৰি তেওঁ কয় যে যিসকল লোক মুখ্যমন্ত্ৰীৰ লগত নাই, তেওঁলোকক বিপদত পেলোৱা হৈছে৷ ৰাইজক এনে ৰাজনীতিলৈ ভয় নকৰিবলৈ আহ্বান জনায় কংগ্ৰেছৰ সভাপতিগৰাকীয়ে শাসকীয় দলৰ শাসন ব্যৰ্থ হোৱা বুলি দাবী কৰে৷ আগন্তুক নিৰ্বাচনত ৰাজ্যখনত পৰিৱৰ্তন আনিবলৈ আৰু জনকল্যাণৰ হকে কাম কৰা দল এটাক ভোট দিবলৈ তেওঁ ভোটাৰসকলক আহ৩ান জনায়৷
