আগন্তুক ২০২৬ চনৰ অসম বিধানসভা নিৰ্বাচনক লৈ ৰাজনৈতিক তৎপৰতাই গতি লাভ কৰাৰ মাজতে বঙাইগাঁও সমষ্টিক কেন্দ্ৰ কৰি গুৰুত্বপূৰ্ণ মন্তব্য আগবঢ়ালে সাংসদ ফণীভূষণ চৌধুৰীয়ে। বৃহস্পতিবাৰে বঙাইগাঁৱত সংবাদ মাধ্যমৰ সৈতে কথা পাতি তেওঁ স্পষ্ট কৰি দিয়ে যে আগন্তুক বিধানসভা নিৰ্বাচনত বঙাইগাঁও সমষ্টিত অসম গণ পৰিষদে (অগপ) নিশ্চিতভাৱে প্ৰতিদ্বন্দ্বিতা কৰিব।
ফণীভূষণ চৌধুৰীয়ে কয় যে, ২০২৬ চনৰ বিধানসভা নিৰ্বাচনত তেওঁ নিজে প্ৰাৰ্থী হিচাপে প্ৰতিদ্বন্দ্বিতা নকৰে। একে সময়তে তেওঁ স্পষ্ট কৰে যে তেওঁৰ পত্নী দ্বীপ্তিময়ী চৌধুৰীৰো প্ৰাৰ্থিত্ব নিশ্চিত নহয়। অগপ দলৰ ভিতৰত পাৰদৰ্শিতা, জনসমৰ্থন আৰু সংগঠনিক শক্তিৰ ওপৰত ভিত্তি কৰিয়েই প্ৰাৰ্থী নিৰ্বাচন কৰা হ’ব বুলি তেওঁ উল্লেখ কৰে।
আসন ভাগ-বতৰাৰ প্ৰসংগত চৌধুৰীয়ে কয় যে, আগন্তুক নিৰ্বাচনত বিজেপি আৰু অগপ পুনৰ মিত্ৰতা কৰিয়েই অৱতীৰ্ণ হ’ব। অৱশ্যে এতিয়ালৈকে দুয়ো দলৰ মাজত আনুষ্ঠানিকভাৱে আসন ভাগ-বতৰা সম্পন্ন হোৱা নাই। এই প্ৰক্ৰিয়া জানুৱাৰী মাহৰ পৰা আৰম্ভ হ’ব বুলি তেওঁ জানিবলৈ দিয়ে।
প্ৰাক্তন মুখ্যমন্ত্ৰী প্ৰফুল্ল কুমাৰ মহন্তই অগপে ৯০খন আসন দাবী কৰাৰ সন্দৰ্ভত কৰা মন্তব্যৰ প্ৰসংগত ফণীভূষণ চৌধুৰীয়ে কয় যে, বৰ্তমান বাস্তৱতা বেলেগ। যোৱা নিৰ্বাচনৰ ফলাফল অনুসৰি বিজেপি দল অধিক শক্তিশালী স্থিতিত আছে। বৰ্তমান বিজেপিৰ প্ৰায় ৬০জন বিধায়ক থকাৰ বিপৰীতে অগপৰ বিধায়ক সংখ্যা ৯জন। সেয়েহে কেৱল দাবীৰ ওপৰত নহয়, পাৰদৰ্শিতা আৰু শক্তিৰ ভিত্তিতহে আসন ভাগ-বতৰা হ’ব বুলি তেওঁ স্পষ্ট কৰে।
সাৰাংশত ক’বলৈ গ’লে, বঙাইগাঁও সমষ্টিত অগপে নিৰ্বাচনত অৱতীৰ্ণ হোৱাটো নিশ্চিত যদিও, কোনে টিকট পাব সেই সিদ্ধান্ত দলীয় নেতৃত্বে পৰিস্থিতি আৰু পাৰদৰ্শিতাৰ ওপৰত ভিত্তি কৰিয়েই ল’ব।
