“মন কৰিলেই চন বাকৰিত মাটিতেই ধন” বুলি এষাৰ কথা আমাৰ চহা সমাজত আজিও প্ৰচলিত। যাৰ জৰিয়তে মানুহৰ ইচ্ছাশক্তিৰ গুৰুত্ব বুজিব পাৰি। এই প্ৰৱল ইচ্ছাশক্তিৰে এইবাৰ ‘বাকৰি’ত মাটিত নহয় ‘পিতনি’হে ধন ঘটাৰ প্ৰয়াস কলিয়াবৰৰ এখন গাঁৱত। কলিয়াবৰৰ আমগুৰি ডেবৰা চাং পথাৰৰ পিতনিত গঢ় লৈ উঠিছে কৃষি বিপ্লৱ। বাৰজন যুৱকৰ সবল-সুঠাম বাহুৰ শক্তিত সেউজীয়া হৈছে ৫০ বিঘাৰো অধিক পিতনি মাটি। কাজিৰঙা ৰাষ্ট্ৰীয় উদ্যানৰ দাঁতি কাষৰীয়া কলিয়াবৰ মহকুমাৰ আমগুৰি ডেবৰা চাং পথাৰত গঢ় লৈ উঠিছে এক ব্যতিক্ৰমী সেউজ বিপ্লৱ। সাধাৰণতে পিতনিত মৎস্য পালনৰ চিন্তাই প্ৰথমে মনলৈ আহে।
কিন্তু তাৰ বিপৰীতে আন এক চিন্তাৰে ২৪ খন হাতৰ শক্তিৰে সেউজীয়া কৰি তুলিছে যন্ত্ৰই চহ কৰিব নোৱাৰা ৫০ বিঘাৰো অধিক পিতনি মাটি। যন্ত্ৰয়েও কৰিব নোৱাৰা কাম দুবাহুৰ জোৰৰে অন্য এক কৃষি বিপ্লৱৰ সূচনা কৰিছে আমগুৰি চাঙৰ এই ১২ জনকৈ কৃষকে। উল্লেখযোগ্য যে, কাজিৰঙা ৰাষ্ট্ৰীয় উদ্যানৰ দাঁতি কাষৰীয়া কলিয়াবৰ ৰাজহ চক্ৰৰ অন্তৰ্গত আমগুৰি ডেবৰা চাং পথাৰত খৰালিৰ সময়তো প্ৰাকৃতিক উৎসৰ পানীৰে ভৰপূৰ হৈ থাকে পথাৰখনৰ বুকু। পথাৰখনৰ ঠায়ে-ঠায়ে একাঠু পৰ্যন্ত বোকা আৰু পিতনি।
বোকাময় পিতনিৰে ভৰপূৰ এই সুবিশাল পথাৰখনতে আমগুৰি চাঙৰ ১২ জনকৈ কৃষকে ৫০ বিঘাৰো অধিক মাটি চহ কৰি আৰম্ভ কৰিছে বড়ো ধানৰ খেতি। পিতনিত গৰু-ম’হৰ হাল অথবা ট্ৰেক্টৰ-পাৱাৰ টিলাৰেৰে হাল বোৱাতো সম্ভৱ হৈ নুঠাত ৫০ বিঘাৰো অধিক মাটি কেৱল কোৰৰে চবিয়াই চহ কৰিছে গাঁওখনৰ ১২জন কৃষকে। প্ৰতিদিনে পাল পাতি ৩-৪জনকৈ কৃষকে এনেদৰে পথাৰত কোৰ মাৰি চহ কৰিছে ৫০ বিঘাৰো অধিক মাটি। আমগুৰি চাঙৰ মেনচিং ক্ৰ’, মানিক ৰংফাৰ, গোবিন্দ ৰংফাৰ, কুথৰি ইংতিসহ ১২ জনীয়া কৃষকে দলে এনেদৰে পাল পাতি কোৰৰে মাটি চহ কৰি ইতিমধ্যে প্ৰায় ৫০ বিঘা মাটিত ৰোপন কৰিছে বড়ো ধানৰ কঠীয়া।
অধিক বোকাময় পিতনি আৰু ঘাঁহৰে পৰিপূৰ্ণ হোৱাৰ বাবে গৰু-ম’হৰ হাল অথবা ট্ৰেক্টৰৰেও মাটি চহ কৰা সম্ভৱ নহয় যদিও থমকি নৰ’ল আমগুৰি চাঙৰ এইসকল কৃষক। দুবাহুৰ শক্তিৰেই একপ্ৰকাৰ যন্ত্ৰকো প্ৰত্যাহ্বান জনাই ৰচিছে শইচ সোণোৱালী সপোন। কোৰৰেই মাটি চহাই সুবিশাল পথাৰত বড়ো ধানৰ খেতিৰে পৰিয়ালৰ সুখময় ভবিষ্যতৰ সপোন দেখিছে এইসকল চহা কৃষকে। যান্ত্ৰিকতাৰে পৰিপূৰ্ণ আধুনিক যুগতো এনেদৰে মূৰৰ ঘাম মাটিত পেলাই দুবাহুৰ শক্তিৰে শ্ৰম কৰি প্ৰাকৃতিক প্ৰত্যহ্বানকো নেওচি সেউজ বিপ্লৱৰ সূচনা কৰা এইসকল কৃষকে নিশ্চয়কৈ গঢ়ি তুলিছে এক অনুকৰণীয় আদৰ্শ।
