প্ৰতিথযশা সাহিত্যিক-সাংবাদিক, কথাশিল্পী তথা ‘কৰুণাধাৰা’ৰ স্ৰষ্টা হোমেন বৰগোহাঞিৰ মহাপ্ৰয়াণৰ তৃতীয় বৰ্ষপুতি উপলক্ষে ‘কৰুণাধাৰা’ৰ ডিব্ৰুগড় জিলা সমিতিৰ উদ্যোগত দেওবাৰে ডিব্ৰুগড় জিলা উন্নয়ন প্ৰাধিকৰণ (ডি.আৰ.ডি.এ) ৰ জাগৃতি প্ৰেক্ষাগৃহত ‘হোমেন বৰগোহাঞি স্মাৰক বক্তৃতানুষ্ঠান’ৰ আয়োজন কৰা হয়৷ ‘হোমেন বৰগোহাঞিৰ সমাজ কল্যাণমূলক কৰ্মৰাজিঃ এক অৱলোকন’ শীৰ্ষক বক্তৃতাটি প্ৰদান কৰিব লখিমপুৰৰ বিশিষ্ট সাংবাদিক, লেখক শৈলেন বৰুৱাই লিখিত বক্তৃতাত কয় যে হোমেন বৰগোহাঞি প্ৰথম পৰ্যায়ত চাৰিবেৰৰ মাজত আৱদ্ধ এজন বুদ্ধিজীৱী আছিল যদিও পৰৱৰ্তী পৰ্যায়ত তেখেতে যিহেতু এক্টিভিষ্ট হিচাপে ৰাজপথলৈও ওলাল, সাহিত্য সভাৰ সভাপতি হিচাপে ৰাজ্যৰ অৰঙে দৰঙে ঘূৰিবলৈ ধৰিলে, তেতিয়াৰ পৰাই সমাজৰ সৰু-বৰ সকলো মানুহৰ লগত তেখেতৰ সম্পৰ্ক গঢ় লৈ উঠিল আৰু সমাজৰ সৰ্বাংগীন উন্নয়নৰ স্বাৰ্থতে তেখেতে এহাতে ৰাজহুৱাকৈ সামাজিক কল্যাণমূলক কাম আৰম্ভ কৰিলে আৰু সমান্তৰালকৈ প্ৰতিভা চিনাক্ত কৰি উপযুক্ত অভিভাৱকত্বৰে সমাজ উজ্জ্বীৱিতকৰণৰ বাবে তেনে প্ৰতিভাক ওৰেটো জীৱন পৃষ্ঠপোষকতা কৰি গ’ল৷
বৰগোহাঞিৰ সমাজ কল্যাণমূলক কৰ্মৰাজিক সাহিত্যৰ ক্ষেত্ৰত সমাজ সেৱা, ৰাজনৈতিক লেখাৰে সমাজ সেৱা, স্বাস্থ্য সচেতনতামূলক লেখাৰে সমাজ সেৱা, আৰ্তজনলৈ মানৱীয় সেৱা, প্ৰকৃতি প্ৰেমৰ জড়িয়তে সমাজ সেৱা, ৰাজহুৱা সম্পদ গঢ়া আৰু ৰক্ষা কৰা, পৰ্যটন থলিক উজ্জীৱিতকৰণৰ জড়িয়তে সমাজ সেৱা, ব্যক্তিৰ প্ৰতিভা চিনাক্তকৰণ আৰু ক্ৰমোৎকৰ্ষ সাধনৰ জড়িয়তে সমাজ সেৱাৰ কথা তেওঁ বক্তৃতাত সবিস্তাৰে উল্লেখ কৰে৷ ‘কৰুণাধাৰা’ৰ ডিব্ৰুগড় জিলা সমিতিৰ সভাপতি ডাঃ প্ৰণয় ফুকনৰ পৌৰোহিত্যত অনুষ্ঠিত অনুুষ্ঠানত মুখ্য অতিথি হিচাপে উপস্থিত থাকি প্ৰথিতযশা সাহিত্যিক, সাহিত্য একাডেমি ফেল’ ড॰ নগেন শইকীয়াই বৰগোহাঞিৰ স’তে লাভ কৰা জীৱনৰ বিভিন্ন বিৰল মূহূৰ্তৰ কথা উল্লেখ কৰি কয় যে আধুনিক সাহিত্যত এক নতুন মাত্ৰা দি গ’ল হোমেন বৰগোহাঞিয়ে৷ তেখেতৰ লেখা-মেলাত পশ্চিমীয়া প্ৰভাৱ দেখা যায়৷ বৰগোহাঞিৰ সম্পাদিত ‘সাপ্তাহিক নীলাচল’ কাকতত ডিব্ৰুগড়ৰ পৰা লেখা-মেলাৰ দায়িত্ব পালন কৰাৰ কথাও তেওঁ শ্ৰদ্ধাৰে স্মৰণ কৰে৷ আনহাতে এই অনুষ্ঠানত পোনে পোনে কৰ্মস্থলি ৰাজস্থানৰ আহি সভাত অতিথি হিচাপে উপস্থিত থাকি প্ৰয়াত বৰগোহাঞিৰ জ্যেষ্ঠ পুত্ৰ অনিন্দ্য বৰগোহাঞিয়ে পিতৃৰ জীৱনৰ নিভীকতাৰ যি গুণ তাক উল্লেখ কৰি কয় যে ‘নীলাচল’ত কাম কৰি থকাৰ সময়ত তেওঁ ভাবুকিৰ সন্মুখীন হৈছিল৷ কাৰোবাৰ নিৰ্দেশত কাম কৰা বিধৰ লোক তেওঁ নাছিল৷ জেপত সদায়েই তেওঁ এখন পদত্যাগ পত্ৰ হাতত ৰাখিছিল৷ সেইদৰে তেওঁ সকলো লোভ-মোহৰ পৰা আঁতৰি থাকিছিল৷ সেয়ে মৃত্যুপৰ্যন্ত এটা নিজা ঘৰ, এখন গাড়ী নাছিল৷ নিয়মানুৱৰ্তিতা আৰু সময়ানুৱৰ্তিতা মানি চলা এগৰাকী লোক আছিল বুলিও অভিহিত কৰি বৰগোহাঞিয়ে অসমীয়া সাহিত্য জগতৰ বাবে শতাধিক লেখক-লেখিকাক প্ৰতিষ্ঠা কৰিছিল বুলিও বক্তব্যত উল্লেখ কৰে৷ অনুষ্ঠানত ‘হোমেন বৰগোহাঞিক মই যিদৰে জানিছিলোঁ’ শীৰ্ষক বিষয়ক বক্তব্য আগবঢ়াই বিশিষ্ট লেখক ডাঃ নিৰ্মল চাহেৱালাই কয় যে বৰগোহাঞি আছিল এগৰাকী মানসিক ৰোগ বিশেষজ্ঞ৷
যিকোনো লোকৰ সমস্যা নিমিষতে সমাধান কৰি দিয়াৰ অনেক উদাহৰণ আছে৷ তেওঁৰ প্ৰত্যেকটো কাম নিখুঁট৷ যিয়েই কাম নকৰক কিয় তেওঁ সদায় হৃদয় উজাৰি কৰিছিল আৰু আনকো কৰিবলৈ পৰামৰ্শ দিছিল৷ ‘কৰুণাধাৰা’ৰ জিলা সমিতিৰ যুটীয়া সম্পাদক নকুল খাউন্দ, কোষাধ্যক্ষ সমীৰ কুমাৰ শৰ্মাকে ধৰি চহৰখনৰ বৌদ্ধিক জগতৰ শতাধিক ব্যক্তি উপস্থিত থকা উক্ত অনুষ্ঠানত আৰ্তজনৰ অনুষ্ঠান ‘কৰুণাধাৰা’ৰ কৰ্মৰাজিৰ সম্পৰ্কত বিস্তৃতভাৱে আলোকপাত কৰি বক্তব্য আগবঢ়ায় ‘কৰুণাধাৰা’ৰ কেন্দ্ৰীয় সমিতিৰ ন্যাসৰক্ষী তথা অৱসৰী শীৰ্ষ আৰক্ষী বিষয়া দেৱজিৎ হাজৰিকাই৷ অনুষ্ঠানত বিশিষ্ট কবি ড॰ কৰবী ডেকা হাজৰিকা, প্ৰাপ্তি [সুকন্যা কৌশিক] য়েও বৰগোহাঞিৰ সান্নিধ্যৰ কথা স্মৰণ কৰি বক্তব্য আগবঢ়ায়৷ ‘কৰুণাধাৰা’ৰ ডিব্ৰুগড় জিলা সমিতিৰ কাৰ্যকৰী সভাপতি জ্যোতিশংকৰ চলিহাই আঁতধৰা আৰু যুটীয়া সম্পাদক ৰতন হাজৰিকাই শলাগ জ্ঞাপন কৰা অনুষ্ঠানত ডিব্ৰুগড় বিশ্ববিদ্যালয়ৰ অৰ্থনীতি অৱসৰী অধ্যাপক ক্ষিৰোদ শইকীয়াই ‘কৰুণাধাৰা’লৈ দহ হেজাৰ টকাৰ সাহায্য প্ৰদানৰ কথা ঘোষণা কৰে৷
