বুকুত কৰ্মসংস্কৃতিৰ মহামন্ত্ৰৰে জীৱন জিনি সমাজৰ ভোটাতৰা হোৱা বহু ব্যক্তিৰ ভিতৰত লখিমপুৰ জিলাৰ নাৰায়ণপুৰৰ ২ নং উত্তৰকাঠনিৰ বিপুল বৰা সম্প্ৰতি এটি চৰ্চাৰ নাম।প্ৰয়াত শিশুৰাম বৰা আৰু চেনেহী বৰাৰ পুত্ৰ কৃষি বিল্পৱৰ লগতে সাংস্কৃতিক ক্ষেত্ৰৰো অভিজাত যাত্ৰী বিপুলে শৈক্ষিক জীৱন ঘৰৰ কাষৰ প্ৰাথমিক বিদ্যালয়ৰ পৰা আৰম্ভ কৰি ঢলপুৰ উচ্চ মাধ্যমিক বিদ্যালয়ৰ পৰা উচ্চতৰ মাধ্যমিক পৰীক্ষাত উত্তীৰ্ণ হৈ কৰ্মসংস্কৃতিৰ বিশাল ক্ষেত্ৰখনৰ লগত জড়িত হৈ পৰে। ৩০-৪০বিঘাৰো অধিক মাটি তেওঁ আৰু সহধৰ্মিনী ইটালীৰ বৰাৰ নিজেই ধানৰ লগতে বিভিন্ন বতৰৰ খেতিৰে নিজে স্বাৱলম্বী হোৱাৰ লগতে সমাজৰ দুই এককো সংস্থাপন দি ৰাইজক প্ৰাকৃতিকভাৱে উৎপাদিত উৎপাদন যোগান ধৰি নিৰন্তৰ সেৱাৰে জননীৰ পূজা অব্যাহত ৰাখিছে।
পান তামোলৰ চাহিদাৰ প্ৰতি লক্ষ্য ৰাখি তেখেতে ২০০৪ চনৰ পৰা আৰম্ভ কৰে পান তামোলৰ খেতি। থলুৱা ব্যক্তি, ব্যৱসায়ীক তামোল পান যোগান ধৰাৰ লগতে চুবুৰীয়া জিলা বিশ্বনাথৰ পৰা মধ্য অসমৰ নগাঁৱলৈ তেখেতৰ উৎপাদন ৰপ্তানি হয়। নৃত্য গীত ভাওনা আদিত দখল থকা চহা শিল্পী বিপুলৰ আছে এক সাংস্কৃতিক চিনাকি। গাঁৱৰ ভাওনা সবাহৰ উপৰিও বিভিন্ন ঠাইত অভিনয়ৰ জৰিয়তে নিজৰ অনন্য কুশল প্ৰদৰ্শন কৰি লাভ কৰিছে বিপুল জনপ্ৰিয়তা। ১০০ ৰো অধিক ভাওনাত অভিনয় কৰি জনপ্ৰিয়তা অৰ্জনৰ ,খোল,ঢোল বাদন ,নাগৰা বাদনৰ লগতে সাংস্কৃতিক ক্ষেত্ৰত বিভিন্ন প্ৰতিভা ৰাজীৰে চিনাকি আপোন শিল্পীলৈ উত্তৰণ হোৱা বিপুলৰ আছে নিজা আদৰ্শ আৰু সমাজৰ প্ৰতি গভীৰ দায়িত্ববোধ। সাংস্কৃতিক যাত্ৰাত নিজে সীমাৱদ্ধ নাথাকি আন দহজনকো আগবঢ়াই উলিয়াই অনা , নবীনসকলক অভিনয় জ্ঞানেৰে পুষ্ট কৰি সঁজাই পৰাই জগতমুখী কৰাৰ ক্ষেত্ৰটো সদায় অগ্ৰগণ্য ভূমিকা পালন কৰি আহিছে। শেহতীয়াকৈ তেখেতে ঢলপুৰৰ পেটুৱা গোসাঁনী থানৰ কাষত আৰম্ভ কৰিছে এক নিজা ক্ষুদ্ৰ ব্যৱসায়ীক প্ৰতিষ্ঠান। কৃষি বিপ্লৱী, ভাওনা শিল্পী, ক্ষুদ্ৰ ব্যৱসায়ী বিপুল বৰাই আহ্বান জনাইছে যে -কর্ম সংস্থাপনৰ বাবে বাহিৰলৈ নগৈ নিজ ঘৰতে থাকি কাম কৰক নিজৰ লগতে আন দহজনকো সংস্থাপন দিব পাৰিব । মাথো কিবা এটা কৰিবলৈ মন থাকিব লাগিব আৰু সাহস কৰিব লাগিব । বিপুল বৰা ব্যক্তি জন এতিয়া স্বাৱলম্বী হোৱাৰ লগতে বিপুল বৰাৰ আত্মপ্ৰত্যয় বহুতৰ বাবে অনুপ্ৰেৰণা়,বহুজনৰ বাবে আদর্শ হৈ পৰিছে।
