অসমৰ উৎপাদিত শাক পাছলিৰ লগতে জৈৱিকভাৱে উৎপাদন কৰা আদা, হালধি আৰু নেমুৰ খেতিৰ উৎপাদিত সামগ্ৰীয়ে দখল কৰিছে বিশ্বৰ কৃষিভিত্তিক বজাৰ। শেহতীয়াকৈ অসম চৰকাৰৰ কৃষি বিভাগৰ সহযোগত উদ্যান শস্য আৰু খাদ্য সংশোধন সঞ্চালকালয়ৰ প্ৰত্যক্ষ সহযোগত গোলাঘাট জিলাৰ মেৰাপানীৰ পদুমপথাৰ কৃষক উৎপাদক কোম্পানীৰ কৃষকসকলে জৈৱিক পদ্ধতিৰে উৎপাদন কৰা ২০ মেট্ৰিক টন হালধি ২০২০ চনত পোন প্ৰথমবাৰৰ বাবে ছৌদি আৰৱলৈ প্ৰেৰণ কৰাৰ পাছত যোৱা ১২ মাৰ্চত ডুবাইলৈ ৰপ্তানি কৰে ১০ মেট্ৰিক টন জৈৱিক আদা। অসমৰ কৃষি তথা উদ্যান শস্য খণ্ডৰ উত্তৰণৰ যাত্ৰাত এই পদক্ষেপে অসমৰ কৃষক সকলৰ বাবে এক নতুন দিগন্তৰ সূচনা কৰাৰ লগতে আশাৰ বাতৰি কঢ়িয়াই আনিছে। অসমৰ আদাই ছৌদি আৰব, ডুবাইত বিশেষ বজাৰ দখল সক্ষম হোৱাৰ লগতে ইয়াৰ সমান্তৰালভাৱে জৈৱিক পদ্ধতিৰে উৎপাদন কৰা হালধি, অসমৰ জাতীয় ফল হিচাপে স্বীকৃতি লাভ কৰা নেমুৰ ৰপ্তানিয়ে গোলাঘাট জিলাৰ মেৰাপানীৰ পদুমপথাৰ অঞ্চলৰ কেইজমান শিক্ষিত যুৱকৰ লগতে আন আন কৃষকৰ বাবে আন্তঃৰাষ্ট্ৰীয় বজাৰতো অসমৰ কৃষিৰ মান জিলিকাবলৈ সক্ষম হৈছে।
উল্লেখ্যযোগ্য যে অসম-নগালেণ্ড সীমাৰ অতি ভিতৰুৱা অঞ্চলটোৰ স্থানীয় ক্ষুদ্র কৃষকসকলক লগত লৈ ২০০৭ চনতে আৰম্ভ কৰিছিল পদুমপথাৰ এগ্র’ অর্গেনিক প্রডিউচাৰ কোম্পানী লিমিটেড এক নামেৰে এটা কৃষিভিত্তিক প্রতিষ্ঠান। প্রথম অৱস্থাত ৰাজ্য চৰকাৰৰ কিছু সহায় আৰু অঞ্চলটোৰ পোন্ধৰশ কৃষকৰ সহযোগিতাৰে আৰম্ভ কৰিছিল জৈৱিক কৃষিকার্যৰ। অঞ্চলটোৰ যুৱ কৃষক অঞ্জল লিম্বুৰে নেতৃত্বত একাংশ যুৱকে প্রথমে অঞ্চলটোৰ ভূমিৰ উৰ্বৰতা আৰু জনসাধাৰণৰ স্বাস্থ্যৰ প্রতি লক্ষ্য ৰাখি ৰাসায়নিক সাৰ, কীটনাশকৰ পৰিৱর্তে সম্পূর্ণ জৈৱিক পদ্ধতিৰে আৰম্ভ কৰিছিল আদা আৰু হালধিৰ খেতি। এই বিষয়ে জানিব পাৰি বহিঃৰাজ্যৰ কেইবাটাও প্রতিষ্ঠান আগবাঢ়ি আহিছিল তেওঁলোকৰ কাষলৈ। উৎপাদিত সামগ্ৰীবোৰৰ গুণাগুণ পৰীক্ষা কৰি হাৰিয়ানা, দিল্লী, পশ্চিমবংগ, হায়দ্ৰাবাদ, মুম্বাই, কলকাতা, অন্ধ্ৰপ্ৰদেশ, ওড়িশা, চিকিম, গুজৰাট আদি ঠাইৰ উদ্যোগীসকলে এই সামগ্রীসমূহ ক্রয় কৰাৰ ইচ্ছা প্রকাশ কৰিলে আৰু তাৰ পাছৰেপৰা থমকি ৰ’বলগা হোৱা নাই পদুমপথাৰ এগ্র’ অর্গেনিক প্রডিউচাৰ কোম্পানীৰ কর্মকর্তাসকল।বহিঃৰাজ্যৰ প্ৰতিষ্ঠানৰ সহযোগত তেওঁলোকৰ উৎপাদিত আদা, হালধি যোৱা বছৰ ৰপ্তানি হ’ল ছৌদি আৰব আৰু আমেৰিকালৈ। কেৱল আদা, হালধিয়েই নহয়, এই কৃষক গোটটোবে বহিঃৰাজ্যলৈ প্রেৰণ কৰি আহিছে জৈবিকভাবে উৎপাদিত নেমু, ৰঙালাউ, অমিতা, জালুক আদি। বছৰি প্রায় ৮০০ মেট্রিক টন হালধি আৰু ৪০০ মেট্রিক টন আদা উৎপাদন কৰি কৃষক গোটটোৱে প্রতিবছৰে কেইবা কোটি টকাৰো ব্যৱসায় কৰিবলৈ সক্ষম হৈছে। তদুপৰি চৰকাৰৰ কৃষি আৰু উদ্যান শস্য বিভাগৰ সৌজন্যত কৃষকসকলে বিভিন্ন সা-সুবিধা, ৰাজ্য তথা বহিঃৰাজ্যত প্রশিক্ষণ, ট্রেক্টৰ, জৈৱিক সাৰ, সামগ্রী কঢ়িওরা বাহন আদিও লাভ কৰিবলৈ সক্ষম হৈছে। ইফালে, এই কোম্পানীটোৰে এই বছৰৰ পৰা নিজাকৈ জার্মানী, আমেৰিকা, ছৌদি আৰব, ছিংগাপুৰ আদি দেশলৈ নিজা উৎপাদিত সামগ্রী প্রেৰণ কৰাৰ বাবে প্ৰাৰম্ভিক চুক্তি সম্পাদনৰে প্রচেষ্টা অব্যাহত ৰখা বুলি ৰাষ্ট্ৰীয় পুৰস্কাৰপ্ৰাপ্ত কৃষক অঞ্জল লিম্বু আৰু অন্যতম সহযোগী সঞ্জিত বিশ্বকর্মাই জানিবলৈ দিছে। আনহাতে, চৰকাৰৰ সহযোগত ইতিমধ্যে আদা আৰু হালধিৰ মেঘা-১, ৰাজেন্দ্র চনিয়া, লাখাডাং, ভোলা আদি উন্নত মানৰ বীজ লাভ কৰি দৈয়াং নদীৰ কাষৰীয়া উৰ্বৰ ভূমিত কোম্পানীটোৰ পোন্ধৰশ কৃষকে ১৫০০ হেক্টৰ ভূমিত জৈবিকভাবে আদা, হালধিৰ খেতি কৰিছে।
কৃষিৰে অৰ্থনীতি সলনি কৰিব বিছৰা পদুম পথাৰ এগ্ৰ’ অৰ্গেনিক প্ৰডিউচাৰ কোম্পানীটোৱে নিজৰ কৃষক সকলৰ সমান্তৰালভাৱে চুবুৰীয়া অঞ্চলৰ কৃষক সকলকো জৈৱিক কৃষিৰ সন্দৰ্ভত বিভিন্ন প্ৰশিক্ষণৰ ব্যৱস্থা কৰি সমগ্ৰ অঞ্চলটোলৈকে এক কৃষি আন্দোলন গঢ়ি তোলাৰ প্ৰয়াস কৰিছে। সেই অনুসৰি পদুমপথাৰ এগ্র’ প্রডিউচাৰ কোম্পানীৰ মুখ্য সঞ্চালক অঞ্জল লিম্বুৰ নেতৃত্বত উদ্যান শস্য আৰু খাদ্য সংসাধন সঞ্চালকালয় গুৱাহাটী আৰু ছীল বায়টেক লিমিটেডৰ সহযোগত তিনিটা কৃষক গোটৰ পাঁচ শতাধিক কৃষকক যোৱা ১৪ জুনৰ পৰা ১৬ জুনলৈকে তিনিদিনীয়া জৈৱিক কৃষিৰ প্ৰশিক্ষণ প্ৰদান কৰে। যোৱা ১৪ জুনত কৃষক গোটটোৱে কাৰ্বিআংলং জিলাৰ চিলনীজান ক্লাষ্টাৰৰ পূজাবিল ক্লাৱত ১৭০ গৰাকী কৃষকক প্ৰশিক্ষণ প্ৰদান কৰে। ইয়াৰ সমান্তৰালভাৱে ১৫ জুনত পদুম পথাৰ জৈৱিক কৃষি উৎপাদক কোম্পানীৰ কাৰ্যালয়ত ১৭৫ জন কৃষকক প্ৰশিক্ষণ প্ৰদান কৰে। প্ৰশিক্ষণৰ অন্তিম দিনা অৰ্থাৎ ১৬ জুন তাৰিখে চিতলমাৰী ক্লাষ্টাৰৰ অধীনত দৈমুগুৰি প্ৰাথমিক বিদ্যালয়ত ১৬৫ জন কৃষকক প্ৰশিক্ষণ প্ৰদান কৰে। এই প্ৰশিক্ষণ কাৰ্যসূচীত কৃষক সকলক প্ৰশিক্ষণ প্ৰদান কৰে অসম চৰকাৰৰ কৃষি বিভাগৰ অৱসৰপ্ৰাপ্ত যুটীয়া সঞ্চালক তথা ভাৰত চৰকাৰৰ জল শক্তি বিভাগৰ অধীনস্থ NERIWLAM ৰ প্ৰাক্তন কৃষি পৰামৰ্শদাতা ড° বংশীধৰ কলিতাই।
প্ৰশিক্ষণ কাৰ্যসূচীটোত সহযোগ কৰে পদুম পথাৰ এগ্ৰ অৰ্গেনিক প্ৰডিউচাৰ কোম্পানীৰ অধ্যক্ষ অঞ্জল লিম্বু, সঞ্চালক সঞ্জীত কুমাৰ বিশ্বকৰ্মা, সঞ্চালক প্ৰদীপ লিম্বু আৰু চি ই অ’ অবিনাশ চুব্বাই।এই প্ৰশিক্ষণৰ জৰিয়তে কৃষক সকলক জৈৱিক কৃষি কি? ইয়াৰ প্ৰয়োজনীয়তা – মাটি আৰু মানুহৰ স্বাস্থ্য ৰক্ষাত জৈৱিক কৃষি ভূমিৰ বিশদ ব্যাখ্যা আগবঢ়ায়। ৰাসায়নিক দ্ৰব্যৰ অপব্যৱহাৰে কেনেকৈ মাটি আৰু পানী দূষিত কৰে আৰু তাৰ কুপ্ৰভাৱ কেনেকৈ জীৱ বৈচিত্ৰতাৰ ওপৰত পৰে তাৰো সম্পৰ্কতো উদাহৰণসহ কৃষক সকলক বুজায়। ‘স্বাস্থ্যৱান মাটি-স্বাস্থ্যৱান জাতি’ এই বচন ফাঁকিৰ ওপৰত ভিত্তি কৰি জৈৱিক খেতিৰে কেনেকৈ মাটিৰ স্বাস্থ্য ৰক্ষাৰ কৰিব পাৰি সেই প্ৰসংগত প্ৰজেক্টৰ সহায়ত ব্যাখ্যা কৰে। ইয়াৰ উপৰিও জৈৱিক কৃষিত পঞ্চগভ্য, জীৱামৃত আৰু জৈৱিক দৰৱ প্ৰস্তুতিৰ প্ৰশিক্ষণ প্ৰদান কৰে। উল্লেখ্য যে, জৈৱিক কৃষিৰ উত্তৰণৰ ক্ষেত্ৰত পদুমপথাৰ এগ্ৰ’ অৰ্গেনিক প্ৰডিউচাৰ কোম্পানীয়ে গ্ৰহণ কৰা পদক্ষেপ নিশ্চিতভাৱেই অসমৰ কৃষক সকললৈ নতুন আশাৰ ৰেঙণি কঢ়িয়াই অনাৰ লগতে কৃষিৰ জৰিয়তে পঞ্জাৱ, হাৰিয়ানাৰ কৃষকৰ দৰে স্বাৱলম্বীতাৰ পথ দেখুৱাবলৈও সক্ষম হৈছে।
