২০২৬ বৰ্ষৰ উচ্চতৰ মাধ্যমিক চূড়ান্ত পৰীক্ষাৰ সময় ঘোষণা কৰিলে অসম ৰাজ্যিক বিদ্যালয় শিক্ষা ব’ৰ্ডে । সেইমৰ্মে অহা বছৰৰ ফেব্ৰুৱাৰী–মাৰ্চ মাহত অনুষ্ঠিত হ’ব ২০২৬ বৰ্ষৰ উচ্চতৰ মাধ্যমিক চূড়ান্ত পৰীক্ষা। ২২ অক্টোবৰৰ পৰা মুকলি কৰা হৈছে অনলাইন আবেদন প্ৰক্ৰিয়া। এই প্ৰক্ৰিয়া ২০২৫ চনৰ ২৫ নৱেম্বৰলৈকে চলিব।১৩ অক্টোবৰত জাৰি কৰা আনুষ্ঠানিক অধিসূচনা অনুসৰি উল্লেখ্য এ এছ ই বিয়ে সকলো ছাত্ৰ-ছাত্ৰীয়ে অফিচিয়েল অনলাইন পৰ্টেলৰ জৰিয়তে একান্তভাৱে পৰীক্ষাৰ প্ৰ-পত্ৰ জমা দিয়াটো বাধ্যতামূলক কৰিছে। কোনো অফলাইন প্ৰপত্ৰ জমা দিয়া গ্ৰহণ কৰা নহ’ব, যাৰ ফলত প্ৰক্ৰিয়াটো সম্পূৰ্ণৰূপে ডিজিটেল হৈ পৰিছে। দ্বিতীয় সংমণ্ডলৰ অন্তৰ্গত সকলো উচ্চতৰ মাধ্যমিক বিদ্যালয় আৰু কনিষ্ঠ মহাবিদ্যালয়ক প্ৰতিগৰাকী যোগ্য ছাত্ৰ-ছাত্ৰীয়ে নিৰ্ধাৰিত সময়সীমাৰ ভিতৰত প্ৰ-পত্ৰ পূৰণ কৰাটো নিশ্চিত কৰিবলৈ ব’ৰ্ডে নিৰ্দেশ দিছে।
ব’ৰ্ডে স্পষ্ট কৰি দিয়ে যে প্ৰতিজন ছাত্ৰৰ পঞ্জীয়ন নম্বৰ পঞ্জীয়নৰ তাৰিখৰ পৰা পাঁচ বছৰলৈকে বৈধ হৈ থাকিব। অৱশ্যে সময়সীমাৰ ভিতৰত অনলাইন আবেদন প্ৰক্ৰিয়া সম্পূৰ্ণ কৰিব নোৱাৰা ছাত্ৰ-ছাত্ৰীক পৰীক্ষাত অৱতীৰ্ণ হোৱাৰ অনুমতি দিয়া নহ’ব।এচএছইবিয়ে লগতে উল্লেখ কৰিছে যে কেৱল স্বীকৃতিপ্ৰাপ্ত বা অনুমোদিত প্ৰতিষ্ঠানত নামভৰ্তি কৰা ছাত্ৰ-ছাত্ৰীকহে নিয়মীয়া প্ৰাৰ্থী হিচাপে গণ্য কৰা হ’ব। ২০২৪–২৫ চনৰ শৈক্ষিক অধিৱেশনত স্বীকৃতি নোপোৱা প্ৰতিষ্ঠানত অধ্যয়ন কৰাসকলক প্ৰতিষ্ঠানিক ব্যক্তিগত (আই পি) প্ৰাৰ্থী বুলি গণ্য কৰা হ’ব আৰু তেওঁলোকে অতিৰিক্ত আই পি মাচুল দিব লাগিব। যদি কোনো প্ৰতিষ্ঠানে স্বীকৃতি হেৰুৱায় তেন্তে ইয়াৰ ছাত্ৰ-ছাত্ৰীসকল স্বয়ংক্ৰিয়ভাৱে এই শ্ৰেণীৰ অন্তৰ্গত হ’ব।২০২২ চনৰ ৭ নৱেম্বৰৰ চৰকাৰী অধিসূচনা নং ই-২৩৮০৭৪/৪৭১ৰ কথা উল্লেখ কৰি ব’ৰ্ডে পুনৰ কয় যে চৰকাৰী, প্ৰাদেশিক, বা স্বীকৃতিপ্ৰাপ্ত ভেঞ্চাৰ প্ৰতিষ্ঠানৰ ছাত্ৰ-ছাত্ৰীসকলক যিবোৰৰ অভিভাৱকে বছৰি ২ লাখ টকাতকৈ কম উপাৰ্জন কৰে, তেওঁলোকক পৰীক্ষাৰ মাচুলৰ পৰা ৰেহাই দিয়া হ’ব।
১৪ অক্টোবৰত জাৰি কৰা আন এক অধিসূচনাত এ এছ এছ ই বিয়ে স্পষ্ট কৰি দিছিল যে বেটাৰমেণ্ট, ৰি-এপিয়াৰেন্স, বিষয় পুনৰাবৃত্তি, কম্পাৰ্টমেণ্টেল, আৰু কিছুমান বিষয়ৰ বাবে আবেদন কৰা ছাত্ৰ-ছাত্ৰীসকলে আবেদন কৰাৰ যোগ্য। প্ৰ-পত্ৰ দাখিল কৰাৰ পিছত বিষয় বা আঁচনিৰ যিকোনো পৰিৱৰ্তনত ব’ৰ্ডে কঠোৰভাৱে নিষেধাজ্ঞা আৰোপ কৰিছে।
