শ্ৰীমন্ত শঙ্কৰদেৱ সঙ্ঘৰ তিতাবৰ জিলা শাখাৰ ত্ৰয়োবিংশতি সংখ্যক বাৰ্ষিক অধিৱেশনভাগীৰ যোৱা শনি আৰু দেওবাৰে দুদিনীয়াকৈ বৰ্ণাঢ্য কাৰ্যসূচীৰে সফলভাৱে সামৰণি পৰে। তিতাবৰ সমজিলাৰ বৰহোলাৰ ৰজাবাহৰৰ সোণাধৰ ৰাজখোৱা আৰু টেপুৰাম কৃষ্ণ দাস সমন্বয় ক্ষেত্ৰত অনুষ্ঠিত এই অধিৱেশনে সমগ্ৰ অঞ্চলটোত এক আধ্যাত্মিক আৰু সাংস্কৃতিক পৰিৱেশৰ সৃষ্টি কৰে।
অধিৱেশনৰ অন্তিম দিনা পুৱা হৰিনামৰ ধ্বনি, গায়ন-বায়ন, ডবা-শঙ্খ আদি গুৰু বাদ্য পৰিৱেশনেৰে পতাকা উত্তোলন অনুষ্ঠান অনুষ্ঠিত হয়। ইয়াৰ পিছতে ভাগৱত পাঠ, বাৰেৰহণীয়া সাংস্কৃতিক শোভাযাত্ৰা, অন্তৰঙ্গ আলাপ আদি কাৰ্যসূচীৰ জৰিয়তে অধিৱেশনভাগীৰ কাৰ্যসূচী আগবাঢ়ে। শোভাযাত্ৰাত অগণন ভকত-বৈঞ্চৱ তথা আই-মাতৃসমস্তে অংশগ্ৰহণ কৰি সমগ্ৰ পৰিৱেশ আধ্যাত্মিক ভাৱে মুখৰিত কৰি তোলে।
দুপৰীয়াৰ ভাগত সহস্ৰাধিক ভকত-বৈঞ্চৱ, আই-মাতৃ তথা মহাপুৰুষ শ্ৰীমন্ত শঙ্কৰদেৱ গুৰুজনাৰ অনুগামী ৰাইজৰ উপস্থিতিত অনুষ্ঠিত হয় এখন মুকলি সভা। সঙ্ঘৰ তিতাবৰ জিলা শাখাৰ সভাপতি সুশীল গগৈৰ সভাপতিত্বত অনুষ্ঠিত সভাখন উদ্বোধন কৰে মহাপুৰুষ শ্ৰীমন্ত শঙ্কৰদেৱ বিশ্ববিদ্যালয়ৰ সদস্য তথা বিশিষ্ট শিক্ষাবিদ ডঃ বুদ্ধীন্দ্ৰ নাথ শইকীয়াই। সভাত শ্ৰীমন্ত শঙ্কৰদেৱ সঙ্ঘৰ সাহিত্য শাখাৰ সভাপতি ডঃ মৃণাল কুমাৰ বৰুৱাই নিৰ্দিষ্ট বক্তাৰূপে ভাষণ প্ৰদান কৰি মহাপুৰুষ শ্ৰীমন্ত শঙ্কৰদেৱ গুৰুজনাৰ আদৰ্শ, দৰ্শন আৰু সাংস্কৃতিক অৱদান সম্পৰ্কে গুৰুত্বপূৰ্ণ বক্তব্য আগবঢ়ায়।
সভাৰ শেষ পৰ্যায়ত মহাপুৰুষ শ্ৰীমন্ত শঙ্কৰদেৱ গুৰুজনাৰ আদৰ্শ প্ৰচাৰ আৰু প্ৰসাৰৰ বাবে নিৰৱিচ্ছিন্নভাৱে সেৱা আগবঢ়াই অহা সঙ্ঘৰ একনিষ্ঠ সেৱক, বৰ্ষীয়ান নাগৰিক তথা ধৰ্মপ্ৰাণ প্ৰদীপ বৰা বাপক ফুলাম গামোচা, চেলেং, প্ৰশস্তি পত্ৰ আৰু নগদ ধনৰাশিসহ প্ৰয়াত পপিন হাজৰিকা সোঁৱৰণী মহাপুৰুষ মাধৱদেৱ বঁটা প্ৰদান কৰা হয়।
দুদিনীয়া অধিৱেশনৰ সফল সামৰণিৰ লগে লগে তিতাবৰৰ ৰজাবাহৰৰ সোণাধৰ ৰাজখোৱা আৰু টেপুৰাম কৃষ্ণ দাস সমন্বয় ক্ষেত্ৰ পুনৰ নিজম পৰে যদিও মহাপুৰুষ শ্ৰীমন্ত শঙ্কৰদেৱ গুৰুজনাৰ আদৰ্শ আৰু একশৰণ নামধৰ্মৰ বাৰ্তাই অংশগ্ৰহণকাৰী ভকত-বৈঞ্চৱ তথা ৰাইজৰ মন-মগজুত গভীৰ প্ৰভাৱ পেলাই থৈ যায়।
