বিশিষ্ট নাট্যকাৰ, পৰিচালক, অভিনেতা, প্ৰবন্ধকাৰ, গল্পকাৰ শৰৎ চন্দ্ৰ শৰ্মাৰ দেহাৱসান। ৮০ৰ দশকত পুলক গগৈৰ পৰিচালনাত নিৰ্মিত “সাদৰি” চলচ্চিত্ৰত অভিনয় কৰাৰ উপৰিও ৰবিন্দ্ৰ ভৱন আৰু জিলা পুথিভঁৰালত মঞ্চস্ত হোৱা “এখন যাত্ৰাৰ”, মই “ৰহমানে কৈছোঁ”, “শকুনিৰ প্ৰতিশোধ” আদিকে ধৰি প্ৰায় ৪৫ খন নাটকত অভিনয় কৰিছিল শৰৎ শৰ্মাই।
সমান্তৰালকৈ শৰাইঘাট নাট্য গোষ্ঠীয়ে বিগত ৫০ বছৰে মঞ্চস্থ কৰা প্ৰায়বোৰ নাটক পৰিচালনা কৰিছিল তেওঁ। সমান্তৰালকৈ বিভিন্ন বাতৰি-কাকত, আলোচনীত গল্প, প্ৰবন্ধ লিখি সমাদৰ বুটলিবলৈ সক্ষম হৈছিল প্ৰয়াত শৰ্মাই। ৫০বৰ্ষ গৰকা শৰাইঘাট নাট্যগোষ্ঠীৰ সভাপতি আছিল প্ৰয়াত শৰৎ চন্দ্ৰ শৰ্মা। আমিনগাঁৱ স্বৰ্ণ শাখা সাহিত্য সভাৰো প্ৰাক্তন সভাপতি আছিল শৰৎ শৰ্মা।
প্ৰয়াত শৰৎ চন্দ্ৰ শৰ্মাৰ মৃত্যুত কামৰূপ জিলাত পৰিছে গভীৰ শোকৰ ছাঁ। তেখেতৰ মৃত্যুত কামৰূপ জিলা সাহিত্য সভা, কামৰূপ জিলা সাংবাদিক সন্থা,উত্তৰ গুৱাহাটী সাংবাদিক সন্থা, শৰাইঘাট নাট্য গোষ্ঠী, আমিনগাঁৱ স্বৰ্ণ শাখা সাহিত্য সভা, বৃহত্তৰ আমিনগাঁৱ ৰঙালী বিহু সন্মিলনী আদি বিভিন্ন অনুষ্ঠানে জ্ঞাপন কৰে শেষ শ্ৰদ্ধাঞ্জলি। শেষত “শৰাইঘাট শান্তি স্থল” ত পঞ্চভূতত বিলীন হয় প্ৰয়াত শৰৎ শৰ্মাৰ নশ্বৰ দেহ।
