অসমৰ মুগা শিল্পৰ বিকাশৰ বাবে কেন্দ্ৰীয় বস্ত্ৰ মন্ত্ৰালয়ে সমৰ্থ (SAMARTH – Scheme for Capacity Building in Textile Sector) আঁচনিৰ অধীনত দক্ষতা বিকাশৰ বাবে বিভিন্ন পদক্ষেপ গ্ৰহণ কৰিছে। এই আঁচনিৰ মূল লক্ষ্য হৈছে অসমৰ পৰম্পৰাগত মুগা আৰু এৰী শিল্পৰ সৈতে জড়িত লোকসকলক আধুনিক প্ৰযুক্তিৰে প্ৰশিক্ষিত কৰি তোলা আৰু তেওঁলোকৰ জীৱিকা সুৰক্ষিত কৰা।
দক্ষতা বৃদ্ধিৰ প্ৰশিক্ষণ আঁচনিৰ অধীনত অসমৰ মুগা আৰু পাটৰ শিপিনীসকলক বৈজ্ঞানিক পদ্ধতিৰে পলু পালন, সূতা কটা আৰু উন্নত মানৰ কাপোৰ বোৱাৰ প্ৰশিক্ষণ দিয়া হয়। যোৰহাটৰ কেন্দ্ৰীয় মুগা এৰী গৱেষণা আৰু প্ৰশিক্ষণ প্ৰতিষ্ঠানত (CMER&TI) সমৰ্থ ২.০-ৰ অধীনত ২৭০ ঘণ্টীয়া প্ৰশিক্ষণ কাৰ্যসূচী চলাই থকা হৈছে। যোৰহাটৰ কেন্দ্ৰীয় মুগা এৰী গৱেষণা আৰু প্ৰশিক্ষণ প্ৰতিষ্ঠানৰ প্ৰত্যক্ষ সহযোগত দক্ষতা বিকাশ কাৰ্যসূচীৰ অন্তৰ্গত প্ৰশিক্ষণ কলিয়াবৰৰ হাতীগাঁৱত এক প্ৰশিক্ষণ কেন্দ্ৰত চলি আছে।
সমৰ্থ আঁচনিৰ উদ্যোগত এই প্ৰশিক্ষণ কাৰ্যসূচীক অধিক ত্বৰান্বিত কৰিবলৈ, শিপিনী মহিলাসকলক অধিক আকৰ্ষিত কৰিবলৈ আয়োজিত সজাগতামূলক এক সভা অনুষ্ঠিত হয়। এই সভাত ভাগ লয় ভাৰতীয় ৰেচম বিভাগৰ বিজ্ঞানী ৰোশনলাল মীনা, যোৰহাটৰ কেন্দ্ৰীয় মুগা এৰী গৱেষণা আৰু প্ৰশিক্ষণ প্ৰতিষ্ঠানৰ কাৰিকৰী প্ৰশিক্ষক সীমান্ত শইকীয়া, এই কাৰ্যসূচী পৰিচালনা কৰা নেচনেল প্ৰেক্টিকেল চেণ্টাৰৰ সঞ্চালিকা প্ৰিয়ঙ্কা দাস আৰু কেন্দ্ৰটোৰ মুখ্য প্ৰশিক্ষক ৰুণমণি বৰা গায়নসহ বহুকেইজন সমল ব্যক্তিয়ে। এই সভাতেই কেন্দ্ৰটোত সমাপ্ত হোৱা দুটা গোটৰ প্ৰশিক্ষণৰ অন্তত ৬০গৰাকী প্ৰশিক্ষাৰ্থীক প্ৰমাণ পত্ৰ বিতৰণ কৰা হয়।
