দৰঙত একাপ (Darrang News) চাহৰ দাম সচৰাচৰ ১০ টকা৷ বিশেষ একাপ চাহৰ দাম ২০ টকা৷ কিন্তু আচৰিত হ’লেও সত্য যে, যোৱা পঞ্চায়ত নিৰ্বাচনৰ সময়ত দৰং জিলা আয়ুক্ত কাৰ্যালয়ৰ আমোলা-বিষয়াই খোৱা একাপ চাহৰ দাম শুনিলে আপুনিও আচৰিত হ’ব৷
কাৰণ ৰাইজৰ কৰ-কাটল সংগ্ৰহ কৰি প্ৰশাসন যন্ত্ৰ চলোৱা ড॰ হিমন্ত বিশ্ব শৰ্মাৰ চৰকাৰৰ দিনৰ একাপ ১০টকীয়া চাহৰ মূল্য হ’লগৈ ২৫০ টকা৷ ভূজিয়া আৰু কাজু বিস্কুটৰ সৈতে ছিপাঝাৰৰ মেছাৰ্ছ মেঘা এণ্টাৰপ্ৰাইজে যোগান ধৰা একাপ বিশেষ চাহৰ মূল্য ২৫০ টকা৷ এই ব্যবসায়ী প্ৰতিষ্ঠানটোৱে মাত্ৰ ৩৮০ কাপ চাহ পঞ্চায়ত নিৰ্বাচনৰ সময়ত যোগান ধৰাৰ নাম এইদৰে ৰাজকোষৰ পৰা সৰকাই ৯৫ হাজাৰ টকা৷
দৰং জিলাৰ ঔতলা বেছিমাৰীৰ গিতুমণি ডেকাই তথ্য জনাৰ অধিকাৰ আইনৰ জৰিয়তে লাভ কৰা তথ্যই এতিয়া জিলাখনত ব্যাপক প্ৰতিক্ৰিয়াৰ সৃষ্টি হৈছে৷ অভিযোগ মতে, অকল বিশেষ একাপ চাহৰ বাবেই নহয়, অন্যান্য সামগ্ৰীৰ ক্ষেত্ৰতো ব্যাপক খেলিমেলিৰ তথ্য পোহৰলৈ আহিছে৷
জিলা প্ৰশাসনৰ বৰমূৰীয়াৰ সেউজ সংকেতত এনে দুৰ্নীতি হোৱাৰ অভিযোগ উত্থাপিত হৈছে৷ ইপিনে ১৫নং ৰাষ্ট্ৰীয় ঘাইপথৰ বাইপাছৰ দাঁতিকাষৰীয়া অঞ্চলৰ ভূমিক আৰম্ভ হৈছে এখন মুকলি বজাৰ৷ আনহাতে, দৰঙৰ আটাইকেইটা ৰাজহ চক্ৰ বিষয়াৰ কাৰ্যালয়, জিলা আয়ুক্তৰ কাৰ্যালয়ত পুনৰ সক্ৰিয় হৈ পৰিছে দালাল চক্ৰ৷ তাৎপৰ্যপূৰ্ণ যে, দলগাঁও ৰাজহ চক্ৰত এজন জনপ্ৰতিনিধিৰ আশীৰ্বাদপুষ্ট জনৈক চৰকাৰী গাঁওবুঢ়া হৈ পৰিছে হৰ্তাকৰ্তা বিধাতা৷ এইজন সৰ্বশক্তিমান গাঁওবুঢ়াক নিয়ন্ত্ৰণ কৰিবলৈ অকল ৰাজহ চক্ৰ বিষয়াই নহয় জিলা প্ৰশাসনেও ভয় কৰা বুলি অভিযোগ উত্থাপিত হৈছে৷
