অসমৰ বিধানসভা নিৰ্বাচনক কেন্দ্ৰ কৰি ভাৰতীয় জনতা পাৰ্টীয়ে আজি নিজৰ প্ৰতিশ্ৰুতি-পত্ৰ ‘সংকল্প পত্ৰ ২০২৬’ মুকলি কৰে। গুৱাহাটীৰ বশিষ্ঠস্থিত বাজপেয়ী ভৱনত আয়োজিত এক অনুষ্ঠানত কেন্দ্ৰীয় বিত্তমন্ত্ৰী Nirmala Sitharaman-এ আনুষ্ঠানিকভাৱে এই সংকল্প পত্ৰ উন্মোচন কৰে।
অনুষ্ঠানত উপস্থিত থাকে অসমৰ মুখ্যমন্ত্ৰী Himanta Biswa Sarma, বিজেপিৰ ৰাজ্যিক সভাপতি Dilip Saikia আৰু কেন্দ্ৰীয় মন্ত্ৰী Sarbananda Sonowalসহ বহু শীৰ্ষ নেতা।
বিজেপিয়ে দাবী কৰে যে, ৰাইজৰ মতামতৰ ভিত্তিত এই সংকল্প পত্ৰ প্ৰস্তুত কৰা হৈছে। প্ৰায় ৩ লাখতকৈ অধিক লিখিত পৰামৰ্শ আৰু ২০ লাখ লোকৰ মতামত সংগ্ৰহ কৰি এই দস্তাবেজ তৈয়াৰ কৰা হৈছে।
সংকল্প পত্ৰত অসমৰ সামগ্ৰিক উন্নয়নৰ বাবে ৫ লাখ কোটি টকাৰ বিনিয়োগৰ লক্ষ্য নিৰ্ধাৰণ কৰাৰ লগতে খিলঞ্জীয়া লোকৰ অধিকাৰ আৰু সুৰক্ষাৰ ওপৰত বিশেষ গুৰুত্ব আৰোপ কৰা হৈছে।
সংকল্প পত্ৰ মুকলি কৰি নিৰ্মলা সীতাৰমণে কয় যে, “৬ দশকত কংগ্ৰেছে কৰিব নোৱাৰা বহু কাম বিজেপিয়ে মাত্ৰ ১০ বছৰত সম্পন্ন কৰিছে। ‘সুৰক্ষিত অসম, বিকশিত অসম’ গঢ়াৰ লক্ষ্যৰে বিজেপিয়ে কাম কৰি আহিছে।” তেওঁ উল্লেখ কৰে যে, অসম এতিয়া দেশৰ ভিতৰতে এটা দ্ৰুত বিকাশশীল অৰ্থনীতি হিচাপে পৰিগণিত হৈছে।
তেওঁ আৰু কয় যে, ৰাজ্যত ছেমিকণ্ডাক্টৰ প্ৰকল্প স্থাপনৰ জৰিয়তে উদ্যোগীকৰণৰ নতুন যুগৰ সূচনা হৈছে। লগতে জাগীৰোডত স্থাপন হোৱা এই প্ৰকল্পে বহু যুৱক-যুৱতীক সংস্থাপনৰ সুযোগ প্ৰদান কৰিছে।
ইয়াৰ উপৰি নুমলীগড় শোধনাগাৰত প্ৰায় ৩৪ হাজাৰ কোটি টকা বিনিয়োগ, নামৰূপত ইউৰীয়া সাৰ কাৰখানাত ১০ হাজাৰ কোটি টকাৰ অধিক বিনিয়োগ আদি উন্নয়নমূলক প্ৰকল্পৰ কথাও তেওঁ উল্লেখ কৰে।
বিজেপিয়ে ডাবল ইঞ্জিন চৰকাৰৰ অধীনত অসমত দ্ৰুতগতিত উন্নয়ন সাধিত হৈছে বুলি দাবী কৰি আগন্তুক নিৰ্বাচনত ৰাইজৰ সমৰ্থন বিচাৰে।
