অসমীয়াত ১০০ৰ ভিতৰত ১০০ নম্বৰ, ছয়টা বিষয়ত লেটাৰ মাৰ্ক; গাঁওবাসীৰ মাজত আনন্দৰ পৰিবেশ
সদ্য ঘোষিত হাইস্কুল শিক্ষান্ত পৰীক্ষাৰ ফলাফলত এশ শতাংশ উত্তীৰ্ণ হোৱাৰ গৌৰৱ অৰ্জন কৰি উজলি উঠিছে মৰিগাঁও জিলাৰ বালিগাঁওস্থিত জাতীয় বিদ্যালয়, ৰঙাদৰিয়া। ২০০৪ চনত স্থাপিত এই বিদ্যালয়খনে চলিত বৰ্ষতো উৎকৃষ্ট ফলাফল প্ৰদৰ্শন কৰি নিজৰ শৈক্ষিক মানদণ্ড পুনৰবাৰ প্ৰতিষ্ঠা কৰিবলৈ সক্ষম হৈছে।
এইবাৰ বিদ্যালয়খনৰ মাজৰ পৰা উজ্জ্বল সফলতা অৰ্জন কৰা ছাত্ৰী মেহেনাজ চুলতানাই ৮৯.৬ শতাংশ নম্বৰ লাভ কৰি ডিষ্টিংশ্যনসহ উত্তীৰ্ণ হৈছে। তেওঁ ছয়টা বিষয়ত লেটাৰ মাৰ্ক লাভ কৰাৰ লগতে অসমীয়া বিষয়ত ১০০ নম্বৰৰ ভিতৰত পূৰ্ণ ১০০ নম্বৰ লাভ কৰি এক বিশেষ কৃতিত্ব অৰ্জন কৰিছে।
মেহেনাজ চুলতানা এজন সাধাৰণ খেতিয়ক মহিদুল ইছলাম আৰু গৃহিণী আনোৱাৰা বেগমৰ কন্যা। মৰিগাঁও জিলাৰ চতৰিবড়ী গাঁৱৰ বাসিন্দা এই কৃতী ছাত্ৰীগৰাকীয়ে নিজৰ সফলতাৰ জৰিয়তে বিদ্যালয়খনৰ লগতে নিজ গাঁওলৈ গৌৰৱ কঢ়িয়াই আনিছে।
ছাত্ৰী গৰাকীৰ এই অসাধাৰণ সফলতাত উৎফুল্লিত হৈ পৰিছে গাঁওবাসী। চতৰিবড়ীৰ ৰাইজে মেহেনাজক লৈ গভীৰ গৌৰৱ অনুভৱ কৰাৰ লগতে উজ্জ্বল ভৱিষ্যতৰ বাবে আশীৰ্বাদ জনাইছে।
ইফালে, মেহেনাজ চুলতানাৰ এই কৃতিত্বক স্বীকৃতি জনাই ভ্ৰাম্যমাণ থিয়েটাৰ জগতৰ জনপ্ৰিয় অভিনেত্ৰী প্ৰস্তুতি পৰাশৰে থিয়েটাৰৰ মঞ্চত তেওঁক আদৰণি জনায়। আনহাতে, সদৌ অসম গৰিয়া জাতীয় পৰিষদেও ছাত্ৰীগৰাকীৰ বাসগৃহত উপস্থিত হৈ শুভেচ্ছা জ্ঞাপন কৰাৰ খবৰ পোৱা গৈছে।
উল্লেখযোগ্য যে, সীমিত সুবিধাৰ মাজতো এনে সফলতা অৰ্জন কৰা এই ছাত্ৰীগৰাকীৰ প্ৰচেষ্টা আৰু অধ্যৱসায়ে আন শিক্ষাৰ্থীসকলৰ বাবে প্ৰেৰণাৰ উৎস হৈ পৰিছে। বিদ্যালয়খনৰ এই সাফল্যই অঞ্চলটোৰ শিক্ষা ক্ষেত্ৰত নতুন আশাৰ সঞ্চাৰ কৰিছে।
