Sarbananda Singha । মটক ৰাজ্যৰ প্ৰতিষ্ঠাপক স্বৰ্গদেউ সৰ্বানন্দ সিংহৰ ২২৪ সংখ্যক মৃত্যু দিৱস উপলক্ষ্য ২৪ মে’ দেওবাৰে গুৱাহাটীৰ বামুণীমৈদামত মটক জনগোষ্ঠীৰ গুৱাহাটীবাসী ৰাইজ আৰু মটক জনগোষ্ঠী গৱেষণা আৰু বিকাশ সংস্থাৰ উদ্যোগত ২২৪ সংখ্যক স্বৰ্গদেউ সৰ্বানন্দ সিংহ দিৱস দিনজোৰা কাৰ্যসূচীৰে উদ্যাপন কৰা হয়৷ পুৱা বন্তি প্ৰজ্বলন অনুষ্ঠানেৰে আৰম্ভ হোৱা এই কাৰ্যসূচীত বন্তি প্ৰজ্বলনৰ পিছতে সমাজৰ বিভিন্ন ক্ষেত্ৰত অৱদান আগবঢ়োৱা কেইবাগৰাকীও বিশিষ্ট ব্যক্তিক মটক জনগোষ্ঠীয় গামোচা, সম্বৰ্ধনা পত্ৰ আৰু ৰজাৰ প্ৰতিকৃতিৰে সম্বৰ্ধনা জনোৱা হয়৷
অনুষ্ঠানত সম্বৰ্ধিত ব্যক্তিসকল হৈছে ক্ৰমে অৱসৰপ্ৰাপ্ত অভিযন্তা ভোগেশ্বৰ বৰুৱা, আসাম ট্ৰিবিউন কাকতৰ প্ৰাক্তন কাৰ্যবাহী সম্পাদক তথা জ্যেষ্ঠ সাংবাদিক প্ৰশান্তজ্যোতি বৰুৱা, প্ৰাক্তন বিষয়া তথা সাহিত্য-সংস্কৃতিৰ সৈতে জড়িত ভোলা গোহাঁই, সমাজসেৱিকা ৰঞ্জিতা মৰাণ, তিনিচুকীয়া সমষ্টিৰ বিধায়ক পুলক গোহাঁই আদি৷ অনুষ্ঠানত এইকেইগৰাকী বিশিষ্ট ব্যক্তিৰ উপৰিও আন ভালেকেইগৰাকী ব্যক্তিক সম্বৰ্ধনা জনোৱা হয়৷
এই অনুষ্ঠানতে দ্য আসাম ৰাইজিং কাকতৰ কাৰ্যবাহী সম্পাদক দুলাল মিশ্ৰ, ডি বি নিউজৰ কাৰ্যবাহী সম্পাদক নৱজ্যোতি কলিতা, সাংবাদিক পৰমা সোণোৱাল, সংবাদকৰ্মী সুনীল বড়ো, কমল সৰকাৰক সম্বৰ্ধনা জনোৱা হয়৷ সৰ্বানন্দ সিংহ দিৱসৰ অনুষ্ঠানত উপস্থিত থাকি তিনিচুকীয়া সমষ্টিৰ বিধায়ক পুলক গোহাঁইয়ে মটক জনগোষ্ঠী গৱেষণা আৰু বিকাশ সংস্থা আৰু গুৱাহাটীবাসী মটক জনসাধাৰণৰ এনে প্ৰচেষ্টাক প্ৰশংসা কৰে৷ বিধায়কগৰাকীয়ে কয় যে অসম নানা জাতি-উপজাতিৰে পৰিপূৰ্ণ ৰাজ্য৷
এই ৰাজ্যখনত মটক ৰজাই সহজে ব্ৰিটিছৰ ওচৰত সেও মনা নাছিল৷ ব্ৰিটিছৰাজৰ সৈতে চামিল হোৱা মটক ৰাজ্যই একেবাৰে অন্তিম ৰাজ্য আছিল বুলি বিধায়ক গোহাঁইয়ে মন্তব্য কৰে৷ মটক সংস্কৃতি তথা জনগোষ্ঠীটোৰ সৈতে জড়িত ঐতিহাসিক সমলসমূহ সংৰক্ষণৰ বাবে আমাৰ চৰকাৰে সকলোধৰণৰ ব্যৱস্থা গ্ৰহণ কৰা হ’ব বুলিও বিধায়কগৰাকীয়ে তেওঁৰ ভাষণত উল্লেখ কৰে৷ অনুষ্ঠানত উপস্থিত থাকি মটক জনগোষ্ঠী গৱেষণা আৰু বিকাশ সংস্থাৰ আহ্বায়ক তথা দৈনন্দিন বাৰ্তা গোষ্ঠীৰ পৰিচালন সঞ্চালক শংকৰ গোহাঁইয়ে কয় যে এতিয়াৰ তিনিচুকীয়াই আছিল মটক ৰাজ্যৰ ৰাজধানী বেংমৰা৷ ৰজা সৰ্বানন্দ সিংহই নানান প্ৰত্যাহ্বান নেওচি সকলো জাতি-জনগোষ্ঠীকে সামৰি লৈ মটক ৰাজ্য গঠন কৰিছিল৷ ৰজা সৰ্বানন্দ সিংহৰ ৰাজত্বকালতেই ৰাজতন্ত্ৰত গণতান্ত্ৰিক শাসন ব্যৱস্থাৰ বীজ ৰোপণ কৰিছিল আৰু সকলোৱে সম অধিকাৰ লগতে সমস্যাসমূহ তৎকালীনভাৱে সমাধানৰ বাবে এখন পাৰিষদ গঠন কৰি পাৰিষদৰ মতামত অনুসৰি ৰাজশাসন চলাইছিল বুলি শংকৰ গোহাইয়ে মন্তব্য কৰে৷ অনুষ্ঠানত সদৌ অসম মটক সন্মিলনৰ সহকাৰী সম্পাদক জীৱন কোঁৱৰকে ধৰি মটক জনগোষ্ঠীৰ বহুকেইটা সংগঠনৰ প্ৰতিনিধিয়ে অংশগ্ৰহণ কৰে৷ উল্লেখ্য ওঠৰ শতিকাৰ শেষভাগত অসমত সংঘটিত হোৱা ঐতিহাসিক মোৱামৰীয়া বিদ্ৰোহৰ সফল সেনা নায়কজনেই হৈছে স্বৰ্গদেউ সৰ্বানন্দ সিংহ৷ উক্ত গণবিদ্ৰোহৰ পৰিণতি হিচাপে উজনি অসমৰ অবিভক্ত ডিব্ৰুগড় জিলাৰ ভৌগোলিক পৰিসীমাত জন্ম হয় স্বাধীন মটক ৰাজ্যৰ৷ উল্লেখ্য যে বেংমৰা পুখুৰী, তিনিকোণীয়া পুখুৰী, দেৱী পুখুৰী, চাউলধোৱা পুখুৰী আদি জলসিঞ্চন তথা মৎস্য পালনৰ বাবে ৰাজধানীৰ ভিতৰে বাহিৰে মুঠ ২৪ টা পুখুৰী খন্দাইছিল স্বৰ্গদেউ সৰ্বানন্দ সিংহই৷
স্বৰ্গদেৱে শাসনত অধিষ্ঠিত হৈয়ে মটক ৰাজ্যখনৰ বিভিন্ন প্ৰান্তত বসবাস কৰা জনগোষ্ঠীটোৰ মুৰব্বী ব্যক্তিসকলৰ মতামত গ্ৰহণেৰে ৰাজদৰবাৰ পৰিচালনাৰ ব্যৱস্থা কৰি এক গণতান্ত্ৰিক আদৰ্শ প্ৰতিষ্ঠা কৰিছিল৷ দেওবাৰে, মটক জনগোষ্ঠী গুৱাহাটীবাসী ৰাইজ আৰু মটক জনগোষ্ঠী গৱেষণা আৰু বিকাশ সংস্থাৰ উদ্যোগত ২২৪ সংখ্যক স্বৰ্গদেউ সৰ্বানন্দ সিংহ দিৱসটো অনুষ্ঠিত কৰে৷ অনুষ্ঠানত আঁত ধৰে মটক স্বায়ত্বশাসিত পৰিষদৰ কাৰ্যবাহী সদস্য নৱজ্যোতি শইকীয়াই৷ স্বৰ্গদেউ সৰ্বানন্দ সিংহৰ প্ৰতিচ্ছবিত মাল্যাৰ্পণ কৰাৰ লগতে মটক ৰাজ্যৰ প্ৰতিষ্ঠা কৰা স্বৰ্গদেউ সৰ্বানন্দ সিংহৰ কৰ্মৰাজিৰ বিষয়ে বিভিন্ন জনে আলোকপাত কৰে৷ ইয়াৰ উপৰিও বৰ্তমানেও সামাজিক আৰু অৰ্থনৈতিক দিশত যিদৰে উন্নতি হ’ব লাগিছিল নোহোৱাত মটক জনগোষ্ঠীৰ কাৰণ সম্পৰ্কেও আলোচনা হয়৷ উক্ত অনুষ্ঠানত উপস্থিত থাকে– মটক স্বায়ত্ত্বশাসিত পৰিষদৰ কাৰ্যবাহী সদস্য অমূল্য সেনাপতি, দেৱকান্ত বৰুৱা, তৰুণ গগৈৰ লগতে বহু বিশিষ্ট ব্যক্তি৷
