তৈলনগৰী ডিগবৈ চহৰৰ পাৰ্শ্ব্ৱ্তী অঞ্চল বৰজান গাওঁৰ শিশু প্ৰতিভা বিকাশ কেন্দ্ৰ বৰজানৰ উদ্যোগত গ্ৰীষ্মকালীন বন্ধৰ উপলক্ষে কণ কণ শিশু সকলৰ দক্ষতা বিকাশ কৰাৰ উদ্দেশ্যে আয়োজন কৰা নাচ আৰু গানৰ ১৫ দিনীয়া কৰ্মশালা সামৰণি পৰে৷বৰজান মধ্য ইংৰাজী বিদ্যালয়ত যোৱা এক জুলাইৰ পৰা ১৫ জুলাইলৈ পোন্ধৰ দিনীয়াকৈ আয়োজন কৰা কৰ্মশালাখনিত জ্যোতি সংগীত ,ৰাভা সংগীত, ভূপেন্দ্ৰ সংগীতৰ প্ৰশিক্ষণ প্ৰদান কৰিছে ডিব্ৰুগড় জিলাৰ ভাদৈ পাঁচআলিৰ প্ৰশিক্ষক ঘনশ্যাম চেতিয়া আৰু চুইটি চেতিয়াই৷ আনহাতে আধুনিক নাচৰ প্ৰশিক্ষণ প্ৰদান কৰিছে ডিগবৈ ডাঞ্চৰ অগ্ৰণী প্ৰতিষ্ঠান নৰ্ট ইষ্ট অৰ্কিড ডাঞ্চ একাডেমিৰ প্ৰশিক্ষক ৰবি গোৱালায়ে৷
গ্ৰীষ্মকালিন বন্ধ চলি থকাৰ সামন্তৰালভাৱে শিশু দক্ষতা বিকাশ কেন্দ্ৰ বৰজান উদ্যোগত অনুষ্হিত কৰা পোন্ধৰদিনীয়া কৰ্মশালাখনিত যথেষ্ট সংখ্যক প্ৰশিক্ষাৰ্থীসকলে অংশগ্ৰহণ কৰা পৰিলক্ষিত হয়৷১৫ দিনীয়া গান আৰু নাচ কৰ্মশালাখনিৰ সামৰণি অনুষ্ঠানত,কৰ্মশালাত প্ৰশিক্ষণ গ্ৰহণ কৰা ছাত্ৰ ছাত্ৰীসকলে সমবেত সংগীত ,ৰাভা সংগীত , জ্যোতি সংগীত আৰু ভূপেন্দ্ৰ সংগীত পৰিৱেশন কৰাৰ লগতে দলীয় নৃত্য আৰু একক নৃত্য পৰিৱেশন কৰে৷
শিশু দক্ষতা বিকাশ কেন্দ্ৰ বৰজানৰ তৰফৰ পৰা লোৱা এনে প্ৰশংসনীয় পদক্ষেপক সমুহ ৰাইজে শলাগ জ্ঞাপন কৰাৰ লগতে উঠি অহা কণ কণ ছাত্ৰ-ছাত্ৰীসকলৰ উদ্দেশ্যে আগন্তুক দিনতো বিভিন্ন সৃষ্টিশীল প্ৰতিভা বিকাশ কৰিব পৰাকৈ পদক্ষেপ গ্ৰহণ কৰি থাকিবলৈ আহ্বান জনাইছে৷
