গোৱালপাৰা, জুলাই ২: Acharya Pankaj Pathak গোৱালপাৰাৰ বিহু ফিল্ডত অনুষ্ঠিত এখন শিবিৰৰ সময়ছোৱাত আচাৰ্য পংকজ পাঠক পুনৰ বিতৰ্কৰ কেন্দ্ৰবিন্দু হৈ পৰিছে। শিবিৰত অংশগ্ৰহণ কৰা সময়তে আচাৰ্য পাঠকৰ বিৰুদ্ধে এগৰাকী মহিলাৰ সৈতে অশালীন ব্যৱহাৰৰ অভিযোগ উত্থাপন কৰা হৈছে।
ঘটনাটোৰ প্ৰতিবাদ জনাই গোৱালপাৰা বিহু সন্মিলনীৰ সম্পাদক তপন চক্ৰৱৰ্তীয়ে যেতিয়া প্ৰতিক্ৰিয়া প্ৰকাশ কৰে, তেতিয়া আচাৰ্য পাঠকে তেখেতক শাৰীৰিকভাৱে আক্ৰমণ কৰে বুলি অভিযোগ। স্থানীয় ৰাইজৰ মতে, এই আক্ৰমণত আচাৰ্য পাঠকৰ সহযোগীসকলো জড়িত আছিল।
অঘটনৰ পাছত শিৱিৰত উপস্থিত ৰাইজৰ মাজত তীব্ৰ ক্ষোভৰ সৃষ্টি হয়। ৰাইজে আচাৰ্য পংকজ পাঠকক ঘটনাস্থলীতেই আবদ্ধ কৰি ৰাখে আৰু তেওঁৰ পৰা কাণত ধৰি আঁঠু কাঢ়ি ক্ষমা খুজিবলৈ বাধ্য কৰে।
এই ঘটনাই আচাৰ্য পংকজ পাঠকৰ বিতৰ্কিত ভাবমূৰ্তি আৰু একে সময়তে তেওঁক লৈ উদ্ভৱ হোৱা নানা সন্দেহ পুনৰবাৰ চৰ্চাৰ কেন্দ্ৰস্থলত লৈ আহিছে। স্থানীয় ৰাইজ আৰু সামাজিক মাধ্যমত ইতিমধ্যেই ঘটনাটো লৈ তীব্ৰ প্ৰতিক্ৰিয়া প্ৰকাশ পোৱা গৈছে।
