দেওবাৰে বৈঠালাংছ’ৰ ছেৰদিহুন আক্লাম ক্ষেত্ৰতো ১১২নং আমৰি বিধানসভা সমষ্টিৰ বিজেপিৰ প্ৰাৰ্থী ডাঃ হাবে টেৰণৰ হৈ নিৰ্বাচনী প্ৰচাৰ কাৰ্যসূচীত অংশগ্ৰহণ কৰে মুখ্যমন্ত্ৰী হিমন্ত বিশ্ব শৰ্মাই৷ অনুষ্ঠানত এপিএইচএলচি দলৰ সভাপতি জে আই কাথাৰক তীব্ৰ সমালোচনাৰে থকা-সৰকা কৰি কয় যে কাথাৰ পাৰ্টীয়ে উন্নয়ন কৰিব নোৱাৰে, মাথোঁ আন্দোলনহে কৰিব পাৰে৷ মানুহৰ লগত মানুহৰ কাজিয়া কৰাব পাৰে, ধৰ্ণা-ধৰ্মঘট কৰিব পাৰে আৰু মাজে মাজে কাপোৰ খুলিও আন্দোলন কৰিব পাৰে৷ মামাই ল’ৰা-ছোৱালীক ডাক্তৰ-ইঞ্জিনিয়াৰ, কমাণ্ডো-বেটেলিয়ন, তৃতীয়-চতুৰ্থ বৰ্গৰ চাকৰিয়াল আদিহে বনাব পাৰে বুলি মন্তব্য কৰে৷ তদুপৰি কাথাৰৰ ল’ৰা-ছোৱালীয়ে আন্দোলন নকৰে, গুৱাহাটী-দিল্লীত থাকে, ময়ো আমাৰ ল’ৰা-ছোৱালীক গুৱাহাটী-দিল্লীলৈ পঠাব বিচাৰো বুলি ভাষণত সদৰী কৰে মুখ্যমন্ত্ৰীগৰাকীয়ে৷ ইয়াৰ পিছতে সাংবাদিকৰ সৈতে হোৱা বাৰ্তালাপত অখিল গগৈক হত্যাকাৰীৰ হিচাব ৰখা তথা যমে পঠোৱা চিত্ৰগুপ্ত আখ্যা দিয়ে৷
যিয়ে অখিল গগৈৰ বিৰোধিতা কৰে তেওঁকে হত্যাকাৰী সজায়৷ যিজনে নিজেই প্ৰণৱ বড়োক হত্যা কৰিছিল, তেৱেঁই এতিয়া আনকহে হত্যাকাৰী সজায়৷ প্ৰণৱ বড়ো কেনেকৈ শ্বহীদ হ’ল, কোনে গোটেই ৰাতি গাত তেল ঢালি জুই লগাই প্ৰতিবাদ কৰিবলৈ উচটাইছিল মই কি নাজানো৷ অখিলে নিজে জ্বলিব লাগিছিল নে প্ৰণৱ বড়োক উচটাব লাগিছিল৷ আনকি, বিধানসভাতো যোৱা পাঁচটা বছৰে প্ৰণৱ বড়োৰ বিষয়টো কিয় এবাৰো উত্থাপন নকৰিলে৷ কোনোবাই যদি তেওঁৰ বিৰুদ্ধে কয় তেন্তে তেওঁ কয় অমুকে ইমানটা হত্যা কৰিছে, তমুকে তিমানটা হত্যা কৰিছে বুলি দোষ জাপি দিয়ে৷ তুমি নিজেই কিমান হত্যা কৰিছা তাৰ হিচাব নিজে দিব লাগিব, তোমাৰ পাপৰ হিচাব তুমি নিজেই দিব লাগিব৷ অখিলে গোটেই অসমখন জ্বলাই ৰাখিছে৷ অসমৰ ল’ৰা-ছোৱালীক টায়াৰ জ্বলাব শিকায়, ৰে’ল লাইন উৰুৱাবলৈ শিকায়৷ আনকি মহাত্মা গান্ধীয়েও যদি তেওঁক বেয়া বুলি কয় মহাত্মা গান্ধীয়েও দুটা হত্যা কৰিছে বুলি কৈ দিব বুলি শৰ্মাই সদৰী কৰে৷ অসমৰ উন্নয়ন অখিল গগৈৰ কাম্য নহয়, মাথোঁ আন্দোলন, হিংসা, বিদ্বেষ আদিয়েই অখিলৰ মূল উদ্দেশ্য৷ তেওঁৰ বিৰুদ্ধে যিয়ে নিৰ্বাচনত প্ৰতিদ্বন্দ্বিতা কৰে তেওঁকেই হত্যাকাৰী সজায় বুলি ক্ষুৰধাৰ সমালোচনা কৰে মুখ্যমন্ত্ৰী হিমন্ত বিশ্ব শৰ্মাই৷
