নেপালৰ দৰে (Amit Shah) ভাৰততো জেন জিৰ প্ৰতিবাদ হব পাৰে বুলি একাংশ লোকে কৰি অহা আশংকাৰ মাজতে কেন্দ্ৰীয় গৃহমন্ত্ৰী অমিত শ্বাহে এনে আশংকাৰ কথা পোণচাটেই নাকচ কৰিছে৷ বিহাৰ বিধানসভা নিৰ্বাচনৰ প্ৰাক্-মুহূৰ্তত কেন্দ্ৰীয় গৃহমন্ত্ৰী অমিত শ্বাহে নেপালত সংঘটিত হোৱা জেন-জি প্ৰতিবাদ সন্দৰ্ভত এক গুৰুত্বপূৰ্ণ মন্তব্য কৰিছে৷
সংবাদ মাধ্যমৰ আগত নিজৰ মত প্ৰকাশ কৰি গৃহমন্ত্ৰীগৰাকীয়ে দৃঢ়তাৰে কয় যে, নেপালত যি ধৰণৰ ব্যৱস্থাৰ বিৰুদ্ধে যুৱক-যুৱতীসকলে বিদ্ৰোহ কৰিছে, সেয়া ভাৰতত কেতিয়াও সম্ভৱ নহয়৷ শ্বাহে লগতে কয় যে, ভাৰতৰ গণতন্ত্ৰ অতি গভীৰভাৱে শিপাই আছে আৰু ই যথেষ্ট শক্তিশালী৷ তেওঁ স্পষ্টকৈ কয়, ‘ভাৰত নেপাল নহয়, আমাৰ গণতান্ত্ৰিক শিপা অতি শক্তিশালী৷ ইয়াত জেন জেডৰ প্ৰতিবাদ সম্ভৱ বুলি মই নাভাবো৷ আমাৰ দেশৰ যুৱক-যুৱতীসকলে কঠোৰ পৰিশ্ৰম কৰি দেশৰ উন্নয়নত অৰিহণা যোগায়৷’
বিহাৰৰ নিৰ্বাচন সন্দৰ্ভত অমিত শ্বাহে কয়-যদি বিহাৰৰ ভোটাৰে মহাজোঁট বাছি লোৱাৰ ভুল কৰে, তেন্তে নিশ্চিতভাৱে ‘জংগল ৰাজ’ বিহাৰলৈ ঘূৰি আহিব৷
