খ্ৰীষ্টিয় নৱবৰ্ষৰ পহিলা দিনটোত পুথিপ্ৰেমীৰ উৎসাহজনক সমাৱেশ হয় অসম প্ৰকাশন পৰিষদ আৰু সদৌ অসম পুথি প্ৰকাশক আৰু বিক্ৰেতা সংস্থাই যৌভভাৱে খানাপাৰাস্থিত পশু চিকিৎসা মহাবিদ্যালয় খেলপথাৰত আয়োজন কৰা অসম গ্ৰন্থমেলা, গুৱাহাটীত ৷ (Assam Book Fair)
পুৱা গ্ৰন্থমেলাৰ দ্বাৰ মুকলি কৰাৰ পৰা আৰম্ভ হোৱা জনস্ৰোতে সন্ধিয়ালৈ বিৰদি বাট নোপোৱা অৱস্থাৰ সৃষ্টি কৰে খানাপাৰা বাকৰি ৷ নতুন বছৰৰ প্ৰথম দিনটো গ্ৰন্থৰ সান্নিধ্যৰে আদৰিবলৈ পুথিপ্ৰেমী বিদ্বৎ সমাজ , জ্ঞানান্বেষী শিক্ষাৰ্থী আৰু লেখক-সাহিত্যিকৰ সমাৱেশে অসম গ্ৰন্থমেলা, গুৱাহাটীত উছৱমুখৰ পৰিৱেশ সৃষ্টি কৰে ৷ বিপণীত হেঁপাহৰ গ্ৰন্থ ক্ৰয় কৰি নৱবৰ্ষ ২০২৫ক স্বাগত জনায় পঢ়ুৱৈ সমাজে ৷ বুধবাৰে কিতাপ বিক্ৰীও আশাব্যঞ্জক বুলি সদৰী কৰিছে অসম প্ৰকাশন পৰিষদৰ লগতে আন আন প্ৰকাশন গোষ্ঠীসমূহে ৷ ইপিনে বিয়লি ১ বজাত অসম প্ৰকাশন পৰিষদে গ্ৰন্থমেলাৰ অস্থায়ী প্ৰেক্ষাগৃহত আয়োজন কৰে আকৰ্ষণীয় অনুষ্ঠান লেখক-পাঠকৰ সমাৰোহ “উন্মীলন”৷ এই অনুষ্ঠান উদ্বোধন কৰে মহানগৰীৰ আৰক্ষী আয়ুক্ত, কবি-লেখক ড° পাৰ্থ সাৰথি মহন্তই ৷ তেওঁ কয় যে গ্ৰন্থমেলা সদায়ে বৌদ্ধিক চৰ্চাৰ থলী হিচাপে বিবেচিত হৈ আহিছে ৷ কিতাপৰ সান্নিধ্যই মনলৈ এক পবিত্ৰতা আনি দিয়ে ৷ কাৰণ কিতাপৰ মাজেৰেই আমাৰ ভাষা-সাহিত্য জীয়াই থাকে, ভাষা-সাহিত্য আগবাঢ়ে ৷ নিজৰ ভাষাটোক অৰ্থাৎ মাতৃভাষাক সন্মান কৰা, শুদ্ধভাৱে চৰ্চা আৰু প্ৰয়োগ কৰাটো আমাৰ সকলোৰে দায়িত্ব ৷ নিজৰ ভাষাটোকলৈ আমি গৌৰৱ কৰিব পৰা মানসিকতা গঢ়ি তুলিব লাগিব ৷ ইয়াত বিশিষ্ট অতিথিৰূপে অংশগ্ৰহণ কৰে কলকতাৰ বিশিষ্ট লেখক বিনোদ ঘোষালে ৷ তেওঁ নিজৰ জীৱন সংগ্ৰামৰ বিষয়ে উল্লেখ কৰি কয় কেনেদৰে দোকানত কাম কৰিছিল, আনৰ ঘৰৰ বজাৰৰ হিচাপ ৰাখি জীৱন নিৰ্বাহ কৰিছিল আৰু কষ্টকৰ দৈনন্দিন জীৱন-যাত্ৰাৰ মাজতো লিখাৰ অনুশীলন কৰিছিল ৷ তেওঁ নতুন লেখকসকলক উদ্দেশ্যি কয়—“কলমটোৰ ভুল ব্যৱহাৰ কৰিব নালাগে ৷ নিজৰ যি বিশ্বাস সেয়াহে লিখিব লাগে ৷ যি কথা নিজে বিশ্বাস নকৰে সেয়া লিখা অনুচিত ৷” অনুষ্ঠানটি আকৰ্ষণীয়ৰূপত সঞ্চালনা কৰে বিশিষ্ট সাংবাদিক-লেখক অচ্যুৎ কুমাৰ পাটোৱাৰীয়ে ৷ তেওঁ “উন্মীলন”ত অংশগ্ৰহণ কৰা নতুন লেখকসকলৰ গল্প, কবিতা, নিৱদ্ধৰ বিভিন্ন দিশ আলোচনাৰ মাজলৈ আনে ৷ তেওঁ কয় যে নতুন লেখকসকল নিজৰ ভাষাটোৰ প্ৰতি সজাগ হোৱা উচিত ৷নিজৰ ভাষাটো ভুলকৈ ব্যৱহাৰ কৰাটো অত্যন্ত দুখজনক ৷ তেওঁ গ্ৰন্থমেলাত যুৱ-লেখকসকলৰ বাবে এনে এটা অনুষ্ঠানৰ আয়োজন কৰি নতুন লেখকসকলক ভাষা-সাহিত্যৰ ক্ষেত্ৰখনলৈ উলিয়াই অনাৰ প্ৰয়াস আদৰণীয় ৷ “উন্মীলন”ত অংশগ্ৰহণ কৰা যুৱ-লেখকসকল হৈছে সৃঞ্জনা শৰ্মা, কৌশিকী গোস্বামী, সংকল্পজিৎ শইকীয়া, হেমন্ত বৰা, হৰ্ষিতা হিয়া, ৰ’দালি চেতিয়া, দিগন্ত নিৱিড়, প্ৰাণজিৎ কোঁচ, ছেল্ফ মেড ৰাণী, বৰষাৰাণী বৰা,অন্তৰীপ কাকতি আদি যুৱ প্ৰজন্মৰ গল্পকাৰ, কবি, নিৱন্ধকাৰসকলে ৷
গজেন্দ্ৰ চিন্তামণি, জ্যোতিষ উন্মোচন
খানাপাৰাৰ পশু চিকিৎসা মহাবিদ্যালয় খেলপথাৰত অনুষ্ঠিত হৈ থকা অসম গ্ৰন্থমেলা, গুৱাহাটীত আজি দুখন গুৰুত্বপূৰ্ণ গ্ৰন্থ উন্মোচিত হয় ৷ ৰাজ্য চৰকাৰৰ বুৰঞ্জী আৰু পুৰাতত্ত্ব সঞ্চালকালয়ে প্ৰকাশ কৰা গ্ৰন্থ দুখন হৈছে জামুগুৰিৰ ত্যাগবীৰ হেম বৰুৱা মহাবিদ্যালয়ৰ পদাৰ্থ বিজ্ঞান বিভাগৰ সহযোগী অধ্যাপক ড° ৰাস্না ৰাজখোৱাই সম্পাদনা কৰা “গজেন্দ্ৰ চিন্তামণি” আৰু “জ্যোতিষ” ৷ “গজেন্দ্ৰ চিন্তামণি” উন্মোচন কৰে অসম প্ৰকাশন পৰিষদৰ সচিব প্ৰমোদ কলিতাই ৷ তেওঁ কয় যে অসম গ্ৰন্থমেলাৰ বাকৰিত উন্মোচিত গুৰুত্বপূৰ্ণ গ্ৰন্থসমূহৰ ভিতৰত “গজেন্দ্ৰ চিন্তামণি” অন্যতম ৷ অসম প্ৰকাশন পৰিষদে এই মূল্যৱান পুথিখনৰ ইংৰাজী সংস্কৰণৰ কামো সম্পূৰ্ণ কৰি তুলিছে ৷ অচিৰেই গ্ৰন্থখনে প্ৰকাশৰ মুখ দেখা পাব৷
“জ্যোতিষ” গ্ৰন্থখন উন্মোচন কৰে কলকতাৰ বিশিষ্ট লেখক বিনোদ ঘোষালে ৷ তেওঁ কয় যে গ্ৰন্থ এখন উন্মোচন হোৱা মানেই মানৱ সভ্যতালৈ শুভবাৰ্তা ৷ গ্ৰন্থমেলাসমূহ দৰাচলতে জ্ঞানৰ মেলা ৷ কাৰণ কিতাপৰ মাজেৰে ইয়াত জ্ঞানৰ দুৱাৰ মুকলি কৰা হয় ৷ গ্ৰন্থ উন্মোচনী অনুষ্ঠানত অংশগ্ৰহণ কৰে ৰাজ্য চৰকাৰৰ বুৰঞ্জী আৰু পুৰাতত্ত্ব সঞ্চালকালয়ৰ ভাৰপ্ৰাপ্ত সঞ্চালক ড° সংগীতা গগৈয়ে ৷ তেওঁ কয় যে মুখ্যমন্ত্ৰী ড° হিমন্ত বিশ্ব শৰ্মাই নৱবৰ্ষ ২০২৫ক কিতাপৰ বছৰ বুলি কৰা ঘোষণাৰে সংগতি ৰাখি বছৰৰ পহিলা দিনটোতে আজি এই গ্ৰন্থ দুখন উন্মোচন কৰা হৈছে ৷ এই দুয়োখন পুথি পুৰনি সাঁচিপতীয়া পুথিৰ পৰা পাঠ সংগ্ৰহ কৰি সম্পাদনা কৰা বুলি সদৰী কৰে ড° গগৈয়ে ৷ বিশিষ্ট সাংবাদিক-লেখক অচ্যুৎ কুমাৰ পাটোৱাৰীয়েও অংশগ্ৰহণ কৰা গ্ৰন্থ উন্মোচনী অনুষ্ঠানটিৰ আঁত ধৰে লেখক-সাংবাদিক নৱজ্যোতি পাঠকে ৷