ডিব্ৰুগড়, ২৩ জুলাইঃASSAM CABINET
অসম চৰকাৰৰ কেবিনেটে আজি অনুষ্ঠিত ডিব্ৰুগড় বৈঠকত এক গুৰুত্বপূৰ্ণ আৰ্থিক সিদ্ধান্ত গ্ৰহণ কৰিছে। মুখ্যমন্ত্ৰী হিমন্ত বিশ্ব শৰ্মাই সংবাদমেলত ঘোষণা কৰে যে, ৰাজ্য চৰকাৰে বিশ্ববেংকৰ পৰা ২,৭৫০ কোটি টকাৰ ঋণ লোৱাৰ সিদ্ধান্ত লৈছে। এই ধনৰ মূল লক্ষ্য হ’ল ৰাজ্যৰ শিক্ষাখণ্ডৰ আধুনিকীকৰণ আৰু মান বৃদ্ধিৰ দিশে উল্লেখযোগ্য পদক্ষেপ গ্ৰহণ কৰা।
মুখ্যমন্ত্ৰীয়ে সদৰী কৰে যে, এই ঋণৰ ৯০ শতাংশ অৰ্থাৎ প্ৰায় ২,৪৭৫ কোটি টকা কেন্দ্ৰীয় চৰকাৰে উভতাই দিব, আৰু বাকী ১০ শতাংশ অৰ্থাৎ ২৭৫ কোটি টকা অসম চৰকাৰে নিজে উভতাই দিব।
এই পুঁজিৰ ব্যৱহাৰৰ মূল ক্ষেত্ৰসমূহ হ’লঃ
- শিক্ষকসকলৰ বিজ্ঞান আৰু অংকৰ বিষয়ত দক্ষতা বৃদ্ধিৰ বাবে বিশেষ প্ৰশিক্ষণ
- বিদ্যালয়ৰ প্ৰধান শিক্ষকসকলৰ বাবে মেনেজমেণ্ট তথা নেতৃত্ব প্ৰশিক্ষণ
- বিজ্ঞান আৰু প্ৰযুক্তি শিক্ষাৰ ওপৰত গুৰুত্ব বৃদ্ধি
- বিদ্যালয় পৰ্যায়ত শিক্ষাৰ মান উন্নয়ন আৰু ড্ৰপ-আউট হাৰৰ ৰোধ
- ৪০০ খন বিদ্যালয় আধুনিক ৰূপে গঢ়ি তুলিবলৈ প্ৰত্যেকখনত ৩-৫ কোটি টকাকৈ ব্যয়
- ১,৭৩৩ খন অংগনবাড়ী কেন্দ্ৰ উন্নীতকৰণৰ বাবে প্ৰতিটোৰে ক্ষেত্ৰত ২৫ লাখ টকাকৈ ব্যয়
এই সিদ্ধান্তে ৰাজ্যৰ শিক্ষাখণ্ডত এক নতুন দিগন্ত উন্মোচন কৰিব বুলি মুখ্যমন্ত্ৰীগৰাকীয়ে আশা প্ৰকাশ কৰে। লগতে তেওঁ কয় যে, এই বিনিয়োগৰ ফলত শিক্ষাৰ গুণগত মান উন্নত হোৱাৰ লগতে পঢ়াশালীত ছাত্ৰ-ছাত্ৰীসকলৰ অংশগ্রহণ বৃদ্ধি পাব।
ইফালে আজিৰ কেবিনেট বৈঠকে নিবনুৱা সমস্যা সমাধানৰ ক্ষেত্ৰত আৰু এক গুৰুত্বপূৰ্ণ পদক্ষেপ গ্ৰহণ কৰিছে — জাপানত অসমৰ শিক্ষিত যুৱক-যুৱতীসকলৰ চাকৰিৰ ব্যৱস্থা। এই সম্পৰ্কে ঘোষণা কৰা CMFLIGHT আঁচনিৰ অধীনত ৩০০০ যুৱক-যুৱতীক প্ৰশিক্ষণ প্ৰদান আৰু জাপান বা ভাৰতৰ জাপানী কোম্পানীত নিযুক্তিৰ সুযোগৰ ব্যৱস্থা কৰা হৈছে।
মুঠতে, আজিৰ কেবিনেট বৈঠকত গ্ৰহণ কৰা এই সকলো সিদ্ধান্তে ৰাজ্যৰ শিক্ষাৰ ক্ষেত্ৰ আৰু যুৱসমাজৰ বাবে এক দীঘলীয়া লাভজনক দিশ স্থিৰ কৰিব বুলি চৰকাৰৰ দৃঢ় বিশ্বাস।
