অসম–নাগালেণ্ড সীমান্তৱৰ্তী গোলাঘাট জিলাৰ ৰালান গাঁৱত শনিবাৰে উত্তেজনাপূৰ্ণ পৰিস্থিতিৰ সৃষ্টি হয়। একাংশ নাগা যুৱকে কেন্দ্ৰীয় সংৰক্ষিত আৰক্ষী বাহিনী (চিআৰপিএফ)-ৰ জোৱানসকলৰ সৈতে সংঘৰ্ষত লিপ্ত হোৱা বুলি অভিযোগ উত্থাপিত হৈছে। স্থানীয় সূত্ৰ অনুসৰি, ঘটনাৰ সময়ত কিছুমান লোকক অস্ত্ৰ-শস্ত্ৰসহ চিআৰপিএফ জোৱানসকলৰ সৈতে হতাহতি কৰা দেখা যায়। ঘটনাটোৰ ভিডিঅ’ সামাজিক মাধ্যমত ব্যাপকভাৱে প্ৰচাৰিত হৈছে, যাৰ ফলত সীমান্ত অঞ্চলত উদ্বেগৰ পৰিৱেশ সৃষ্টি হৈছে।
জানিব পৰা মতে, সীমান্তৱৰ্তী নাগা অধ্যুষিত অঞ্চলত অৱস্থিত এটা ইন্ধন ডিপ’ পুনৰ মুকলি কৰাৰ প্ৰচেষ্টাক কেন্দ্ৰ কৰি এই বিবাদৰ সূচনা হয়। পূৰ্বতে ডিপ’টো বন্ধ কৰি ৰখা হৈছিল। কিন্তু পুনৰ চালু কৰাৰ প্ৰচেষ্টাত স্থানীয় লোকৰ একাংশই আপত্তি জনোৱাৰ ফলত পৰিস্থিতি উত্তপ্ত হৈ উঠে আৰু সংঘৰ্ষৰ সৃষ্টি হয়। পৰিস্থিতি নিয়ন্ত্ৰণত ৰাখিবলৈ প্ৰশাসন আৰু নিৰাপত্তা বাহিনীয়ে অঞ্চলটোত নিৰাপত্তা ব্যৱস্থা অধিক কটকটীয়া কৰিছে। যাতে পৰৱৰ্তী সময়ত কোনো অপ্ৰীতিকৰ ঘটনা সংঘটিত নহয়, তাৰ বাবে সতৰ্কতামূলক ব্যৱস্থা গ্ৰহণ কৰা হৈছে।
এই ঘটনাত কোনো লোক আহত হৈছে নে গ্ৰেপ্তাৰ কৰা হৈছে নে নাই, সেই বিষয়ে এই প্ৰতিবেদন প্ৰেৰণ কৰা সময়লৈকে চৰকাৰীভাৱে কোনো নিশ্চিত তথ্য প্ৰকাশ কৰা হোৱা নাই। অৱশ্যে, প্ৰশাসনে পৰিস্থিতিৰ ওপৰত নিবিড়ভাৱে নজৰ ৰাখিছে বুলি জানিব পৰা গৈছে।
