পশ্চিম গুৱাহাটী সমষ্টিৰ অসম – মেঘালয় সীমান্তৰ ৰাণীৰ কৃষি প্ৰধান অঞ্চল হিচাপে পৰিগণিত হোৱা নালাপাৰা পুখুৰীপাৰ , বিক্রমপুৰ , খপেগাও উদয়পুৰ আদি অঞ্চলত কেবাবছৰ ধৰি বনৰীয়া হাতীৰ জাকে সন্ত্রাসৰ সৃষ্টি কৰি অহাত কৃষক ৰাইজৰ মাজত হাহাকাৰ অৱস্থাৰ সৃষ্টি হৈছে। ধান কাটি চপোৱাৰ পাছতো পাহাৰৰ পৰা নামি অহা হাতীৰ জাকে এফালৰপৰা নষ্ট কৰিছে গাঁওবাসীৰ বাৰীত তথা বস্তিৰ ফল মুল। যাৰ বাবে বনৰীয়া হাতীৰ উপদ্ৰৱ সন্দৰ্ভত ৰাইজৰ মাজত সজাগতা সৃষ্টিৰ বাবে কালি নালাপাৰা খণ্ড বন বিষয়াৰ কাৰ্যালয়ত এখন সজাগতা সভা অনুষ্ঠিত হয়। সভাত মৈৰাপুৰ , বেলগুৰি , নালাপাৰা, মৈৰাপুৰ পাটগাঁও , মানিকপুৰ , উদয়পুৰ , পুৰাণ শুকুৰবেৰীয়া , বিক্রমপুৰ , মৈৰাপুৰ গৰাখহনীয়াপৰা , চেচা , আদি অঞ্চলৰ শতাধিক কৃষক ৰাইজ উপস্থিত থাকে। সভাত স্বেচ্ছাসেবী সংগঠন ডব্লিউ ডব্লিউ এফ ইন্ডিয়াৰ।
এই সভাত উপস্থিত থাকে ডব্লিউ ডব্লিউ এফ ইন্ডিয়া নামৰ বন্যপ্ৰাণী বিষয়ক স্বেচ্ছাসেবী সংগঠনটোৰ জেষ্ঠ্য প্ৰকল্প কাৰ্যবাহী ডেভিদ স্মিথ , ক্ষেত্ৰ বিষয়া ইউছুফ খান, নালাপাৰাৰ খণ্ড বন বিষয়া দুলু মহন্ত আৰু শুকুৰবেৰীয়াৰ খণ্ড বন বিষয়া জমিৰ আলীয়ে সৌৰশক্তি চালিত বেৰ দি কিদৰে বনৰীয়া হাতীৰ উপদ্ৰৱ ৰোধ কৰিব পাৰি তাৰ বিশদ বাখ্যা দাঙি ধৰে। সভাত ৰাণী মৈৰাপুৰ হাতী প্ৰতিৰক্ষা সমিতিৰ সভাপতি দীনেশ নাথ, সম্পাদক ৰমেশ দাস , জেষ্ঠ্য সাংবাদিক জোন ৰাভাকে ধৰি কেবাজনো কৃষক নেতাই চমু ভাষণ প্ৰদান কৰে।
