বৰপেটা, ১৩ মাৰ্চ: barpeta holi । আবিৰৰ ৰঙত ৰঙীন হৈ পৰিছে ৰাজ্যৰ আকাশ-বতাহ। বিশেষকৈ বৰপেটাৰ বিখ্যাত দৌল মহোৎসৱৰ প্ৰাক্কালে দিনে-ৰাতিয়ে শুনিবলৈ পোৱা গৈছে হোলীগীতৰ সুৰ। বৰপেটাৰ দৌল মহোৎসৱৰ অন্যতম মুখ্য আকর্ষণ হ’ল এই হোলীগীত। আজি গোন্ধযাত্ৰাৰে শুভাৰম্ভ হ’ল বৰপেটা সত্ৰৰ দৌল মহোৎসৱৰ। এই মহোৎসৱক লৈ বহুদিন আগৰে পৰাই বৰপেটাত হোলীগীতৰ চৰ্চা চলি আহিছে।
ইতিহাস সাক্ষী, প্ৰাক-স্বাধীনতা কালত বৰপেটাৰ দৌলত বংগদেশৰ কিছু গান গোৱা হৈছিল, যাক অসমীয়াই গ্ৰহণ কৰিব পৰা নাছিল। বিদ্ৰোহী কবি প্ৰসন্নলাল চৌধুৰী, অসমকেশৰী অম্বিকাগিৰী ৰায়চৌধুৰী আদিয়ে এই সংস্কৃতিৰ প্ৰতি আপত্তি জনাইছিল। সেই সময়তে ভাগৱতত উল্লেখ থকা ওৰেশা বৰ্ণনা আৰু কীৰ্তন ঘোষাত থকা ঘুনুচা কীৰ্তনৰ আদলে হোলীগীত ৰচনা কৰা হৈছিল। সেই সময়ৰ পৰাই বৰপেটাৰ বিভিন্ন কলাকুশলীয়ে হোলীগীত ৰচনা তথা সুৰাৰোপণ অব্যাহত ৰাখিছে। বৰ্তমান এই গীতসমূহ জনপ্ৰিয়তাৰ শিখৰত উপনীত হৈছে।
এই প্ৰসাৰৰ এক অংশ হিচাপে বুধবাৰে সাংস্কৃতিক মঞ্চ বৰপেটাৰ উদ্যোগত “বৰ্ণিল বসন্ত” নামৰ হোলীগীত পৰিৱেশনৰ এক বৃহৎ কাৰ্যসূচী ৰূপায়ণ কৰা হয়। এই কাৰ্যসূচীত প্ৰায় ৮০টা দলে অংশগ্ৰহণ কৰে। বিশেষ আকর্ষণ আছিল বৰপেটাৰ হোলীগীত বিভিন্ন ভাষাত পৰিৱেশন। সুদূৰ পুৰীৰ পৰা অহা এটি দলৰ লগতে অসমৰ বিভিন্ন জনগোষ্ঠীৰ শিল্পীসকলে নিজ নিজ ভাষাত হোলীগীত গায়।
“বৰ্ণিল বসন্ত” কাৰ্যসূচীৰ অংশস্বৰূপে বৰপেটাৰ ৰাখাল থান খেলপথৰৰ পৰা এক বৃহৎ শোভাযাত্ৰা উলিওৱা হয়, যি সমগ্ৰ চহৰৰ মূল পথবোৰ অতিক্ৰম কৰে। এই শোভাযাত্ৰা উদ্বোধন কৰে বৰপেটা সত্ৰৰ বুঢ়া সত্ৰীয়া ড৹ বাবুল চন্দ্ৰ দাসে। উদ্বোধনী ভাষণত তেওঁ কয়, “মহাপুৰুষ শ্ৰীমন্ত শংকৰদেৱে বিভিন্ন জাতি-জনগোষ্ঠীক একত্ৰিত কৰাৰ যে বাৰ্তা দিছিল, সেই একতা আজি ‘বৰ্ণিল বসন্ত’ কাৰ্যসূচীৰ জৰিয়তে বৰপেটাই সমগ্ৰ দেশবাসীক দিছে। বৰপেটাৰ হোলীগীত আজি নেপালী, বড়ো, ৰাভা, মিচিং, ওড়িয়া ভাষাত পৰিৱেশন হৈছে, যি এক অনন্য দৃষ্টান্ত।”