বিহাৰত বিৰোধী মিত্ৰজোঁটৰ মুখ্যমন্ত্ৰীৰ প্ৰাৰ্থী চূড়ান্ত।(Bihar Polls 2025)মুখ্যমন্ত্ৰী পদৰ প্ৰাৰ্থী হিচাপে তেজস্বী যাদৱক বাছনি। বিহাৰ কংগ্ৰেছৰ পৰ্যৱেশক অশোক গেহলটৰ আনুষ্ঠানিক ঘোষণা। পাটনাৰ হোটেল মৌৰ্যত বিৰোধী নেতৃবৰ্গৰ সংবাদমেল। এই সংবাদমেলতে বিৰোধী মুখ্যমন্ত্ৰী পদৰ প্ৰাৰ্থী ঘোষণা।
২০২৫ চনৰ দুটা পৰ্যায়ৰ বিহাৰ বিধানসভা নিৰ্বাচনলৈ দুসপ্তাহ থকা পূৰ্বে এক উল্লেখযোগ্য পদক্ষেপ গ্ৰহণ কৰি বিৰোধী দল মহাজোঁটবন্ধনে বৃহস্পতিবাৰে আৰজেডি নেতা তেজস্বী যাদৱক মুখ্যমন্ত্ৰী পদৰ প্ৰাৰ্থী হিচাপে আনুষ্ঠানিকভাৱে ঘোষণা কৰি কেইবা সপ্তাহ ধৰি চলি থকা জল্পনা-কল্পনা আৰু আভ্যন্তৰীণ কাজিয়াৰ অন্ত পেলায়।
সংবাদমেল অনুষ্ঠিত কৰি এই ঘোষণাক ৰাষ্ট্ৰীয় জনতা দল (আৰজেডি), কংগ্ৰেছ আৰু মিত্ৰজোঁটৰ বাবে এক বৃহৎ শক্তি প্ৰদৰ্শন বুলি প্ৰচাৰ কৰা হৈছিল। সমস্যা সমাধানকাৰী হিচাপে পাটনালৈ প্ৰেৰণ কৰা জ্যেষ্ঠ কংগ্ৰেছ নেতা তথা ৰাজস্থানৰ প্ৰাক্তন মুখ্যমন্ত্ৰী অশোক গেহলটে এই সিদ্ধান্ত নিশ্চিত কৰে।বিহাৰৰ মহাজোঁটবন্ধনে বৃহস্পতিবাৰে পাটনাত এক যুটীয়া সংবাদমেলত এই ঐক্যমতৰ কথা ঘোষণা কৰে।
ঐক্যবদ্ধ স্থিতিৰ ওপৰত গুৰুত্ব আৰোপ কৰি গেহলটে কয়, ‘সকলো জ্যেষ্ঠ নেতাৰ সৈতে আলোচনাৰ অন্তত আমি সিদ্ধান্ত লৈছো যে আগন্তুক বিহাৰ নিৰ্বাচনত তেজস্বী যাদৱ বিৰোধী মিত্ৰজোঁটৰ মুখ্যমন্ত্ৰীৰ প্ৰাৰ্থী হ’ব। তেওঁৰ সন্মুখত সুদূৰ ভৱিষ্যত আছে।
বৃহস্পতিবাৰে যুটীয়া সংবাদমেলৰ মঞ্চত ব্যৱহাৰ কৰা পোষ্টাৰতো আছিল কেৱল তেজস্বীৰ ছবি। তাত আন বিৰোধী দলৰ নেতাৰ ছবি নাছিল।
পাটনাত অনুষ্ঠিত সংবাদমেলত উপস্থিত থাকে বিহাৰ নিৰ্বাচনৰ কংগ্ৰেছ পৰ্যবেক্ষক তথা ৰাজস্থানৰ প্ৰাক্তন মুখ্যমন্ত্ৰী অশোক গেহলট। তেওঁ তেজস্বীৰ নাম মুখ্যমন্ত্ৰী হিচাপে ঘোষণা কৰে।
তেজস্বীক মুখ্যমন্ত্ৰী পদৰ মুখ হিচাপে ঘোষণা কৰাৰ সমান্তৰালকৈ বিকাশশীল ইনছান পাৰ্টীৰ মুৰব্বী মুকেশ চাহানীক বিৰোধী মিত্ৰজোঁটৰ উপ-মুখ্যমন্ত্ৰী পদৰ মুখ হিচাপে ঘোষণা কৰা হয়। অৱশ্যে উপ-মুখ্যমন্ত্ৰী পদৰ বাবে আৰু অধিক নাম পিছত ঘোষণা কৰাৰ সম্ভাৱনা আছে।
৬ আৰু ১১ নৱেম্বৰত অনুষ্ঠিত হ’বলগীয়া এই দুটা পৰ্যায়ৰ নিৰ্বাচনৰ ফলাফল ১৪ নৱেম্বৰত ঘোষণা কৰা হ’ব।
প্ৰভাৱশালী দল আৰজেডিয়ে ১৪৩ গৰাকী প্ৰাৰ্থী প্ৰক্ষেপ কৰাৰ বিপৰীতে কংগ্ৰেছে ৬১ খন আসনত প্ৰতিদ্বন্দ্বিতা কৰিছে। বাকী আসনসমূহ চিপিআই(এমএল) আৰু সাহানীৰ ভিআইপিৰ দৰে মিত্ৰশক্তিৰ মাজত বিতৰণ কৰা হৈছে। কালি প্ৰত্যাহাৰৰ শেষ তাৰিখ হোৱাৰ বাবে সকলো আসনত একক প্ৰাৰ্থী নিশ্চিত কৰাত ব্যৰ্থ হ’লে ভোট বিভাজনৰ সৃষ্টি হ’ব পাৰে, যাৰ ফলত সম্ভাৱনাময়ভাৱে প্ৰতিদ্বন্দ্বী নেশ্যনেল ডেম’ক্ৰেটিক এলায়েন্স (এন ডি এ)ক লাভৱান হ’ব পাৰে।
