২০২৬ চনৰ(BJP) বিধানসভা নিৰ্বাচনত বিজেপিৰ পৰা বহুতে টিকট প্ৰত্যাশী হৈ আছে৷ তেওঁলোকৰ ভিতৰত বহু নতুন মুখৰো আবিৰ্ভাৱ ঘটা পৰিলক্ষিত হৈছে৷ মুখ্যমন্ত্ৰী হিমন্ত বিশ্ব শৰ্মাই বুধবাৰে যোৰহাটত কৰা এক মন্তব্যই আগন্তুক নিৰ্বাচনত টিকট প্ৰত্যাশী বহু নতুন মুখক উৎসাহিত কৰি তোলা দেখা গৈছে৷ মুখ্যমন্ত্ৰী শৰ্মাই আজি আগন্তুক নিৰ্বাচনত বিজেপিয়ে ৪০ গৰাকী নতুন নেতাক প্ৰাৰ্থিত্ব প্ৰদান কৰিব বুলি মন্তব্য কৰিছে৷ মুখ্যমন্ত্ৰীৰ এনে মন্তব্যই আলোড়নৰ সৃষ্টি কৰিছে৷ কিয়নো ৪০ গৰাকী নতুন নেতাৰ প্ৰাৰ্থিত্ব দিবলগীয়া হ’লে নিঃসন্দেহে সেই স্থানবোৰত টিকটৰ আশাত বন্দী হৈ থকা বহু জ্যেষ্ঠ নেতা অথবা বিধায়কৰ পাখি কটা যোৱাটো নিশ্চিত৷ আনহাতে ৪০ গৰাকী নতুন নেতাক সুযোগ দিয়াৰ ব্যৱস্থাটোৱে কোন কোন তৰুণ গেৰুৱা নেতাক ভোটযুদ্ধত অৱতীৰ্ণ হোৱাৰ সুযোগ দিয়ে সেই লৈয়ো চৰ্চাৰ বাবে মুখ্যমন্ত্ৰীৰ মন্তব্যই বাট মুকলি কৰি দিলে৷ অসম বিধানসভাৰ নিৰ্বাচনৰ দিন ঘোষণাৰ কাউণ্টডাউন চলি থকাৰ সময়তে কংগ্ৰেছৰ বিৰুদ্ধে অধিক সৰৱ হৈ পৰিছে মুখ্যমন্ত্ৰী হিমন্ত বিশ্ব শৰ্মা৷ মুখ্যমন্ত্ৰীৰ মতে অহাবাৰ বিৰোধীৰ আসনত বহাৰ পৰাও বঞ্চিত হ’ব কংগ্ৰেছ৷ মুখ্যমন্ত্ৰীয়ে কয়–‘ইলেকচনৰ দিনটোৰ বিষয়ে মইতো ক’ব নোৱাৰিম৷ কিন্তু অসম চৰকাৰে নিৰ্বাচনী আয়োগক অনুৰোধ কৰিছে যে ইলেকচন যাতে যিকোনো কৰাণতে ব’হাগ বিহুৰ আগতে হয়৷ কাৰণ ব’হাগ বিহু পাৰ হৈ যোৱাৰ লগে লগে বৰষুণো আৰম্ভ হৈ যাব৷ তেতিয়া ইলেকচন কৰাটো অসুবিধা হ’ব৷’ যোৰহাটত এক অনুষ্ঠানত অংশগ্ৰহণৰ পিছত সাংবাদিকে নিৰ্বাচনৰ দিন সন্দৰ্ভত সোধা এক প্ৰশ্নৰ উত্তৰত মুখ্যমন্ত্ৰীয়ে এনেদৰে কয়৷ আনহাতে, অসম জাতীয় পৰিষদক কেইবাটাও সংখ্যালঘু প্ৰধান সমষ্টি এৰি দিয়া বিষয়ত কংগ্ৰেছ কৰ্মীয়ে ক্ষোভ প্ৰকাশ কৰা প্ৰসংগত মুখ্যমন্ত্ৰীয়ে কয়, ‘যিখিনি সংখ্যালঘু প্ৰধান সমষ্টি তাত কংগ্ৰেছৰ ভাল সংগঠন আছে, সেইটো অস্বীকাৰ কৰি লাভ নাই৷ কাৰণ সেই সমষ্টিত কংগ্ৰেছ জয়ী হোৱাৰ ১০০ শতাংশ সম্ভাৱনা আছে৷ যদি ৰাইজৰ দল, জাতীয় পৰিষদক সেইকেইটা সমষ্টি দি দিয়ে তেতিয়াহ’লে অহাবাৰ বিৰোধীৰ আসনত বহাৰ পৰাও বঞ্চিত হ’ব কংগ্ৰেছ৷ কাৰণ বিৰোধীৰ আসনত বহিবলৈ ২২ খন আসন লাগে৷’ ইপালে বিজেপিৰ আসন ভাগ-বাটোৱাৰা প্ৰসংগত তেওঁ কয়, ‘অগপৰ লগত আলাপ-আলোচনাৰ মাজেৰে আসন ভাগ-বাটোৱাৰা হ’ব৷ ইতিমধ্যে ৰাভা যৌথ মঞ্চৰ লগত প্ৰায় আলোচনা সমাপ্ত হৈছে আৰু ২৮ ফেব্ৰুৱাৰীৰ আগতেই বিপিএফৰ লগত আলোচনা হ’ব৷’ আনহাতে, ‘২৬১ নিবাচনত নতুন মুখে কিমান প্ৰাধান্য পাব তাৰ প্ৰসংগত মুখ্যমন্ত্ৰীয়ে কয়, ‘২৬১ নিৰ্বাচনত আমাৰ ভাল ছীট ১০৩টা আছে ৷ সেয়েহে ৪০ খন নতুন মুখ আহিব৷ মই ক’লেও আহিব, নক’লেও আহিব৷’ উল্লেখ্য যে বুধবাৰে যোৰহাট বিজ্ঞান আৰু প্ৰযুক্তিবিদ্যা প্ৰতিষ্ঠান খেলপথাৰত আত্মনিৰ্ভৰ অসম অভিযান আঁচনিৰ অনুদান বিতৰণ অনুষ্ঠানত অংশগ্ৰহণ কৰে মুখ্যমন্ত্ৰী ড॰ হিমন্ত বিশ্ব শৰ্মাই৷ উক্ত অনুষ্ঠানত গোলাঘাট, যোৰহাট, মাজুলীৰ প্ত,৯৫৮ গৰাকী লোকক আত্মনিৰ্ভৰ অসম অভিযান আঁচনিৰ আৰ্থিক অনুদান বিতৰণ কৰে ৷এই আঁচনিৰ ধন বিতৰণ কৰি মুখ্যমন্ত্ৰীয়ে কয় যে এই আঁচনিৰ জৰিয়তে ২ লাখ টকা লাভ কৰিব ৷ ইয়াৰে ৰ লাখ টকা প্ত বছৰ পিছত ঘূৰাই দিব লাগিব ৷ তিনিটা কিস্তিত এই ধন বিতৰণ কৰা হ’ব৷ প্ৰথম কিস্তিত ৭৫ হাজাৰকৈ দিয়া হৈছে৷ এই আঁচনিয়ে ৰাজ্যৰ ৰ লাখ যুৱক-যুৱতীক সামৰি লোৱা হৈছে ৷ কোনো ধৰণৰ গেৰাণ্টী আৰু মৰ্টগেজ লোৱা নাই৷ এয়া আস্থা আৰু বিশ্বাসৰ মাধ্যমেৰে এই অনুদান তেওঁলোকক প্ৰদান কৰা হৈছে৷
