মধ্য অসমৰ মৰিগাঁও জিলাৰ মৈৰাবাৰী থানাৰ অন্তৰ্গত পলাহজুৰীত বুধবাৰে এক চুৰিকাণ্ড সংঘটিত হৈ যায়। চুৰি কাণ্ড সংঘটিত হোৱা ঘৰৰ গৰাকীয়ে ইতিমধ্যে স্থানীয় মৈৰাবাৰী আৰক্ষী চকীত এখন এজাহাৰ দাখিল কৰিছে।এজাহাৰত উল্লেখ থকা অনুসৰি ৫ জুন তাৰিখে সংঘটিত চুৰি কাণ্ডত নগাঁও জিলাৰ ধিং থানাৰ অন্তৰ্গত ২ নং গায়ন গাৱৰ মকবুল ইছলামৰ পুত্ৰ ৰাব্বুল ইছলাম প্ৰত্যক্ষ ভাৱে জড়িত হৈ আছে।প্ৰাপ্ত খবৰ অনুসৰি উক্ত ৰাব্বুল ইছলামে ৫ জুন তাৰিখ ৰাতি পলাহজুৰীৰ কেৰামত আলীৰ ঘৰত দুজন লগৰীয়াৰ সৈতে ঘৰৰ বেৰ কাটি প্ৰৱেশ কৰি চাফাই অভিযান চলাই।
মাজ নিশা ঘৰৰ গৰাকীৰ ঘোৰ নিদ্ৰাৰ সুযোগত চুৰে অতি সহজে গৰাকীৰ দুটা অপো মোবাইল,সোনৰ কান ফুলি এযোৰ,ৰূপৰ আঙুটি,আপাচি মটৰ চাইকেল এখন, প্ৰয়োজনীয় নথি পত্ৰ আৰু নগদ ২৪৮০০ টকা লৈ উধাও হয়।মন কৰিবলগীয়া এয়া যে চোৰ বুলি অভিযুক্ত ৰাব্বুল ইছলাম এজাহাৰকাৰী এছমিনা খাতুনৰ সম্পৰ্কত আপোন ভাই। ক’বলৈ গ’লে নিজ বাইদেউৰ ঘৰত আহি চুৰি কাণ্ড সংঘটিত কৰিলে নিজা আপোন ভাইটিয়ে যাক লৈ উক্ত অঞ্চলটোত এক তীব্ৰ প্ৰতিক্ৰিয়াৰ সৃষ্টি হৈছে।
