‘দ্য কাশ্মীৰ ফাইলছ’। পৰিচালক বিবেক অগ্নিহোত্ৰীৰ ছবিখনে বক্স অফিচত তোলপাৰ লগাইছে। ইতিপূৰ্বে, প্ৰধানমন্ত্ৰী নৰেন্দ্ৰ মোদীয়ে ছবিখনৰ প্ৰশংসাত পঞ্চমুখ হৈ পৰা দেখা গৈছিল। মোদীৰ পাছত এইবাৰ গৃহমন্ত্ৰী অমিত শ্বাহে দেশৰ সকলো নাগৰিককে ছবিখন চাবলৈ আহ্বান জনাইছে। কংগ্ৰেছৰ শাসনকালত কাশ্মীৰ উপত্যকাত কি ধৰণৰ অত্যাচাৰ আৰু সন্ত্ৰাসবাদৰ ঘটনাৰ সৃষ্টি হৈছিল তাক বুজিবলৈ ছবিখন চোৱাতো জৰুৰী বুলিৰ কয় অমিত শ্বাহে। শনিবাৰে আহমেদাবাদ পৌৰ নিগমৰ এক অনুষ্ঠানত উপস্থিত হৈছিল অমিত শ্বাহ। তাত তেওঁক ‘দ্য কাশ্মীৰ ফাইলছ’ৰ বিষয়ে মন্তব্য কৰা দেখা গৈছিল। তেওঁ কয়, ‘যিসকলে এতিয়ালৈকে দেখা নাই তেওঁলোকে কংগ্ৰেছৰ শাসনকালত কিমান সন্ত্ৰাস আৰু গণহত্যাই কাশ্মীৰক গ্ৰাস কৰিছিল তাক জানিবলৈ ছবিখন চাবলৈ আহক।’
একে সময়তে, গৃহমন্ত্ৰীয়ে কাশ্মীৰৰ পৰা সংবিধানৰ ৩৭০ অনুচ্ছেদ বাতিল কৰাৰ বাবেও নৰেন্দ্ৰ মোদীক প্ৰশংসা কৰে। অমিত শ্বাহে কয়, ‘যেতিয়া আপোনালোকে দ্বিতীয়বাৰৰ বাবে নৰেন্দ্ৰ ভাইক প্ৰধানমন্ত্ৰী হিচাপে নিৰ্বাচিত কৰিছিল, তেতিয়া তেওঁ ৫ আগষ্ট, ২০১৯ ত অনুচ্ছেদ ৩৭০ বাতিল কৰিছিল। নৰেন্দ্ৰ ভাইয়ে এনে কৰাৰ লগে লগে সমগ্ৰ দেশৰ মানুহে উপলব্ধি কৰিলে যে যেতিয়া তেওঁৰ দৰে শক্তিশালী মনোবলৰ নেতাই দেশক নেতৃত্ব দিয়ে, অসম্ভৱ বুলি একো নাথাকে।’ মোদীৰ নেতৃত্বত দেশখনে কেনেকৈ ৰপ্তানিৰ ক্ষেত্ৰত বিশ্বৰ শীৰ্ষ দেশসমূহৰ সৈতে নিজকে এখন আসনত ৰাখিবলৈ সক্ষম হৈছে সেয়াও উল্লেখ কৰে অমিত শ্বাহে। ’৯০ ৰ দশকৰ আৰম্ভণিতে কাশ্মীৰী পণ্ডিতসকলৰ ওপৰত হোৱা অত্যাচাৰৰ বিষয়ে বিবেক অগ্নিহোত্ৰীয়ে এনেদৰে ‘দ্য কাশ্মীৰ ফাইলছ’ ছবিখন নিৰ্মাণ কৰা বাবে প্ৰশংসা কৰিছিল।
মোদীয়ে ছবিখন সমৰ্থন কৰিবলৈ দলৰ সাংসদ সকললৈ বাৰ্তা প্ৰেৰণ কৰিছিল। একে সময়তে, কিছুমান লোকে গৱেষণা কৰা আৰু সত্য ঘটনাৰ ওপৰত আধাৰিত ছবিখনৰ বিৰুদ্ধে ষড়যন্ত্ৰ কৰা আৰম্ভ কৰিছে। ইফালে, বিৰোধীয়ে মোদীকে ধৰি বিজেপি নেতাসকলক এনে এখন ছবিক লৈ তেওঁলোকৰ উত্তেজনা প্ৰকাশ কৰাৰ অভিযোগ উত্থাপন কৰিছে। দিল্লীৰ মুখ্যমন্ত্ৰী আপৰ নেতা অৰবিন্দ কেজৰিৱালে গেৰুৱা শিবিৰত পোনপটীয়াকৈ আক্ৰমণ কৰিছে। স্মৰ্তব্য যে, ‘দ্য কাশ্মীৰ ফাইলছ’ক লৈ চলি থকা প্ৰথা আৰু বিতৰ্ক অব্যাহত আছে। ছবিখনে ইতিমধ্যে প্ৰায় ২২০ কোটিতকৈ অধিক টকা উপাৰ্জন কৰিছে। জীৱনলৈ অহা ভাবুকিৰ বাবে কেন্দ্ৰীয় চৰকাৰে ‘ৱাই’ শ্ৰেণীৰ নিৰাপত্তাও প্ৰদান কৰিছে বিবেক অগ্নিহোত্ৰীক।