অসম তথা উত্তৰ পূবৰ ভয়াবহ বান পৰিস্থিতিত গভীৰ উদ্বেগ প্ৰকাশ কৰি কংগ্ৰেছ সভাপতি মল্লিকাৰ্জুন খৰ্গেই প্ৰধানমন্ত্ৰী নৰেন্দ্ৰ মোডীক উত্তৰ পূবৰ বানাক্ৰান্ত জনসাধাৰণক সহায়ৰ হাত আগবঢ়াবলৈ আহ্বান জনাইছে ৷ নিজ দলৰ কৰ্মীসকলকো দুৰ্যোগত আক্ৰান্তসকলক পাৰ্য্যমানে সহায় কৰিবলৈ আহ্বান জনায় সভাপতি গৰাকীয়ে ৷ এক্সত এই সম্পৰ্কত লিখে কংগ্ৰেছ সভাপতি গৰাকীয়ে এইদৰে — “ অসম, মণিপুৰ, ত্ৰিপুৰা, মিজোৰাম আৰু ছিকিমৰ ভয়াৱহ বান পৰিস্থিতিক লৈ অত্যন্ত চিন্তিত। আমি প্ৰধানমন্ত্ৰী মোদীয়ে মণিপুৰ ভ্ৰমণ কৰিব বুলি আশা কৰা নাই, কিন্তু তেওঁ কৰিব পৰা নূন্যতম কামটো হ’ল মণিপুৰ আৰু উত্তৰ পূবৰ অন্যান্য ৰাজ্যৰ দুৰ্দশাগ্ৰস্ত জনসাধাৰণক সহায় আগবঢ়োৱা। আপোনজনক হেৰুৱাই পেলোৱা সকলৰ প্ৰতি আমাৰ গভীৰ সমবেদনা জ্ঞাপন কৰিলোঁ। কেন্দ্ৰীয় চৰকাৰ আৰু ৰাজ্য চৰকাৰে তাৎক্ষণিক সাহায্য প্ৰদান কৰাৰ লগতে উদ্ধাৰ প্ৰচেষ্টা ক্ষিপ্ৰতাৰে কৰিব বুলি আমি আশা কৰোঁ।”
সামাজিক মাধ্যম এক্সত উত্তৰ পূবৰ ক্ষয় ক্ষতিৰ কথা উল্লেখ কৰি মল্লিকাৰ্জুন খাৰ্গেই কয় — “ আনহাতে মণিপুৰত প্ৰায় ২৫ হাজাৰ ঘৰ ক্ষতিগ্ৰস্ত হোৱাৰ বাবে হাজাৰ হাজাৰ লোক স্থানচ্যুত হৈছে। অসমত ২ লাখৰো অধিক লোক আক্ৰান্ত হৈছে। বৰাক উপত্যকাত ভয়াৱহ পৰিস্থিতি মিজোৰামৰ আইজল জিলাত একাধিক ভূমিস্খলনৰ ফলত কেইবাজনো লোকৰ প্ৰাণহানি। ত্ৰিপুৰা আৰু ছিকিমতো নিম্নভূমি অঞ্চলত পানী বাঢ়ি অহাৰ লগে লগে বান সদৃশ পৰিস্থিতিৰ সৃষ্টি হৈছে।” কংগ্ৰেছ দলৰ কৰ্মী সকলক আহ্বান জনাই খাৰ্গেই কয়— “ কংগ্ৰেছ কৰ্মীসকলক উদ্ধাৰ আৰু পুনৰ্বাসনৰ কামত সকলো ধৰণৰ সহায় আগবঢ়াবলৈ আৰু দুৰ্দশাগ্ৰস্তসকলক সহায় কৰিবলৈ আহ্বান জনাইছো।”