যোৰহাট কেন্দ্ৰীয় ঈদগাহত ১৬ টা মছজিদৰ জামাত তথা যোৰহাটবাসী ইছলামধৰ্মী ৰাইজে একত্ৰিত ভাৱে ঈদ-উজ-জোহাৰ সমূহীয়া নামাজ আদায় কৰে । উক্ত নামাজত ইমামতি কৰে যোৰহাট পুৰণা বালিবাট মছজিদৰ পেছ ইমাম জোনাব হাফিজ মোবাৰক আলি চাহেব আৰু চানী ইমাম হিচাপে উপস্থিত আছিল যোৰহাট ফৰমুদ আলি পথৰ হাজৰিকা মছজিদৰ পেছ ইমাম মৌলানা ইদ্ৰিছ আলি চাহেব।
আনহাতে যোৰহাট কেন্দ্ৰীয় কাৰাগাৰতো আজি ঈদৰ নামাজ সম্পন্ন হয় উক্ত নামাজত ইমামতি কৰে যোৰহাট ঈদগাহ সমিতিৰ দ্বাৰা মনোনীত জেইল ৰ’ড মছজিদৰ মৌলানা আমিৰ হুছেইন চাহেবে । বাতৰি কাকতলৈ প্ৰেৰণ কৰা এক প্ৰেছ বিজ্ঞপ্তিত যোৰহাট কেন্দ্ৰীয় ঈদগাহ সমিতিৰ সাধাৰণ সম্পাদক পাৰভেজ হুছেইনে কয় , নামাজৰ কাৰ্য্যসূচী অনুসৰি পুৱা ৭-৩০ বজাত বজাত চানী ইমাম চাহেবৰ কেৰাত পাঠ আৰু পেছ ইমাম চাহেবৰ বহুমূলীয়া মানৱ জাতিৰ সংশোধনৰ বিষয়ৰ বায়ানেৰে আৰম্ভ হয় ।
তাৰ পিছতেই ইমাম সকলক ঈদগাহ সমিতিৰ দ্বাৰা সম্বৰ্ধনা জ্ঞাপন কৰা হয় । হুছেইনে লগত কয়,উক্ত নামাজত মানৱ জাতিৰ শান্তিৰ লগতে বানপানীৰ পৰা অসমীয়া জাতিয়ে পৰিত্ৰাণ পাবলৈ তথা অসমীয়া জাতিৰ এনাজৰী ডাল যাতে আৰু অধিক কটকটীয়া হয় আৰু তাৰ উপৰিও সকলো ধৰণৰ প্ৰাকৃতিক দুৰ্যোগৰ পৰা যাতে অসমবাসী ৰাইজ সদায় সুৰক্ষিত হয় থাকিব পাৰে তাৰ কাৰণে মহান আল্লাহৰ ওচৰত ইমাম চাহাবৰ সৈতে সমগ্ৰ ৰাইজে দোঁৱা কৰে।
