অসম নাট্য সন্মিলনৰ অন্তৰ্গত ৰত্নপীঠ মণ্ডলৰ প্ৰথমখন কাৰ্যনিৰ্বাহক সভা আজি তামুলপুৰৰ মাজমজিয়াত অৱস্থিত সদৌ অসম কলিতা আলপাইন জনগোষ্ঠী সন্মিলনৰ তামুলপুৰ জিলা সমিতিৰ কাৰ্যালয়ত অনুষ্ঠিত হয়৷ অসম নাট্য সন্মিলনৰ তামুলপুৰ জিলা সমিতিৰ আতিথ্যত আৰু তামুলপুৰ শাখাৰ সহযোগত অনুষ্ঠিত ৰত্নপীঠ মণ্ডলৰ কাৰ্যনিৰ্বাহক সভাখনত সভাপতিত্ব কৰে ৰত্নপীঠ মণ্ডলৰ সভাপতি ভবানন্দ পাঠকে৷ অসম নাট্য সন্মিলনৰ কেন্দ্ৰীয় উপ সভাপতি জয়ন্ত হাজৰিকা, কেন্দ্ৰীয় সম্পাদক সন্তৰাম দাস, কেন্দ্ৰীয় প্ৰাক্তন কাৰ্যকৰী সভাপতি নাট্যকাৰ জীতেন শৰ্মাকে ধৰি বহু সংখ্যক কেন্দ্ৰীয় নেতাৰ উপস্থিতিত অনুষ্ঠিত কাৰ্যনিৰ্বাহক সভাখনৰ উদ্দেশ্য ব্যাখ্যা কৰে ৰত্নপীঠ মণ্ডলৰ সাধাৰণ সম্পাদক যুৱ নাট্যকাৰ,পৰিচালক অভিজিত দাসে৷
সভাত প্ৰতিটো শাখাৰ কৰ্মসূচী, ৰত্নপীঠ মণ্ডলৰ উদ্যোগত জুলাই মাহত নাট কৰ্মশালা, কবিতা আবৃত্তি, ৰত্নপীঠ মণ্ডলৰ মধ্যকালীন অধিৱেশন আদি বিভিন্ন বিষয় আলোচনা কৰি কেইবাটাও সিদ্ধান্ত গ্ৰহণ কৰা হয়৷
