ৰঙামাটিৰ সমীপৱৰ্তী খুমটাইৰ ৰঙাগড়া খেলপথাৰত আয়োজন হোৱা প্ৰাইজমনি ফুটবল প্ৰতিযোগিতাৰ প্ৰথম দিনটোতে ব্যাপক জনসমাগম। বোকাখাত সমষ্টিৰ ৰঙাগড়াত খেলখন চাবলৈ আহিল কৃষিমন্ত্ৰী অতুল বৰা, অসম ক্ৰীড়া বৰ্ডৰ উপাধ্যক্ষ আকাশ ফুকনো। হাজাৰ হাজাৰ লোকৰ সমাগমত আৰম্ভ হ’ল ফুটবল প্ৰতিযোগিতাখন। খেল উপভোগ কৰি আনন্দিত হৈ পৰিল কৃষিমন্ত্ৰী অতুল বৰা। নিজ সমষ্টিত ক্ৰীড়াৰ বাতাবৰণ গঢ়ি তোলা হ’ব বুলি মন্তব্য কৰে অতুল বৰাই।
আনহাতে অসম ক্ৰীড়া বৰ্ডৰ নৱনিযুক্ত উপাধ্যক্ষ আকাশ ফুকনেও গ্ৰাম্য ক্ৰীড়াৰ ক্ষেত্ৰত লোৱা পৰিকল্পনাৰ কথা উল্লেখ কৰে। সম্প্ৰতি ৰাজ্যত তুংগত উঠা মাধ্যম বিতৰ্কৰ ওপৰতো গুৰুত্বপূৰ্ণ মন্তব্য কৰিলে কৃষিমন্ত্ৰী গৰাকীয়ে। অসম থকালৈকে অসমীয়া ভাষা থাকিব আৰু দুটা বিষয়ত ইংৰাজী ভাষা প্ৰয়োগ হ’লেও মাতৃভাষা শেষ হৈ নাযায় অথবা কোনো ক্ষতি নহয় বুলি মন্তব্য কৃষিমন্ত্ৰীৰ।
