নগা উগ্ৰপন্থী সংগঠন এনএছচিএন (কে-য়া) অপহৰণ কৰিলে দুই গাড়ী চালকক। এজন অসমৰ আনজন নগালেণ্ডৰ মন জিলাৰ বাসিন্দা। নগালেণ্ডৰ মন জিলাৰ লংৱাৰপৰা পংচাও লৈ নিৰ্মীয়মান ১৮ কিলোমিটাৰ জোৰা এটা পথৰ নিৰ্মাণ কাৰ্যত জড়িত আছিল দুয়োজন লোক। এঘাৰ মে’ৰ নিশাই অপহৰণ কৰিলে দুই ঠিকাভিত্তিক বাহন চালকক । অসমৰ লোকজনৰ নাম বিকাশ আৰু আনজন নগালেণ্ডৰ মন জিলাৰ ফুকাহি চু-হা বুলি জানিব পৰা গৈছে। দুয়োজন ক্ৰমে জেচিবি আৰু ডাম্পাৰ চালক। পথটো নিৰ্মাণৰ বাবে নিৰ্ধাৰিত ৩৬ কোটি টকা বাজেটৰ পৰা ঠিকাদাৰক ৫ শতাংশ দাবী জনাইছে এনএছচিএন (কে-য়া), অন্যথা নিৰ্মাণ কাৰ্য বন্ধ কৰি দিয়াৰ হুংকাৰ। ইফালে পথ নিৰ্মাণত জড়িত দুয়োজন অপহৃত লোকক মুকলি কৰি আনিবলৈ যোৱা নগালেণ্ডৰ লংৱা গাঁৱৰ মানকাই আৰু নকচা নামৰ আন দুজন লোককো কালিৰেপৰা আৱদ্ধ কৰি ৰাখিছে উগ্ৰপন্থী সংগঠনটোৱে। এই চাৰিওজনকে মুকলি কৰাৰ বিনিময়ত ৫০ লাখ টকা দাবী এনএছচিএন (কে-য়া)ৰ।
