ধেমাজি জিলাৰ গোগামুখৰ শৈক্ষিক প্ৰতিষ্ঠান গোগামুখ বালিকা বিদ্যালয়ৰ সহকাৰী প্ৰধান শিক্ষক ৰবিন্দ্ৰ বৰগোঁহায়ে বিদ্যালয়খনৰ পৰা অৱসৰ গ্ৰহণ কৰাা তেওঁক আজি বিদ্যালয়ৰ পৰিয়ালে বিদায় সম্বৰ্ধনা জনায় ৷ বিদ্যালয়খনৰ প্ৰধান শিক্ষক গোবিন শৰ্মাৰ সভাপতিত্বত অনুষ্ঠিত হোৱা উক্ত বিদায়-সম্বৰ্ধনা সভাত উদ্দেশ্য ব্যাখ্যা কৰে বিদ্যালয়খনৰ শিক্ষক কৰ্মচাৰী গোটৰ সম্পাদক নীলমণি পেগুৱে ৷ সভাখনৰ আঁত ধৰে বিদ্যালয়খনৰ সহশিক্ষক নন্দেশ্বৰ কামানে ৷
উল্লেখনীয় যে, অৱসৰপ্ৰাপ্ত শিক্ষক বৰগোঁহাইৰ জন্ম হৈছিল ১৯৬১চনত ঢকুৱাখনা মহকুমাৰ অন্তৰ্গত লাহিবাৰী গাঁৱত ৷ ১৯৮১ চনত উত্তৰ লখিমপুৰ মহাবিদ্যালয়ৰ পৰা বি এছ চি পাছ কৰি মিংমাং নলবাৰী হাইস্কুলত সহকাৰী শিক্ষক হিচাপে চাকৰি জীৱন আৰম্ভ কৰে ৷ ২০১০ চনত তেওঁ গোগামুখ বালিকা বিদ্যালয়ত সহকাৰী প্ৰধান শিক্ষক হিচাপে যোগদান কৰে ৷ সুন্দৰভাৱে চাকৰি জীৱন অতিক্ৰম কৰাৰ পিছত ৩১ ডিচেম্বৰত ২০২১ চনত শিক্ষকৰ চাকৰি জীৱনৰ পৰা অৱসৰ গ্ৰহণ কৰে ৷ আজি গোগামুখ বালিকা বিদ্যালয়ৰ শিক্ষক-কৰ্মচাৰী, বিদ্যালয়খনৰ পৰা অৱসৰ গ্ৰহণ কৰা শিক্ষক-শিক্ষয়িত্ৰী আৰু ছাত্ৰী সকলে চেলেং চাদৰ, গামোচা, মিচিং মাফলাৰ, শৰাই, ফুলৰ থোপাৰে সম্বৰ্ধনা জ্ঞাপন কৰি অৱসৰী সহকাৰী প্ৰধান শিক্ষক ৰবীন্দ্ৰ বৰগোঁহাইলৈ শ্ৰদ্ধা প্ৰদান কৰে ৷ সভাৰ আৰম্ভণিৰ পূৰ্বে বিদ্যালয়ৰ ছাত্ৰী সকলে এখনি সমবেত সংগীত পৰিৱেশন কৰাৰ বিদায়-সম্বৰ্ধনা উপলক্ষে ছাত্ৰী সকলে নৃত্য-গীতো প্ৰদৰ্শন কৰে ৷
