Himanta Biswa Sarma: ৰাজ্য চৰকাৰৰ কৰ্মচাৰীসকলৰ বাবে এইবাৰ কঠোৰ পদক্ষেপ গ্ৰহণ কৰিছে Himanta Biswa Sarma নেতৃত্বাধীন অসম চৰকাৰে। নিৰ্ধাৰিত সময়সীমাৰ ভিতৰত পেঞ্চন কেছ নিষ্পত্তি নকৰিলে সংশ্লিষ্ট বিষয়াৰ দৰমহাৰ পৰা জৰিমনা কৰ্তনৰ নিৰ্দেশনা জাৰি কৰিছে ৰাজ্য চৰকাৰে।
দ্বিতীয়বাৰৰ বাবে মুখ্যমন্ত্ৰীৰ দায়িত্ব গ্ৰহণ কৰাৰ পিছতে প্ৰশাসনিক ব্যৱস্থাত অধিক কঠোৰতা আনিবলৈ উদ্যোগী হৈছে ড° হিমন্ত বিশ্ব শৰ্মা চৰকাৰ। বিশেষকৈ পেঞ্চন কেছ নিষ্পত্তিত দীৰ্ঘদিন ধৰি হোৱা বিলম্বক কেন্দ্ৰ কৰি এই কঠোৰ সিদ্ধান্ত গ্ৰহণ কৰা হৈছে।
অসম চৰকাৰে জাৰি কৰা নতুন নিৰ্দেশনাত উল্লেখ কৰা হৈছে যে ২৩ জুন, ২০০৩ তাৰিখে জাৰি কৰা SOP আৰু নিৰ্ধাৰিত সময়সীমা উলংঘা কৰি যিবোৰ কাৰ্যালয়ে পেঞ্চন কেছ নিষ্পত্তিত অনাহক পলম কৰিব, সেই কাৰ্যালয়ৰ মুৰব্বী আৰু দায়িত্বত থকা বিষয়াসকলৰ ওপৰত আৰ্থিক জৰিমনা আৰোপ কৰা হ’ব।
চৰকাৰী নিৰ্দেশনা অনুসৰি, বিলম্ব হোৱা পেঞ্চন কেছসমূহৰ এখন তালিকা Kritagyata প’ৰ্টেলৰ জৰিয়তে মাহিলী ভিত্তিত প্ৰস্তুত কৰা হ’ব। এই তালিকাৰ প্ৰতিলিপি সংশ্লিষ্ট জিলা আয়ুক্ত, বিভাগীয় জ্যেষ্ঠ সচিব আৰু সংশ্লিষ্ট কাৰ্যালয়ৰ মুৰব্বীসকললৈ প্ৰেৰণ কৰা হ’ব।
বিশেষকৈ পেঞ্চন প্ৰক্ৰিয়াকৰণৰ প্ৰতিটো পৰ্যায়ত দায়িত্বত থকা বিষয়াসকলৰ দৰমহাৰ পৰা প্ৰতিদিনে ২৫০ টকাকৈ কৰ্তনৰ ব্যৱস্থা কৰা হৈছে। এই কৰ্তনৰ পৰিমাণ সৰ্বাধিক ৫ হাজাৰ টকালৈ বৃদ্ধি পাব পাৰে। FinAssam প’ৰ্টেলৰ জৰিয়তে এই জৰিমনাৰ ধন পোনপটীয়াকৈ দৰমহাৰ বিলৰ পৰা কৰ্তন কৰা হ’ব বুলি চৰকাৰে স্পষ্ট কৰিছে।
ইফালে, ড্ৰয়িং এণ্ড ডিচবাৰ্চিং অফিচাৰ (DDO)সকলক এই ব্যৱস্থা কঠোৰভাৱে ৰূপায়ণ কৰাৰ নিৰ্দেশ দিয়া হৈছে। কৰ্তন কৰা দৰমহাৰ তালিকাও ARTPPG বিভাগলৈ প্ৰেৰণ কৰিব লাগিব।
চৰকাৰে স্পষ্টকৈ জনাইছে যে পেঞ্চন কেছ নিষ্পত্তিত কোনো ধৰণৰ গাফিলতি সহ্য কৰা নহ’ব। সেয়ে সকলো বিভাগ, সঞ্চালকালয় আৰু অধীনস্থ কাৰ্যালয়সমূহক নিৰ্ধাৰিত সময়সীমা কঠোৰভাৱে পালন কৰাৰ নিৰ্দেশ দিয়া হৈছে।
অসম চৰকাৰৰ এই সিদ্ধান্তক লৈ চৰকাৰী মহলত ইতিমধ্যে ব্যাপক চর্চা আৰম্ভ হৈছে। বহুতে ইয়াক প্ৰশাসনিক দায়বদ্ধতা বৃদ্ধিৰ বাবে এক গুৰুত্বপূৰ্ণ পদক্ষেপ বুলি অভিহিত কৰিছে।
