ঘৰুৱা কাম কেৱল পত্নীৰ দায়িত্ব নহয়, সেই দায়িত্ব স্বামীয়েও ভাগ কৰি ল’ব লাগে৷ বিবাহ বিচ্ছেদ গোচৰত উচ্ছতম ন্যায়ালয়ে এনেদৰে মন্তব্য কৰে৷ বিয়াৰ পিছত পত্নীয়ে ৰন্ধা-বঢ়া কৰিব বিচৰা নাছিল৷ এই অভিযোগ লৈ বিবাহ বিচ্ছেদ বিচাৰি আদালতলৈ গৈছিল এজন ব্যক্তি৷ সেই গোচৰত এতিয়া উচ্ছতম ন্যায়ালয়ে এক গুৰুত্বপূৰ্ণ মন্তব্য কৰিছে৷ আদালতে স্পষ্ট কৰি দিছে যে ঘৰুৱা কাম কেৱল পত্নীৰ দায়িত্ব নহয়, সেই দায়িত্ব স্বামীয়েও ভাগ কৰি ল’ব লাগিব৷ শেহতীয়াকৈ বিবাহ বিচ্ছেদৰ গোচৰত স্বামীয়ে অভিযোগ কৰিছিল যে বিয়াৰ মাত্ৰ এসপ্তাহৰ পিছত পত্নীৰ আচৰণ সলনি হৈছিল৷ তেওঁ ৰন্ধা-বঢ়া কৰিবলৈ অস্বীকাৰ কৰিছিল, আনকি তেওঁৰ লগত বেয়া আচৰণ কৰা আৰু মাক-দেউতাকক অপমান কৰা বুলিও অভিযোগ কৰিছিল৷
এই অভিযোগৰ ভিত্তিত তেওঁ বিবাহ বিচ্ছেদ বিচাৰি উচ্ছতম ন্যায়ালয়ৰ কাষ চাপিছিল৷ শুনানিৰ সময়ত ন্যায়াধীশসকলে স্পষ্টকৈ কয় যে পত্নী কোনো কাৰণতে পৰিচাৰিকা নহয়৷ ন্যায়াধীশ সন্দীপ মেহতাই মন্তব্য কৰে যে, ‘আপুনি পৰিচাৰিকাক বিয়া কৰোৱা নাই, আপুনি জীৱন সংগীক বিয়া কৰাইছে৷’ একে সময়তে ন্যায়াধীশ বিক্ৰমনাথেও কয় যে সময় সলনি হৈছে৷ এতিয়া পুৰুষ আৰু নাৰী সমান৷ গতিকে স্বামীয়েও ৰন্ধা-বঢ়া, বাচন ধোৱা বা আন ঘৰুৱা কাম-কাজ কৰি পত্নীৰ কাষত থিয় দিব লাগে৷ উল্লেখ্য যে এই দম্পতীয়ে ২০১৭ চনত বিবাহপাশত আবদ্ধ হয় আৰু তেওঁলোকৰ এটা আঠবছৰীয়া পুত্ৰ সন্তান আছে৷ সম্পৰ্কৰ অৱনতি ঘটাৰ বাবে পৰিয়াল আদালতত বিবাহ বিচ্ছেদ হয়৷ তাত স্বামীয়ে পত্নীৰ বিৰুদ্ধে ‘নিষ্ঠুৰতা’ৰ অভিযোগ আনে৷
কিন্তু পত্নীয়ে উচ্ছ ন্যায়ালয়ত আবেদন জনোৱাত বিবাহ বিচ্ছেদৰ ৰায় খাৰিজ কৰা হয়৷ তাৰ পিছত ৰায়দানত অসন্তুষ্ট হৈ স্বামীয়ে উচ্ছতম ন্যায়ালয়ত আবেদন জনায়৷ আনহাতে, শহুৰেকৰ পৰিয়ালৰ সন্মতি সাপেক্ষে সন্তান জন্ম দিবলৈ পিতৃৰ ঘৰলৈ যোৱা বুলি দাবী কৰে পত্নীয়ে৷ কিন্তু শিশুটিৰ অন্নপ্ৰাশন্নত তেওঁৰ স্বামী উপস্থিত নাছিল৷ ইয়াৰ উপৰি তেওঁৰ পিতৃৰ পৰা সোণ আৰু নগদ যৌতুক দাবী কৰা বুলি অভিযোগ আনিছে৷ ইয়াৰ পূৰ্বে এই গোচৰত মধ্যস্থতাৰ বাবে প্ৰেৰণ কৰা হৈছিল দম্পতীহালক৷
