মোডী-নেতানিয়াহুৰ বাৰ্তালাপঃ ইজৰাইলৰ প্ৰধানমন্ত্ৰী বেঞ্জামিন নেতানিয়াহুৱে ভাৰতৰ প্ৰধানমন্ত্ৰী নৰেন্দ্ৰ মোডীৰ সৈতে ফোনযোগে বাৰ্তালাপ কৰে।প্ৰধানমন্ত্ৰী মোদীয়ে কয় যে ভাৰতৰ জনসাধাৰণে এই কঠিন সময়ত ইজৰাইলৰ সৈতে শক্তিশালীভাৱে থিয় দিছে। ইজৰাইল আৰু পেলেষ্টাইনৰ যুদ্ধ সমগ্ৰ বিশ্বতে আলোচনাৰ বিষয় হৈ পৰিছে। হামাছৰ এই আক্ৰমণক সমালোচনা কৰিছে সকলো দেশেই। ইফালে ইজৰাইলৰ প্ৰধানমন্ত্ৰী বেঞ্জামিন নেতানিয়াহুৱে যুদ্ধৰ পৰিস্থিতিৰ বিষয়ে বিশ্বৰ নেতাসকলক অৱগত কৰি ভাৰতৰ প্ৰধানমন্ত্ৰী নৰেন্দ্ৰ মোদীকো ফোন কৰিছে। ভাৰতৰ প্ৰধানমন্ত্ৰী নৰেন্দ্ৰ মোদীৰ সৈতে কথা পাতিছে নেতানিয়াহুৱে। ইয়াৰ পাছতেই প্ৰধানমন্ত্ৰী মোদীয়ে নিজেই এই তথ্য দি কয় যে ইজৰাইলৰ সাম্প্ৰতিক পৰিস্থিতিৰ বিষয়ে মোক আপডেট দিয়াৰ বাবে নেতানিয়াহুক ধন্যবাদ জনাইছো।
প্ৰধানমন্ত্ৰী মোদীয়ে নিজৰ টুইটত লিখিছে, ‘প্ৰধানমন্ত্ৰী বেঞ্জামিন নেতানিয়াহুক তেওঁৰ ফোন কল আৰু সাম্প্ৰতিক পৰিস্থিতিৰ আপডেট দিয়াৰ বাবে ধন্যবাদ জনাইছো। এই কঠিন সময়ত ইজৰাইলৰ সৈতে ভাৰতৰ জনসাধাৰণ সবলভাৱে থিয় দিছে।’
ইয়াৰ পূৰ্বে সোমবাৰে দিয়া ভাষণত ইজৰাইলৰ প্ৰধানমন্ত্ৰী বেঞ্জামিন নেতানিয়াহুৱে ইজৰাইলক সমৰ্থন কৰা সেই সকলো দেশক ধন্যবাদ জনায়। কিন্তু এইটো সঁচা যে ইজৰাইল আৰু হামাছৰ মাজত চলি থকা যুদ্ধই বিশ্বৰ বাবে এক বৃহৎ সংকট হিচাপে আত্মপ্ৰকাশ কৰিছে। ইউক্ৰেইন যুদ্ধৰ দৰেই এই বিষয়তো বিশ্ব বিভাজন হোৱা যেন লাগে। বহু দেশে পেলেষ্টাইনক সমৰ্থন কৰাৰ বিপৰীতে আমেৰিকা, ব্ৰিটেইন, ফ্ৰান্স, জাৰ্মানী আৰু ইটালীয়ে ইজৰাইলক মুকলিকৈ সমৰ্থন কৰিছে।