ঈশান উদয় স্ক’লাৰশ্বিপ আৰু কেন্দ্ৰীয় চৰকাৰৰ মানৱ সম্পদ মন্ত্ৰালয়ে সংখ্যালঘু সম্প্ৰদায়ৰ মেধাবী ছাত্ৰৰ বাবে আগবঢ়োৱা মেধা জলপানিৰ নামত ৰাজ্যত গঢ় লৈ উঠিছে বৃহৎ জালিয়াতি চক্ৰ ৷
বৰপেটা আৰক্ষীৰ বিশেষ অভিযানত আৰক্ষীৰ জালত পৰিল ঈশান উদয় বৃত্তি আৰু কেলেংকাৰিৰ সৈতে জড়িত ২ অভিযুক্ত ৷ বৰপেটাত পুনৰ ছাত্ৰৰ স্ক’লাৰশ্বিপৰ নামত ভয়াৱহ কেলেংকাৰি ৷
এটা দুষ্ট চক্ৰই ৰাজ্যৰ একাংশ মহাবিদ্যালয়ৰ ভুৱা ছাত্ৰৰ নামত জালিয়াতিৰে উলিয়াই নিছে কোটি কোটি টকা ৷ ধৃত দুই অভিযুক্তৰ নাম জেহেৰুল ইছলাম আৰু হাবিবুৰ ৰহমান ৷
ধৃত দুই অভিযুক্তৰ ঘৰ বৰপেটাৰ জাহোৰপাম গাঁৱত ৷
বৰপেটা আৰক্ষীয়ে অনুসন্ধান চলাই গ্ৰেপ্তাৰ কৰে ছাত্ৰৰ স্কলাৰশ্বিপৰ ধন জালিয়াতিৰে উলিয়াই নিয়া দুই অভিযুক্তক ৷ বৰপেটাৰ অতিৰিক্ত আৰক্ষী অধীক্ষক ড০ প্ৰদীপ শইকীয়াই এখন সংবাদমেলযোগে এই কথা সদৰী কৰে সাংবাদিকক ৷
উল্লেখ্য যে উচ্চতৰ মাধ্যমিক পৰীক্ষাত ৭৫ শতাংশ নম্বৰ লাভ কৰি উত্তীৰ্ণ হোৱা ছাত্ৰ–ছাত্ৰীসকলক বছৰেকত প্ৰদান কৰা হয় প্ৰায় ৬০ হাজাৰ টকাৰ স্ক’লাৰশ্বিপ ৷ একেদৰে কেন্দ্ৰীয় চৰকাৰৰ মানৱ সম্পদ মন্ত্ৰালয়ে ৰাজ্যখনৰ সংখ্যালঘু সম্প্ৰদায়ৰ মেধাৱী ছাত্ৰ–ছাত্ৰীসকলক ৰাজ্যৰ বাহিৰৰ একাংশ আগশাৰীৰ শিক্ষা প্ৰতিষ্ঠানত অধ্যয়নৰ বাবে কেন্দ্ৰীয় চৰকাৰে আগবঢ়ায় মেধাভিত্তিক স্কলাৰশ্বিপ ৷
এই দুষ্ট চক্ৰটোৱে ৰাজ্যৰ একাংশ মহাবিদ্যালয়ৰ পাছৱৰ্ড আৰু অ’টিপি ব্যৱহাৰ কৰাৰ লগতে মহাবিদ্যালয়ৰ অধ্যক্ষৰ চহী জাল কৰি ভুৱা ছাত্ৰ–ছাত্ৰীৰ নামত সংঘটিত কৰি আহিছে ভয়াবহ কেলেংকাৰি ৷ উল্লেখ্য যে, ধৃত দুই অভিযুক্তই ২০১৮ চনৰ পৰাই বৰপেটা-বঙাইগাঁও কলেজ, জনপ্ৰিয় কলেজ, বাণিয়াৰাপাৰা, কয়াকুছি কলেজ, হৰেন্দ্ৰ-চিত্ৰা কলেজ আৰু অভয়াপুৰীৰ চি কে কলেজৰ একাংশ ভুৱা ছাত্ৰৰ নামত জালিয়াতিৰে উলিয়াই নিছে ঈশান উদয় স্কলাৰশ্বিপৰ কোটি কোটি টকা ৷
আনহাতে বাংগালুৰুৰৰ নাথগিৰি কলেজ, কৰ্ণাটকৰ মাদানি কলেজ, ইনষ্টিটিউট অৱ নাৰ্ছিং ছায়েঞ্চ অৱ কৰ্ণাটকত অধ্যয়ন কৰা দেখুৱাই মেধা জলপানিৰ ধনো উলিয়াই নিছে চক্ৰটোৱে ৷ বিগত কেইবাবছৰ ধৰি ৰাজ্যখনত শিপাই পৰা চক্ৰটোক উৎখাত কৰি কঠোৰ শাস্তিৰ দাবী উত্থাপন হৈ আহিছে ৷
