নিৰ্বাচনী অধিসূচনা জাৰি হোৱাৰ পূৰ্বে মন্ত্ৰী-বিধায়ক সকল নিজৰ নিজৰ সমষ্টিত প্ৰচাৰ অভিযান আৰম্ভ কৰিছে ক্ৰমান্বয়ে গৰম হৈ উঠিছে নিৰ্বাচনী কুচকাৱাজ এই ক্ষেত্ৰত পিছ পৰি থকা নাই বৰপেটা জিলাৰ ৪৭ নং চেঙা বিধান সভা সমষ্টিৰ কংগ্ৰেছী বিধায়ক শুকুৰ আলী আহমেদ। প্ৰাক্তন মন্ত্ৰী তথা বৰ্তমানৰ বিধায়ক গৰাকী নিজ সমষ্টিতে ৰাইজৰ ৰোষত পৰাৰ তথ্য পোহৰলৈ আহিছে। শনিবাৰে সমষ্টিটোৰ দক্ষিণ পাৰৰ খোলাবান্ধাত এম জি এনৰেগা কামৰ আধাৰশিলা স্থাপন কৰিবলৈ গৈ ৰাইজৰ ৰোষত পৰিল বিধায়ক গৰাকী। নিৰ্বাচনৰ প্ৰাকক্ষণত বিধায়ক গৰাকীয়ে সমাগত নিৰ্বাচনৰ বাবেই আধাৰশিলাৰ ল’লীপপ আগবঢ়োৱাৰ অভিযোগ উত্থাপন কৰি ক্ষোভিত হৈ একাংশই হাতে- হাতে কলা পতাকা লৈ বিধায়ক শুকুৰ আলীৰ বিৰুদ্ধে ৰাজপথত টায়াৰ জ্বলাই প্ৰতিবাদো সাব্যস্ত কৰে। শুকুৰ আলী মুৰ্দাবাদ, শুকুৰ আলীক নালাগে, শুকুৰ হাটাও চেঙা বচাও আদি শ্ল’গানেৰে পৰিবেশ উত্তাল কৰি তোলে।
